鄧一君一招激勵女兒自律讀書 生意失敗獲好友古天樂幫助
撰文：東方新地 圖片：一君士多FB、新傳媒圖片、微博、電視截圖、《尋秦記》預告片截圖
鄧一君為古天樂復出 客串電影《尋秦記》
鄧一君於2005年宣佈退出娛樂圈，上月公開的電影《尋秦記》預告，竟發現鄧一君影子。鄧一君在97年劇集《美味天王》首次和古天樂合作，翌年在《烈火雄心》中鄧一君飾演智障的劉海寶，而古天樂就飾演他的二哥劉海柏，一段兄弟情感動不少觀眾，而二人更因此劇而成為好友，之後再於《尋秦記》以及《刑事偵緝檔案IV》等劇集中合作。即使鄧一君於2005年退出娛樂圈轉投保險界，二人仍保持聯絡，情同兄弟。
鄧一君一招令女兒自律讀書：讓她自訂溫習時間表
鄧一君拍教育電視做童星出身，亦都做過大電影《記得……香蕉成熟時》系列男主角，曾自言性格內向怕應酬不，05年退出娛樂圈轉行投身保險業。鄧一君婚後育有一女，現年13歲，鄧一君曾接受傳媒訪問，指女兒性格非常主動積極，對學習有濃厚興趣。女兒小三時，鄧一君讓她為自己訂立溫習時間表，而自己讚過女兒此方法做得好後，她便每次考試都有實行此計劃。女兒會列明每日要溫習的科目，以及安排好每科溫習時間，非常有系統。
在為女兒訂立溫習時間表時，可以讓她自行分配溫習時間。家長們不需刻意去為小朋友訂立固定學習時間，反而可以讓小朋友按需要及自身喜好去制定溫習時間表。例如女兒自己希望在某一科考得更好，可以分配更多時間到相關科目，而非由父母主動做安排。讓小孩主動及按自己興趣訂立溫習時間表，就能培養到她對學習的喜好，長期便會令小朋友可以自律學習。
鄧一君：囡囡唔會扭買玩具，佢扭買練習
鄧一君女兒非常自律，尤其當女兒學會為自己訂立溫習時間表後，學習上甚少要父母擔心。女兒甚至會「扭買練習」，經常求自己買補充練習給她，而且普通練習已經不能滿足女兒，女兒會要求難度更高的練習，目的為挑戰自己！
鄧一君車仔麵檔勁蝕結業 好友古天樂曾到場支持
2019年，鄧一君先後在油麻地及尖沙咀開咗名為「一君士多」嘅車仔麵檔，估唔到好友古天樂得知朋友開食肆後，即親身去祝賀仲試食，網友大讚古仔念舊又有義氣！
當初鄧一君在油麻地開車仔麵檔，開業不久一君曾在訪問上被問到會否邀請好友古天樂試食，當時佢表示等生意穩定才通知及邀請好友，估唔到古仔得悉好友開店後主動致電恭喜，表示只要一有空會落舖頭幫襯！古仔一諾千金，親自去祝賀。兩兄弟難得見面，當然要合照啦！事後一君在facebook上載與古仔的合照，網民大讚古仔有情有義，除咗投資拍電影，又出錢幫助同業解困外，對朋友也很念舊！
童星入行 「香蕉仔」成名
鄧一君童星出身，9歲就入行拍攝港台節目及教育電視，93年、15歲時演出電影《記得……香蕉成熟時》一片成名，這部青春片當年深受不少後生仔的喜愛，接連拍了同系列電影。其後一君轉投無綫，拍過不少劇集。
當年哥哥張國榮對鄧一君十分欣賞，曾公開表示看好「雙古一鄧」三位新人，「雙古」是古天樂、古巨基，而「鄧」便是鄧一君。後來哥哥張國榮還曾客串鄧一君主演的《記得香蕉成熟時2》。張國榮說他分文不取客串《記得香蕉成熟時2》是為了提攜有潛質新人——也就是片中的鄧一君。
一君：「古仔好有義氣」
天生童顏令鄧一君戲路受局限，再加上性格被動，演出機會漸少。05年鄧一君決定淡出幕前轉行做保險，一直有傳好友古天樂是他首名顧客，對此一君表示不便多說，但指不時有跟古仔聯絡：「古仔係我一個好好嘅朋友，轉行前同轉行後佢都好支持我，佢係個好有義氣、好肯幫朋友、關心朋友嘅圈中人。」
