衝上雲霄2｜陳法拉失婚反口唔續約拒谷劇 吳鎮宇張智霖鬧爆拒再合作
《衝上雲霄2》陳法拉只現身大馬宣傳 香港宣傳全程甩底
2003年前無綫播出《衝上雲霄》熱爆全城，吳鎮宇、馬德鐘及陳慧珊的三角戀成愛情經典，馬國明、吳卓羲及胡杏兒憑此劇升呢，無綫為免《衝上雲霄II》成炮灰，播出日期一改再改，務求鋪天蓋地宣傳有助激增收視，最終落實2013 年 7 月 15 日 開播，早在一個月前開始播洗腦式宣傳片，劇組拉大隊到大馬宣傳，聲稱在美國紐約進修演藝課程的法拉，不惜走堂飛大馬，一連兩天的行程，法拉瞓身宣傳，更在活動上跟fans大玩遊戲，食完wasabi麵包之後再跳騎馬舞，頻頻賣口乖冧fans：「Fans專登喺新加坡飛嚟見我，我第一次嚟怡保，已經感受到大家熱情，令我好感動，唔捨得走！」
陳法拉大馬騷兩日收六位數字 香港宣傳大細超
陳法拉喺大馬就落力，但當時在赤鱲角機場的飛機維修庫舉行的活動，以及劇集的宣傳都冇影，令大家覺得她大細超，當時有知情人士透露：「嚟緊仲有五個大型宣傳活動，監製親自打俾法拉好多次，話可以由佢定日子，其他人再配合，只希望女主角嚟到一次撐場，但法拉好絕情say no，但大馬又去到喎，梗係啦！大馬有騷錢收㗎，兩日就有六位數字，佢淨係睇錢，之後監製都費事再求佢！」
《衝上雲霄2》吳鎮宇嬲：「冇話冇邊個唔得！」
吳鎮宇和陳法拉屢傳有心病， 本刊記者提起法拉，鎮宇即皺眉頭，並猶豫良久才小心作答，但仍忍不住寸爆對方唔好自以為好重要﹗
（記 = 本刊記者 、吳 = 吳鎮宇）
記： 上一輯反應咁好，對收視係咪好大期望？
吳： 當然想收視好，想多啲人睇啦﹗
記： 會唔會一齊睇首播呀？
吳： 梗係想齊人食住飯睇啦﹗
記： 女主角陳法拉唔喺度係咪好可惜？
吳： 冇話可唔可惜㗎喎，成套劇冇話冇邊個唔得﹗一個人唔會影響到啲乜﹗
記： 會唔會覺得法拉宣傳不力？
吳： 我就盡咗自己責任喇﹗
《衝上雲霄2》感情線七國咁亂
相隔十年，除了吳鎮宇飾演的Sam哥坐鎮，已人面全非，在上一輯跟胡杏兒的一段刻骨銘心愛情，今輯以病逝交代而告終，為了加強重口味劇情，幾位重頭主角嘴唔停兼床戰連場，Sam哥周旋於新加入的陳法拉和新角色胡杏兒，加埋吳卓羲等大玩五角戀，感情錯綜複雜，張智霖飾演的風流機師，更連食6女，做開乖乖仔的馬國明都玩一夜情，七國咁亂﹗
《衝上雲霄2》吳鎮宇誓不再合作
吳鎮宇和張智霖雖非無綫親生仔，但對於頻密式宣傳活動，亦完全配合，唔介意比一般劇集較多宣傳，工作人員透露：「鎮宇雖然要返內地拍嘢，但一早主動問宣傳日期，然後同內地劇組度期攞假，希望可以出席每一次宣傳，佢好緊張套劇，但相對女主角hea成咁，梗係嬲啦，對住ChiLam狂呻，喺背後鬧法拉連基本演員操守都冇，讀完書都唔會係一個專業演員，仲話永不合作！ChiLam咁好脾氣都鬧埋一份！雖然佢哋同記者講冇收視壓力，但其實好鬼着緊，日日喺微博宣傳套劇，呢排不停做電視台、報紙雜誌訪問，忙過電影宣傳，因為法拉連平面宣傳都冇乜做，變相其他演員要分擔，梗係有微言啦，話佢同鄧萃雯之前唱衰《金枝貳》冇分別！」
