約埋班Friend去旅行｜張振朗1個原因唔想拍《反黑路人甲2》賴慰玲傾到眼濕濕

約埋班Friend去旅行｜90後朱敏瀚唔知咩係「河孖」

首站行程，三人去到著名景點三姊姊石打卡，之後他們有機會駕駛法拉利超跑體驗「速度與激情」，三人猜「河孖」決定誰有機會坐車，其間 90 後的朱仔竟舉手問甚麼是「河孖」/ 「何媽」 ，令37歲的賴慰玲愕然兼眼凸！

最終張振朗有幸駕駛法拉利，朱仔為座上客，賴慰玲則勁冇癮與工作人員坐旅遊巴。之後風水輪流轉輪到賴慰玲駕駛保時捷開篷跑車，振朗屈在狹窄的後座，朱仔則凍到打噴嚏，場面搞笑。

約埋班Friend去旅行｜張振朗突然發表「底褲偉論」

因合作劇集《反黑路人甲》結緣的三人無所不談，就連帶了幾多條底褲出 Trip 都攞出嚟講！事緣三人在高級酒店 High Tea，張振朗突然發表「底褲偉論」說：「其實呢個 Trip 我淨係帶咗兩條底褲。」聽到反晒白眼的賴慰玲說：「其實我見到你帶咗兩個篋，嗰啲嘢（底褲）有咁重咩？」張振朗笑笑口解釋：「唔係重呀，因為我對佢哋珍而重之，想安放得佢哋舒服啲，所以一條一個篋。」他再笑謂：「我屋企都係得 4 條，我已經拎咗一半過嚟！」三人最終爆笑收場。

朱敏瀚感恩「陸秋」令觀眾改觀 賴慰玲一時感觸眼濕濕

晚上三人入住森林中的木屋酒店，房價約 1,300 澳元（約 6,500 港元）一晚，三人參觀酒店房時睇到嘩嘩聲，朱仔見到超大廁所後笑言：「個廁所大過我間房！」之後三人到戶外飲酒，一邊睇星星一邊談天，朱仔坦言《反黑路人甲》「陸秋」一角改變了觀眾對他的睇法，他說：「嗰陣係好純粹、好 focus 喺角色上，嗰幾個月好投入，滿足感好大，感覺到自己係做得好，好耐未試過覺得自己係做得好。」賴慰玲聽到後更一時感觸眼濕濕。

張振朗唔支持拍《反黑路人甲2》

朱仔還有感而發大嘆：「有時喺度諗，依家仲做唔做得番呢？」張振朗聞言即開啟感性Mode，眼濕濕說：

「我都好肯定拍唔番，唔好拍第二集（季）喇，好嘅嘢好過咪算囉，留喺回應先係最好嘅，但（呢個組合）可以試吓拍其他嘅。」

有網民笑指張振朗酒後撞樣魏俊傑

張振朗飲酒後滿面通紅，還顯得有點面腫腫，有網民笑指他撞樣魏俊傑。

有片重溫！