而較早前鄧一君接受傳媒訪問，他直言不留戀演藝圈，不過倘若老友古天樂開到聲他揚言以二人交情、友情，必定義無反顧一口答應，他大讚古仔為人有情有義：「喺我事業最低潮嘅時候，佢鼓勵我、請我食飯、生活上幫我，又介紹機會、人際網絡畀我，你講得出嘅都有，好有義氣！」古仔係真正嘅「真 ‧ 男神」！
鄧一君在《倚天屠龍記》中，飾演少年版張無忌。
在《烈火雄心》中，他們飾演兩兄弟，飾演二哥劉海柏（古天樂飾）悉心照顧智障的弟弟劉海寶（鄧一君飾），劇情超感人。
網友讚古仔念舊又重情
網友大讚古仔好有心親自去舖頭，一君表示他也很多謝古仔。近日《尋秦記》電影版正式宣佈開拍，暫時只知林峯、宣萱、郭羨妮、滕麗名、雪兒等原班人馬將會演出，網友話希望一君都有份參演，皆因在當年鄧一君在《尋秦記》飾演李小超一角，雖然只是客串演出，但就起了關鍵性的作用，因為是他一手送古天樂飾演的項少龍返古代。
唔少人都話古仔現身車仔麵檔撐鄧一君好難得，大讚古天樂有情有義又念舊，仲出錢出力投資拍戲，搞好香港電影業，揚言支持古仔㖭！
轉行多年的鄧一君任職財務策劃師，也擁有工商管理學碩士，自言將來目標是可以升做區域經理。2016年，本刊影到一身行政look嘅鄧一君現身觀塘街頭，見佢邊行邊講電話傾公事，相信當時趕去見客傾生意！
而三年前他曾在中環摩天輪下的熟食市集，擺檔賣車仔麵，原來他兒時夢想是進軍飲食業。
鄧一君事事都親力親為打點食肆的大小事！
鄧一君05年和女友結婚，08年鄧太生咗囡囡鄧頌情（Kristen），古仔仲抱住情情影過合照，佢哋兩兄弟真的有常聯絡！
同場加映：古天樂集齊人拍《尋秦記》電影版
堪稱為TVB神劇嘅《尋秦記》由首播至今雖然相隔19年，但人氣依然好勁，就算TVB重播2次都仲係咁受大家歡迎。藝人兼電影公司老闆的古天樂（古仔）早前出席旗下的天下一電影巡禮，宣佈開拍電影版《尋秦記》，更親自集齊當年電視劇演員上陣，包括宣萱、林峯、雪兒、郭羨妮和滕麗名。其實早於2017年時，古天樂已買定版權準備開拍電影版，而今年正式開拍，仲集齊男女主角，真係好難得！而幾位女主角在台上輪流分享感受，宣萱話知道古仔話拍已經開心咗幾年，依家真係等到開拍呢日好興奮。久未耐面嘅雪兒話好多年沒見過呢班朋友，再見到感覺好Sweet，好開心。
而郭羨妮就話《尋秦記》係佢入行首部作品，所以當知道拍電影版覺得好興奮，佢仲不忘多謝古老闆。而滕麗名話畀古老闆嚇一嚇，皆因會打到七彩，所以希望古仔畀多啲錢請替身畀佢。
當年嘅四大女主角有宣萱、雪兒、郭羨妮和滕麗名，依家人齊演出，真係正如古仔所言「難過儲閃卡」。
古仔、宣萱和林峯一齊接受訪問，古仔披露故事大綱：「故事會發生在19年後（當年劇集是2000年播出，秦王都已經統一六國，之後發生咩事大家都唔知道，所以有好大創作空間。故事有穿越劇情所以有科幻元素。」不過古仔拒絕透露電影總投資多少，話呢啲係秘密。當年飾演嬴政嘅林峯則話：「聽過古仔講要拍這部戲好耐，每次見到佢都話劇本又改緊，總之好精彩。」眾人大賣關子！
古仔話：「當年套劇已經係2000年嘅事，好多人都想我哋拍番電影版，當初冇諗過用原班演員，但後來都覺得用原班演員陣容至好睇。」
網友：冇江華、KC唔算齊人！
不過網友話唔算齊人，事關獨欠飾演連晉、嫪毐嘅江華！劇中嘅江華一開始對主人巨鹿候好忠心，點知被項少龍誤廢右手後被逐出巨鹿候府，唯有投靠他人。途中佢遇到左手劍客嫪毐，經過一輪忍辱負重後終學成左手劍法，仲將真嘅嫪毐殺害，變成心狠心辣之人。
網友都話希望江華有份演，但之前江華就話套劇成為大家心目中嘅經典，已經好勁，所以唔明點解要翻拍，但從商業角度睇，大家都咁鍾意係有追看性嘅。不過佢近年都淡出幕前，睇怕難有機會睇佢嘅演出！
仲爭KC陶總管
其實唔止爭江華一個，仲有KC歐瑞偉當年飾演嘅陶總管，都有唔少網民話佢都係要角之一，唔可以冇佢份！
