《神鵰》「金輪法王」印象難忘69歲張雷仲Keep到 ！

在1983年劇集《神鵰俠侶》飾演「金輪法王」而為人熟悉的張雷，對上一次亮相 TVB劇集已是 17 年前的《蕭十一郎》，今次相隔多年再度演出《逆天 2》，令觀眾大感驚喜。問到為何今次願意參與《逆天 2》，張雷受訪時說：

「監製同編審打電話畀我同我講故仔，我聽完之後覺得幾好玩，咁咪應承拍兩集囉！」

問到有否戲癮？他笑言：「其實出面一直都拍緊嘢，網劇、電影都有參與，梗係有戲癮啦，最好TVB 搵多啲我拍劇！」

賊王逃獄以為要「做世界」　原來為咗呢個人勁感動

星期三晚一集講到張雷逃獄的原因，作為賊王的他在金舗前徘徊，又找來了干擾器，大家都以為他想「食大茶飯」，但原來竟然有個暖心原因！當年出賣他的兄弟林偉今日已變成珠大王，眾人以為他是尋仇，點知他的目的是要「報恩」！

賊王石少波（張雷飾）逃獄後潛入「珠寶大王」羅進昇（林偉飾）兒子羅子恒（吳子冲飾）的婚禮，少波偷偷進入進昇的房間，揭露原來當年少波被進昇出賣才會鎯鐺入獄。正當以為少波逃獄是為了報仇之際，劇情卻出現反轉，原來與羅子恒結婚的孔千千（黃嘉雯飾）正是少波的親生女兒，少波逃獄的真正目的就是為了見證女兒出嫁！ 可是婚禮現場出現突發情況，有匪徒亂入婚禮搶劫珠寶，Nic Sir（黃智賢飾）率隊到現場與匪徒火拼，期間新娘千千慘遭匪徒挾持，之後千千成功擺脫匪徒，匪徒盛怒之下向着她開槍，臨急關頭少波跳出為千千擋子彈！少波隨即被送院急救，可惜少波失血過多藥石無靈，最終少波臨死前與女兒千千相認，無憾而終。

張雷分享保健之道：Keep 住做運動＋食足幾十年長齋

現年 69 歲的張雷武打演員出身，今次劇中有不少騷 Quali 場面，分別是街頭追逐和半裸舉啞鈴晒爆肌場口，不過對他來說卻是 Easy Job，張雷笑言：「呢個角色真係啱晒我，又要有啲年紀，又要有啲動作戲，又要有文戲。」張雷分享保健之道：

「平時唔使開工都會 Keep 住做運動，多數喺黃昏時候做，會先跑幾公里做熱身，之後玩吓啞鈴、掌上壓、Sit Up 咁練吓體能，有時亦會打吓沙包、打吓拳、打吓功夫咁，加加埋埋都差唔多 2 個鐘。食方面我都幾清淡，因為我食咗幾十年齋㗎喇。」

黃嘉雯著婚紗勁搶眼

除了張雷的演出賺人熱淚外，飾演其女兒的黃嘉雯（Carmaney）同樣搶眼，她與張雷在病床相認的場口，流出真摯的眼淚觸動人心。講到相關場口，Carmaney受訪時說：「喊戲真係好難，因為要好短時間進入到個角色，呢場喊戲好靠自己幻想，因為角色轉折好大，咁多年都冇見過爸爸，但係一見面爸爸就為咗我擋槍，所以都好多事前準備功夫，我會寫低自己角色嘅成長背景，同埋導演都好好，會喺我耳邊講咗好多故事畀我聽，令到我更加入戲。」

同場加映三大女神客串

Carmaney續指很開心與張雷合作：「今次第一次同張雷前輩合作，雖然係第一次見面，但好快就同佢做到戲劇嘅交流，喺手術室嗰場戲，我真係當咗佢係我爸爸，張雷前輩都話我哋喺劇中做父女，好似結咗緣咁！」至於問到結婚場口，Carmaney笑言：「雖然唔係第一次着婚紗拍劇，但今次個婚禮規模係好大型，劇組真係Book咗一個西貢嘅婚禮場地，仲好認真整晒人型紙牌，成個排場都好勁！」此外，婚禮場口有多位女神級人馬客串演出，分別有「六合彩女神」李芷晴、「宅男女神」鄧伊婷以及《愛．回家之開心速遞》「Bonnie」林凱恩，雖然三人戲份不多，但她們都以高貴晚裝索爆上陣，非常搶眼。

萬眾期待的劉佩玥（Moon）終於登場

「賊王逃獄案」完結後，劇情再有新推進，萬眾期待的劉佩玥（Moon）終於登場！上輯飾演Big Boss尤麗的Moon，今輯以新姿態重現大家眼前，甫出場便自稱是尤麗的胞妹夏悠倩，申請繼承尤麗的巨額遺產，惟她未能完全證明自己與尤麗的關係，被駁回申請；眼見計劃受阻，悠倩轉移利用媒體力量，上節目哭訴與尤麗的關係，遺產一事瞬間成為城中熱話。由於悠倩行徑相當古怪，到底她是否尤麗的親生妹妹？繼續密切留意《逆天奇案2》。

林夏薇緊身上衣加熱褲上陣扮流鶯

昨晚一集，身為女主角的薇薇亦有亮眼演出。剛回到 CIB 工作的阿 Wing 久休復出積極投入工作，多番變裝落區「踩線」搜集情報，除了化身眼鏡娘主婦外，還以緊身上衣加熱褲上陣扮流鶯，大晒唔鹹唔淡廣東話，場面搞笑。相關造型凸顯薇薇美好身段之餘，還盡顯薇薇白滑無敵長腿及招牌黃蜂腰，少女味爆標！