爸知弊你嚟湊吖峴港篇｜陳山聰囝囝Jaco超可愛勁黐爸爸自爆想限期內追多個

Sep 30 2023

TVB育兒真人騷《爸知弊！你嚟湊吖！》於本周四及周五（9/28-29）晚十點半推出峴港番外篇《爸知弊！你嚟峴港湊吖！》，除有「爸知弊幼稚園」校長黎諾懿及大仔小春雞外，還專誠請來陳山聰帶同三歲囝囝 Jaco 齊齊暢遊峴港及會安，見識越南傳統文化、嚐盡當地特色美食之餘，還要接受製作組派送的連串任務及隱藏任務，令到兩位單飛湊仔外遊的星級爸爸忙上加忙。

爸知弊你嚟湊吖峴港篇｜陳山聰與囝囝 Jaco互動超有愛

首度上節目的Jaco全程表現輕鬆自在、真我性情盡展現；見到喜愛的事物「車車」、「包包」及「船船」時會開心大叫；接觸到可怕的事物如「釣蟹」及「騎牛牛」時，又會喊驚驚兼撲向爸爸撒嬌，加上高八度的「BB 話」，可愛爆燈。對爸爸儼如貼身膏藥的Jaco，吃飯時會主動「餵食」山聰，暖心度 100 分。

Jaco太愛爸爸唔肯跟黎諾懿連環扭計

不過亦因為Jaco太愛爸爸，當製作組要求陳山聰將 Jaco交給諾懿照顧時，Jaco 自然不肯就範狂扭計，講道理講極唔通的山聰最終只能「借屎遁」甩身。雖然Jaco望落乖巧，但扭起計上嚟一樣令山聰冇晒符，除了不願分離，拍攝期間又因扭眼瞓纏著山聰不放，雖然山聰全程強裝冷漠，但最終仍敵不過阿仔連環扭計攻擊乖乖妥協，十分搞笑。

小春雞愛與爸爸黎諾懿鬥氣

在節目中率先負責「一湊二」落田種菜的諾懿亦相當辛苦，由於 Jaco 年紀尚小，諾懿只能小心翼翼貼身照顧，令被冷落的小春雞即時呷醋。已為兩子之父的諾懿，亦坦承至今仍未習慣「一湊二」：「我未去到可以兼顧晒。」又謂照顧別人的孩子辛苦度倍升：「萬一佢整親，同完山聰交代，要再同阿嫂交代。」諾懿與小春雞的互動亦相當特別，與爸爸相處儼如老友的小春雞，只要一有機會便會戲弄諾懿；不過當諾懿認真發號施令時，小春雞又會收起佻皮乖乖服從，兩父子甚有火花。

陳山聰囝囝Jaco主動要求戒奶嘴勁爆笑

除了黐身又愛撒嬌，Jaco 的搞笑細胞亦相當厲害。事緣製作組要求兩名仔仔畫「越南手信」給爸爸估，由於Jaco畫風太過抽象，陳山聰連估都有困難，只能對著阿仔搞爛 Gag 謂：「你係畢加索定係不加思索呢？」，而黎諾懿就感性分享如何幫小春雞戒掉奶嘴故事時，Jaco 突然「神來之筆」大叫「No 奶嘴」，氹得陳山聰開心回應：「You are a Man，Right？嗱！你話架！」相當有默契。

陳山聰披露有意「限期內」追多個

在眾多遊戲中，最令陳山聰感觸的是「蒙著眼搵毛巾」，只有3歲的 Jaco 全程落力為爸爸提水及打氣，令陳山聰眼濕濕勁感觸謂：「如果我將來眼又朦、耳又聾，佢會唔會好似今日咁呢？」陳山聰在節目中披露有意為 Jaco 追多個弟弟或妹妹，只是「有限期」：「今年如果追到就追，今年追唔到就算。」想知更多陳山聰為自己定下追B限期的背後因由？密切留意本周兩集的《爸知弊！你嚟峴港湊吖！》。