謝霆鋒爆神預言十幾年前已睇通AI世代 當年因1事被笑黐線如今全面應驗
謝霆鋒十幾年前神預言 掃描藝人樣貌被笑黐線
在「創意．娛樂．創業：鋒味創新融匯」主題講座上，謝霆鋒自爆一個十多年前被視為「黐線」的想法。他透露自己曾營運電腦特效公司，經常掃描自己的樣貌製作數碼版本。有次掃描時突然靈機一觸，跟經理人Mani說：「如果英皇娛樂十年後想繼續成功經營藝人管理部門，每個藝人都應該好似我咁樣scan自己個樣。」他更建議掃描不同年齡階段的藝人，例如20到30歲的謝霆鋒和容祖兒，然後將數碼形象進行數位授權。霆鋒解釋：「我相信十年後、十五年後，人類已經唔需要再親自出鏡去拍廣告、拍電影。你諗吓，我拍好多動作電影，嗰啲場面連買保險都有困難。如果可以用數碼形象代替，就解決咗好多問題。」
霆鋒感嘆當年被笑黐線 如今AI技術全面應驗
回想當年的反應，謝霆鋒忍不住笑說：「當然，十幾年前我講呢啲說話嘅時候，所有人都覺得我好黐線。」但他指出，時至今日大家已經歷NFT、Blockchain等概念洗禮，技術上完全做到。他認為現在只差一步：「關鍵就係要睇吓邊個願意做嗰隻白老鼠，第一個去嘗試呢個新方向。」言下之意，這個當年被視為天方夜譚的構想，隨時可能成為娛樂圈的未來趨勢。講座期間，坐在旁邊的Professor Ruby Yang突然拿出電話對準他拍照，並說：「呢個係Best View！」哄得全場大笑，就連霆鋒也忍不住笑起上來，氣氛相當輕鬆。
霆鋒爆推倒重來價值觀 挑戰努力工作傳統思維
謝霆鋒特別提到歌曲《推倒重來》並有感而發，指現今正處於文化、科技與人性的交匯點，AI發展速度指數級增長，幾乎每星期都有新突破，令所有事情都要「推倒重來」。更震撼的是，他觀察到就連價值觀也正在被挑戰：「以前大人教我哋要努力工作、努力讀書先有美好未來，但而家有人話工作只係其中一個options，甚至未來可能根本冇工做。咁我哋仲點解要咁努力工作？呢個就係價值觀被重新審視、改變嘅過程。」這番話在現場引起不少學生共鳴，畢竟面對AI衝擊，年輕一代對未來職場充滿不確定性。
霆鋒分享創意思維模式 音樂餐飲思路一脈相承
講座上，謝霆鋒透露自己在不同範疇的思考模式十分相似，尤其在創意方面。他舉例：「對我嚟講，寫歌嘅第一步係先收集音符；準備一道菜嘅話，就需要先收集食材，然後一步步諗點樣搭配。」他進一步解釋，第二步就是確定想做甚麼風格或菜系，「煮嘢食嘅話，你會問自己：『我想做福建菜定係泰菜？定係想做麻辣風味？』音樂方面就係揀邊種類型，你想做Heavy Metal、Rock定係Jazz？呢一步就好似揀定個大方向，之後從中再發揮。成個思維路徑都係一脈相承。」
霆鋒寄語年輕人擁抱AI 強調個人經驗最重要
面對AI時代的來臨，謝霆鋒最後寄語現場學生：「當然大家要去擁抱、接受同埋點樣利用AI呢個科技，其實講到尾最令你嘅難忘、最設身處地嘅嘢，就係要有自己嘅Experience。」他認為雖然AI可以協助創作和工作，但個人經驗和體驗仍然是最珍貴的資產。整場講座以對談形式進行，由香港大學未來媒體學院總監及教授（實務）楊紫燁跟霆鋒對談，後設有問答環節，讓霆鋒回答現場同學問題，氣氛熱烈。不少學生都對霆鋒的前瞻性思維和跨界成功經驗印象深刻，紛紛表示獲益良多。
