金像獎2023｜楊詩敏最佳女配角不敵王菀之大嘆自己配角命 IG分享小確幸

金像獎2023｜楊詩敏為金像獎谷到盡 中門大開Deep V震撼夾奶見人

47歲嘅楊詩敏（蝦頭）舊年改變諧星嘅戲路，喺《正義迴廊》搏到盡飾演麥沛東嘅家姐，成功獲得「最佳女配角」提名殺入金像獎，憑着精湛嘅演技甚至被坊間認為係大熱門。楊詩敏對於金像獎極為重視，琴晚仲索性中門大開，身穿Deep V黑色晚禮服，激蕩奶現身會場，成為全場嘅討論焦點，網民更加認為視覺效果非常震撼，皆因以往蝦頭好少性感見人，多數封得好密實，今次突然解開「束縛」，完全令人猜想不到！

金像獎2023｜楊詩敏不敵王菀之大熱變慘敗 喊晒口見傳媒　

楊思敏喺《正義迴廊》法庭上嘅喊戲簡直完全令觀眾意想不到，加上《正義迴廊》全城勁讚嘅口碑，楊思敏一直被視為最佳女配角嘅大熱門，隨着琴晚頒獎禮賽果揭曉，正當宣布「最佳女配角」花落誰家時，頒獎嘉賓竟然讀出「王菀之」嘅名字宣布佢得獎，網民都洗版式留言指感到嘩然，竟然唔係自己心頭好楊思敏獲獎，王菀之可能都覺得賽果有啲爆冷，當時佢嘅反應都好愕然。

頒獎禮過後，美亞娛樂替公司旗下兩套電影《正義迴廊》、《風再起時》舉辦慶祝派對，楊思敏喺派對上見到傳媒都喊晒口，話見到朋友慰問感到好窩心，有朋友向佢直言：「無論點都好，蝦頭你都係我心目中嘅最佳女配角！」講到呢個位時，楊思敏幾乎雙眼通紅抹住眼淚，甚至直言自己只係配角命，一直都只能夠做女主角身邊最好嘅朋友，網民見到呢個場面，都替蝦頭感到非常痛心。

金像獎2023｜演藝學院派演員金像獎幾乎全軍覆沒

演藝學院向來都係唔少好戲之人出身地，其實睇返今年金像獎入圍名單，有唔少提名人都係演藝學院出身，當然唔少得備受讚賞嘅楊思敏，但其實仲有佢哋：陳詠燊、蘇玉華、張繼聰 、楊偉倫、麥沛東、何爵天、黃秋生。然而除咗何爵天憑《正義迴廊》勇奪最佳新晉導演外，原來眾人一致全軍覆沒，就算多次奪影帝嘅大師兄黃秋生，就算憑《白日青春》拎金馬影帝後，今次都一樣無面畀，戰況非常慘烈！

蝦頭長文回應「得失之間 所有都是最好的安排」

在頒獎結果公布一日後，蝦頭在IG發長文分享心情：

同《正義迴廊》團隊一齊經歷呢個金像獎奇幻旅程實在得到好多，
可以同我最喜愛嘅林公子一齊行紅地氈，得到佢嘅照顧同鼓勵，充滿愛💖
見到修哥佢大讚我靚，話唔認得邊個係蝦頭，聽聞蝦頭好鬼靚，叫我介紹佢識🤣🤣修哥真係永遠風趣幽默，恭喜你獲得終身成就大獎🎉

坐咗喺麥東細佬隔離，特別湧動，由細到大都係電視機睇頒獎禮，今次有機會坐第二行，而另外一邊同我坐嘅竟然係劉德華先生🤩 佢見到我話：哦原來係你！跟住俾咗一個擁抱我🥰 實在太幸福

奧斯卡影后楊紫瓊小姐就喺我面前鼓勵一聚嘅演員繼續堅持努力追夢，聽得我呢個女演員熱淚盈眶🥹 天天導演（編按：何爵天）先拔頭籌攞咗新晉導演，我都話睇好你㗎啦! 你唔攞我真係拉大隊走㗎…..好彩啫….你真係攞咗😅《正義迴廊》獲得最佳剪接非常高興大大力拍手！值得呀！

跟住就係…就係…就係…我發現姜…姜…姜姜濤坐咗喺我後邊距離我四個座位 O!!M!!G !!!!!!!! 經歷過幾個commercial break 之後我決定我要主動出擊同佢打個招呼話俾佢知我係一粒小小的姜

我冇諗過呢個舉動身邊嘅朋友咁鼓勵我，亦都幫我全程記錄，有唔同嘅角度，有唔同嘅捕捉，實在開心到癲咗！yeah ! 多謝上天嘅安排，令我可以最美嘅一刻同我心愛嘅人相遇🥰🥰🥰🥰🥰🥰🥰🥰 (你由我啦，俾我FF下啦)

至於最最最最最令我感動嘅係，你哋每一個留言，每一個message對我嘅祝福 欣賞同支持🥹🥹🥹🥹🥹
失落咗一個獎項，反而令我明白我真正”得到” 嘅係大家對我嘅肯定
實在太寶貴 最有價值 感受到滿滿嘅愛💖🍀
唔好唔記得唐文珊帶咗俾我其他民選女配角嘅獎項，分分鐘你都有份投票俾我，所以多謝你哋每一個🥰🥰🥰🥰

楊詩敏舞台劇諧星出身 曾加入無綫不見起色　

楊詩敏早年演藝學院畢業後，一直集中舞台劇演出，曾經短暫任職小學戲劇文憑教師，但係2006年打後回復自由身。楊思敏曾經獲得詹瑞文垂青，同埋經常喺葉念琛執導嘅電影客串小角色，但係講到蝦頭早年嘅演出，最為人熟悉莫過於是舞台劇《潮性辦公室》嘅搞鬼演出，尤其係色誘送水男一幕嘅經典對白：「哥哥仔，你啲筆筆冇晒汁汁！」

隨後楊詩敏喺2014年加入無綫電視成為基本藝人，但依然得唔到主角嘅名銜，喺不同劇集雖然露面率頗高，但「配角命」依然！諷刺的是，蝦頭曾於節目《Sunday扮嘢王》扮演加大碼版王菀之！這樣的日子維持了數年，楊思敏終於在2021年電視劇《愛美麗狂想曲》播完後，把心一橫決定離巢，展開新生活接拍咗《正義迴廊》，一改以往只做諧星派膠嘅形象，化身喊得又演得嘅民選「最佳女配角」，開始為人所記。