萬千星輝頒獎典禮2022重溫｜林敏驄失視帝爆金句 江美儀奪視后爆喊
最佳男主角｜林敏驄大熱倒灶 陳山聰開齋攞視帝
《金宵大廈2》的陳山聰，擊敗事前呼聲最高的63歲《下流上車族》男主角林敏驄，以及《白色強人2》的馬國明，《超能使者》的陳展鵬以及《痞子殿下》的周嘉洛，首次奪得無綫最佳男主角一獎，對上一次他得獎是2019年跟李施嬅齊奪最受歡迎電視拍檔。
江美儀奪視后大感觸： 「以為唔係親生女唔會攞獎」
江美儀於苗橋偉及黃日華手上領過獎項：「我冇諗過會攞到獎。多謝TVB，我以為自己唔係親生女，唔會攞到呢個獎，我要多謝曾生、珍姐、樂小姐、鍾澍佳，多謝《下流上車族》所有台前幕後工作人員，多謝台上咁多位兄弟姐妹，陳煒我哋好爭氣呀！」
最佳劇集｜《下流上車族》大熱跑出
《下流上車族》於一片大熱中奪得最佳劇集，一班台前幕後上台領獎致謝，男主角林敏驄不但掛住於台下跟曾志偉寒暄而遲上台，一上台時更扮傻問張艾嘉「頒咩獎？」
林敏聰乘機宣傳個人演唱會
林敏聰在得獎時依舊不改玩嘢本色：
「我想講嘅好簡單，2023年，係好特別一年，3月18、19有兩場好精彩演唱會，希望到時見到大家！恭喜山聰，個人榮辱好少事，識攞梗係攞終極大獎，見到咁多同事攞咁獎，能夠參與呢部劇好驕傲。」
林敏聰激罕認真！感謝總經曾志偉
林敏驄續說：「多謝總經理，同佢一齊做嘢咁多年，佢對我都冇乜好過，一直等佢良心發現。拍完戲之後，同佢同美儀一齊食飯，發現佢比我更了解我，好似一個最好朋友默默守護你身邊，佢知道晒你做到咩，同知你所有不足，喺適當時推你一下，推你去死！佢有夥善良嘅心，呢度幾百人，都數唔到有幾多個人受佢幫助。大家話係咪？」
林敏驄寸江美儀烏雞視后
阿驄又說︰「由於佢（曾志偉），令我哋幾個老嘢，鮑姐呀……」江美儀插嘴說︰「唔係我呀！」阿驄又反擊她說：
「你唔好以為著到成隻烏雞咁，做視后？今朝啪幾粒事後丸，搏到吓！唔好撩啦（PA催促）！新聞遲少少啦！」
當周奕瑋打斷阿驄說話，邀請導演致謝詞。
馬來西亞最喜愛TVB男主角｜陳展鵬三奪視帝
陳展鵬憑《超能使者》，擊敗《白色強人2》的馬國明及《美麗戰場》的陳山聰等，奪得馬來西亞最喜愛TVB男主角，陳展鵬更是第三次奪得這個角色。
馬來西亞最喜愛TVB女主角｜劉佩玥首封視后
於《美麗戰場》飾演記者的劉佩玥，擊敗《今宵大廈2》的李施嬅及《超能使者》的唐詩詠等，奪得馬來西亞最喜愛TVB女主角獎，是她繼2016年奪馬來西飛躍女藝員獎後再奪獎。
同陳瀅陳曉華攬攬 龔嘉欣冇份
劉佩玥得獎獲不少《美麗戰場》拍檔支持，她上台前跟陳瀅同陳曉華攬攬，但龔嘉欣卻被賣甩，只坐在椅上，之後劉佩玥走上台講得獎感受，陳瀅在台下幫她拍片。
最佳女配角｜蔣家旻砌低車家姊妹 大熱奪獎
《美麗戰場》為一向演開乖乖女角色的蔣家旻，首次挑壞女人角色「鍾家琪（反骨琪）」，事前已呼聲最高，結果順利擊敗《下流上車族》「車家兩姊妹」郭柏妍及羅毓儀，以及《超能使者》的劉穎鏇等等，入行15年終順利奪得女配角獎，這是她繼2020年奪得無綫飛躍進步女藝員獎後再次得獎。
萬千星輝頒獎典禮2022得獎名單
最佳男主角
陳山聰 《 金宵大廈2》
最佳女主角
江美儀 《 下流上車族 》
最佳劇集
《 下流上車族 》
林敏驄失落視帝和最喜愛男角色，不過佢大方恭喜陳山聰，仲話「個人榮辱」好少事，識攞就攞壓軸大獎⋯⋯
最佳男配角
鄧智堅《 下流上車族 》
最佳女配角
蔣家旻《 美麗戰場 》
飛躍進步男藝員
吳偉豪
飛躍進步女藝員
郭柏姸
郭柏妍向林敏驄獻吻
郭柏妍下台後與《下流上車族》中飾演其父的林敏驄接受訪問，因為踢波受傷的林敏驄直言本來因為腳痛打算缺席，得因為郭柏妍叫到所以來現身。阿驄又指起初教郭柏妍做戲時，對方「成嚿雞咁」，但郭柏妍最後還是感謝前輩林敏驄的教導，公開向他獻吻道謝。
最受歡迎電視男角色
紀威（ 周嘉洛 ）《 痞子殿下 》
最受歡迎電視女角色
白天娥（三太）（ 樊亦敏 ）《 愛回家之開心速遞 》
最受歡迎電視拍檔
周嘉洛、陳瀅、JW王灝兒、朱敏瀚、張頴康《 痞子殿下 》
最佳綜藝節目
《 開心無敵獎門人 》
最佳男主持
方東昇《 尋人記II 》
最佳女主持
陳貝兒《 無窮之路II – 無價之保 》
最佳資訊及專題節目
《 尋人記II 》
最佳年度及特備節目
《萬千星輝賀台慶》
最受歡迎電視歌曲
《Wish》主唱：JW王灝兒（劇集《白色強人II》）
專業精神獎
陳惠英（服裝設計）
萬千光輝演藝大獎
曾勵珍
馬來西亞最喜愛TVB電視劇集
《 超能使者 》
馬來西亞最喜愛TVB男主角
陳展鵬 《 超能使者 》
馬來西亞最喜愛TVB女主角
劉佩玥 《 美麗戰場 》
相關文章:
萬千星輝頒獎典禮2022｜JW超低V險走光 性感郭柏妍扶實腳傷林敏驄行紅毯
萬千星輝頒獎典禮2022｜與吳偉豪同奪飛躍男女 上位小花郭柏妍向林敏驄獻吻