陳法拉周圍辣火頭令胡杏兒慘變第二女主角
當年扮阿姐犯眾憎陳法拉五月已約滿無綫，無綫鬧花旦荒，高層一年前已誘她續約，不惜以兩套重頭劇《衝上雲霄2》以及拍住視帝黎耀祥拍《傳愛事務所》，法拉嫌棄演空姐，要求演女機師，監製為她度身訂造角色，拍劇以來，是非不斷，周圍辣火頭，先是要求加戲份，令胡杏兒慘變第二女主角，拍劇時，又多多要求，幕後人員爆料：「法拉當自己係一姐，成日點人做嘢，話啲劇情犯駁，篤住監製話要點點點，搞亂晒大家啲場口同對白，鎮宇忍佢好耐，有次臨時爆肚，搞到法拉接唔住，呆咗企喺度，全廠人陰陰嘴笑。」而鎮宇和法拉雖然在劇中飾演一對，但拍劇以來屢傳不和，去年到巴黎、倫敦拍攝外景時，更將不和升級，因為法拉經常獨自離群，頻NG又遲大到，搞到鎮宇忍無可忍，在羅浮宮前媽聲四起、連環爆粗。法拉最後反口唔續約，玩謝班高層，又拒幫手宣傳，有傳法拉已經被高層列入黑名單！
陳法拉微博唔提《衝上雲霄2》
陳法拉雖然人在紐約，但每日例必更新微博，大部分只是失婚後的校園生活，極少提及新劇，反而為電影宣傳。
《衝上雲霄2》吳鎮宇 張智霖 陳法拉 情陷三角
自2003年《衝上雲霄》後，吳鎮宇睽違10年再度回巢TVB拍續集再演機長唐亦琛，但胡杏兒演的妻子蘇怡第2集就病逝，後來邂逅了陳法拉，而法拉的男友張智霖（ChiLam）生性極之風流，好多女埋佢身，男方又來者不拒，有水照抽，令法拉覺這個男人欠安全感，而與吳鎮宇漸漸由family friend變成戀人，周旋二人之間大玩三角戀，糾纏多時後，ChiLam最終成全法拉同吳鎮宇，瀟灑全身而退。
《衝上雲霄2》故事大綱
唐亦琛（吳鎮宇飾）喪失愛妻，留在英國度過悠長假期，直至他遇到失戀流浪的何年希（陳法拉飾），令他提早結束假期回港，並加入Skylette航空再次飛翔，期間認識了機長顧夏陽（張智霖飾），兩人性格南轅北轍，亦琛內斂，夏陽張揚，二人先後跟到港投考飛行學員的年希發生感情瓜葛，加上亦琛擔任訓練機長考核夏陽，他們在事業和愛情上都有一番較量……
夏陽的妹妹夏晨（胡杏兒飾）為飛機維修員，因少年不快經歷對哥哥一直心懷怨憤。唐亦風（吳卓羲飾）發現夏晨酷似嫂嫂蘇怡，無法對她置諸不理，最終幫助兄妹和解。夏晨對他暗生愛意，他卻害怕勾起亦琛之痛而裹足不前……
副機長高志宏（馬國明飾）有兩個女朋友，難以取捨又不忍傷害，他與高級機艙事務長方芮嘉（江美儀飾）分享秘密成為知己，最後竟發生一夜情。本是港隊游泳選手的詹子麟（羅仲謙飾），為退役籌謀投考機師，卻愛上代友懷孕的凌卓芝（胡定欣飾）……隨着飛機的起落升降，繪成了一段段傷感、離別、喜悅與重逢的故事。
