聲夢傳奇2 第3集

聲夢傳奇2|Crystal梁芷菁首集8分出局 為參賽唔考DSE?淘汰賽開始!

娛樂

廣告

《聲夢傳奇2》去到第3集,13歲大熱趙紫諾唱《說散就散》力壓全場奪最高分23分,而前兩集跳唱的Crsytal 梁芷菁則只得8分被淘汰 ,返到後台仲爆喊話:「我接受唔到!」

泳兒隊Crystal梁芷菁得8分 休學唔考DSE首集被Foul

梁芷菁(Crystal)笑容甜美本身好殺食,但因為掛住練舞唱到flat晒,最後只得8分被淘汰。她在台上已經兩行眼淚,一返到後台見到Jasmine就攬住爆喊,因為二人老友鬼鬼,曾承諾要一起走下去,豈料自己首輪被foul,喊住講:「我接受唔到!」導師泳兒喊到面都紅晒,本身仲諗緊點幫佢唱好啲,點知已經冇機會。然後全場都喊,估唔到呢集《聲夢2》用眼淚收尾。

聲夢傳奇2 第3集 聲夢傳奇2 Crystal休學一年玩比賽,點知第一集就出局。
Crystal休學一年玩比賽,點知第一集就出局。(圖片來源:《聲夢傳奇2》截圖)
聲夢傳奇2 第3集 梁芷菁為《聲夢》唔考DSE 休學一年,結果首回合被篩走。
梁芷菁為《聲夢》唔考DSE 休學一年,結果首回合被篩走。(圖片來源:tvb.com)

聲夢傳奇2 第3集 聲夢傳奇2 Crystal再唱Jace陳凱琪的作品,今次唱《I Wish》睇嚟又再跳唱。

Crystal梁芷菁長文講出局心情:我講咗一句我好嬲自己嘅一句嘢

比賽過後,Crystal在IG 發展長文分享心情,她表示對結果有啲失望,但珍惜每一個意見,「之前嘅我係好怕聽到啲negative嘅comment,但直至到而家我知道冇呢啲comments 係唔會進步,所以好多謝呢25位評判,好認真咁樣睇我呢場表演。」

Crystal表示:「其實我最希望嘅係每位觀眾睇完我呢個表演,都feel到我好開心,同埋最重要嘅係令到你哋都好開心!」

聲夢傳奇2 第3集 聲夢傳奇2 全場都喊。
全場都喊。(圖片來源:《聲夢傳奇2》截圖)
聲夢傳奇2 第3集 聲夢傳奇2 Crystal爆喊。
Crystal爆喊。(圖片來源:《聲夢傳奇2》截圖)

梁芷菁憶述爆喊過程

「但見到最後結果,仍係幾唔開心嘅,但我知道總需要一個人要暫時離開呢個舞台 。結果諗住笑住咁行落去唔好再喊嘅時候,見到大家喊得仲犀利過我咁就忍唔住咆哮了。嗰種空虛感嚟得太突然,好似眨吓眼乜嘢都冇咗咁。攬住Jasmine嗰陣我係咁講:『我唔想喊我唔想喊~』因為我知道我冇留遺憾。」

「⋯⋯我從來都冇試過咁享受一個表演,即使嗰一刻我知道自己要走啦,而眼框嘅眼淚都好給力啊就non stop咁biubiubiu 。🥹腦入面喺度諗之前應承過大家嘅嘢,對唔住一班對我有期望嘅人尤其是係我爸爸媽咪」

「比賽之後嗰日,我講咗一句我好嬲自己嘅一句嘢……我竟然同媽咪講咗句:『我唔想再唱歌啦。』直至到有位高人提醒我:『音樂比到你嘅嘢有幾多?你唔開心嘅時候佢陪住你,你好開心嘅時候佢都陪緊你,如果你就咁就放棄嘅話我會好嬲囉!』聽完呢句嘅時候我更加嬲自己講咗一句咁嘅嘢🤣放心啦媽咪我唔會放棄㗎 你個女都係講咗一句晦氣說話想你氹吓啫。」

最後Crystal表示:

「雖然係咁但係我都冇後悔過我做嘅決定,到呢一刻我都相信一切是最好的安排❤️,最後好想講多一句 我真係好鍾意唱歌!」

聲夢傳奇2|淘汰賽開始 一集Foul一個!

