許紹雄火化｜結緣《賭場風雲》歐陽震華憶往事哽咽 讚Benz「神一般存在」
歐陽震華扶靈送別數度哽咽
許紹雄今日出殯，由麥長青、苗僑偉、歐陽震華、阮兆祥、關禮傑、杜燕歌、羅樂林及曾偉明八位圈中好友負責扶靈送別。完成火化儀式後，歐陽震華接受訪問時數度哽咽，他透露許紹雄是他的大師兄，「佢係第一期訓練班，我係第十一期，早我十年。直至拍《賭場風雲》才正式合作，戲中講我、Benz、三哥係三個好兄弟，到今日我同三哥有份扶靈。」歐陽震華更感慨地說，剛才見到監製戚其義時，對方提到當年最開心就是看著他們三個拍《賭場風雲》，「但估唔到最後亦好似劇情一樣，佢走咗先。」
許紹雄演技神級令歐陽震華自覺無地自容
歐陽震華坦言，在拍《賭場風雲》之前，一直覺得自己作為主角可以獨當一面，但對戲時面對許紹雄的演技，他「簡直無地自容」。他讚許紹雄的演出是神級，「佢呢啲演技先係神，做乜都得，做乜都稱職，佢係百搭。」歐陽震華更與導演鍾樹佳討論時都認為很可惜，「呢個圈又少咗一位可令觀眾睇到五體投地嘅演員。只要有Benz雄嘅戲，部戲定好多。」說罷他雙手合十望向天空，「多謝Benz，俾咗咁多歡樂。」
視藝會足球隊結下深厚友誼
雖然拍戲以外兩人並不常見面，但歐陽震華透露多年前許紹雄有份成立視藝會，當時二人經常一起踢足球。「佢做會長係搞手，嗰時成日見面踢波，到個會無再搞，之後我哋喺一啲場合都有見面。」他說最近一次聚會是一年前一起吃飯。對於許紹雄患腎癌一事，歐陽震華稱事前完全不知情，「佢係一個唔想麻煩人嘅人，同我一樣，都唔鍾意麻煩到人。但佢心態上係開朗豁達，佢覺得個個人都會行呢條路，只係邊個上車同落車先。」
收到病重消息如晴天霹靂
歐陽震華透露，直至收到佘詩曼及黎芷珊短訊通知，才知道許紹雄病重。「收到call後，我即刻趕去醫院。收到嗰吓反應係『咁嚴重！』真係晴天霹靂。」他更提到看到許紹雄前幾日還與女兒開心打機的片段，感慨地說「唉，只能講，要珍惜眼前人。」歐陽震華最後寄語大家要珍惜現在，「日日都開開心心」，而許紹雄的演藝光輝將永遠留在世人心中回味。