《聲夢傳奇2》來到第3集,淘汰賽今集正式開始,司儀森美亦宣布將會每集淘汰一個,Chantel姚焯菲賽前同今集學員打氣:「要好好珍惜《聲夢》嘅舞台,enjoy the stage,加油!」現場有25 位業界專業評審,包括:歌手陳潔靈、監製舒文、 張佳添、人伍仲衡、伍樂城等等,每位評審會以綠、紅燈示意關過與否,得到最少綠燈的學員將會被淘汰。

聲夢傳奇2 第3集 聲夢傳奇2 今集開始每集foul一個,邊幾個要走呢?
今集開始每集foul一個,邊幾個要走呢?(圖片來源:《聲夢傳奇2》截圖)

13歲Sabrina當Chantel面唱《說散就散》全場最高分

13歲Sabrina是擁有「最強CV」的學員,6歲同郎朗表演,10歲開個人演奏會。雖然平時木口木面,但在後台表情多多,見到偶像Yumi鍾柔美即刻變迷妹。Sabrina一開口唱《說散就散》個個都大讚,Eric Kwok感嘆:「呢個世界發生咩事,點解13歲係咁,希望佢唔好變聲。」

聲夢傳奇2 第3集 聲夢傳奇2 Sabrina只得13歲但聲音充滿爆發力,全場激讚。
Sabrina只得13歲但聲音充滿爆發力,全場激讚。(圖片來源:《聲夢傳奇2》截圖)
聲夢傳奇2 第3集 聲夢傳奇2 Chantel聽到拍晒手。
Chantel聽到拍晒手。(圖片來源:《聲夢傳奇2》截圖)

Chantel都唱過《說散就散》不過甩嘴忘記歌詞:

Chantel姚焯菲亦曾在商場騷公開演唱過《說散就散》,不過當時就甩嘴忘記歌詞,她在節目中對Sabrina說:「我起晒雞皮,我估唔到十三歲會唱到咁樣!I know you are very shy, but then you are whole new person on this stage. So ,congratulations! I love that.」Sabrina最後以23分最好成績力壓其他參賽者。

金仔暗戀林二汶先唱得好《早班火車》?

林二汶鍾意金仔得戚,唱《早班火車》時跟住二汶個groove,森美笑言:「好似暗戀二汶咁!」Eric Kwok就鍾意佢「沙聲」大讚冇得頂,舒文亦笑言:「我問過一個知名歌手,問佢聲沙點算,佢就話『o靚坤都可以有愛情㗎嘛』!」而前兩集露腰跳唱的Angel受舊患影響,唱《發熱發亮》時只得13分跌入安全區,當時佢講到喊:「唔知出唔出得返去。」

聲夢傳奇2 第3集 聲夢傳奇2 林二汶超滿意。
林二汶超滿意。(圖片來源:《聲夢傳奇2》截圖)
聲夢傳奇2 第3集 聲夢傳奇2 金仔聲沙反而俾Eric Kwok讚。
金仔聲沙反而俾Eric Kwok讚。(圖片來源:《聲夢傳奇2》截圖)
聲夢傳奇2 第3集 聲夢傳奇2 Angel以為自已會出局講到喊。
Angel以為自已會出局講到喊。(圖片來源:《聲夢傳奇2》截圖)

JW(王灝兒)隊 – Pamela趙小婷《愛的根源》

聲夢傳奇2 第3集 聲夢傳奇2 大熱人物之一趙小婷唱《愛的根源》。
大熱人物之一趙小婷唱《愛的根源》。(圖片來源:YouTube@聲夢傳奇)

聲夢傳奇2|大熱趙小婷、Jasmine有得留低

今集有6位學員輪流獨唱,分別是:Pamela趙小婷《愛的根源》、Jasmine任暟晴《玉蝴蝶》、金仔金永衡《早班火車》、Angel劉詠彤《發熱發亮》、Sabrina趙紫諾《說散就散》及Crystal梁芷菁《I Wish》。Pamela賽前被JW話唱得唔夠sweet,緊張到入廁所喊,不過分數中規中距有17分成功留低。另一位大熱Jasmine雖然唔夠時間練歌,不過有19分一樣安全留低。

聲夢傳奇2 第3集 聲夢傳奇2 Pamela樣就夠sweet,但把聲唔夠,成績平平入安全區。
Pamela樣就夠sweet,但把聲唔夠,成績平平入安全區。(圖片來源:《聲夢傳奇2》截圖)
聲夢傳奇2 第3集 聲夢傳奇2 Jasmine成功留低。
Jasmine成功留低。(圖片來源:《聲夢傳奇2》截圖)

常見問題

《聲夢2》Jasmine任暟晴有咩來頭?

雖然Jasmine年僅16歲,但原來她由細細個開始已經接觸音樂,歌唱和鋼琴都取得⋯⋯按此看詳情

網民封Jasmine任暟晴為邊個師姐2.0?

《聲夢2》第一集Jasmine經Johnny Yim教路升Key後,表現獲網民大讚,更話有望成為某師姐接班人⋯⋯按此看詳情

撰文:東方新地圖片來源:YouTube@聲夢傳奇資料或影片來源:YouTube@聲夢傳奇

你又點睇?