【救人英雄】馬德鐘仔仔馬在驤 騷肌做衝浪救援員

撰文：Kayla｜圖片來源：馬德鐘微博

昨日馬德鐘喺Facebook同大家分享幾張相片，指仔仔馬在驤最近成功考取衝浪救援員資格，作為爸爸當然感到相當驕傲：「恭喜小在哥（馬在驤）成為Bondi Beach衝浪救援員！成為真正的男人是能夠拯救別人之餘，同時要懂得保護自己！」

現年20歲嘅馬在驤自細就學游水，係一位游泳健將，時常代表香港出賽。據了解，馬在驤舊年去澳洲悉尼升學，喺課餘時間就報讀救援員相關課程，最後憑努力成功考到牌，真係叻仔！

Bondi Beach係悉尼著名沙灘，亦係衝浪聖地，深受當地人同遊客歡迎。澳洲電視台曾拍攝一套真人騷，記錄Bondi Beach衝浪救援員辛苦嘅一日，令人知道要做好依份工真係一啲都唔易，不過相信絕對難唔到馬在驤嘅！

馬在驤入行簽約邵氏

馬德鐘同老婆張筱蘭於1993年結婚，二人育有一子、今年21歲馬在驤Xiang。本身高185cm嘅馬德鐘，囝囝比佢仲要高，足足190cm，同爸爸一樣擁有Model身型，身型弗到不得了！加上馬在驤遺傳晒爸爸嘅高大靚仔外型同媽媽嘅內涵，簡直係新一代男神！

依家喺澳洲修讀機械工程嘅馬在驤，上年出席活動時曾透露，有意晉身演藝圈，雖坦言對幕前工作感興趣嘅佢亦透露父母俾好大自由度佢，甚少限制佢嘅決定，同時剛升讀大學時亦表示暫時會以學業為先。不過近日發現，馬在驤早前就已經簽約邵氏兄弟，而官方網站藝人資料到都已經有馬在驤嘅資料，睇嚟已經正式入行，仲同馬德鐘同一間公司！

不過可能暫時邵氏兄弟嘅官方網站未更新得切，所以即使喺「新人藝人」一欄有馬在驤嘅相，但相關資料就唔多，只係顯示佢識國語、粵語和英語三種語言外，就連出生日期都冇。

游泳健將揚威悉尼 勇奪8金

馬在驤身形高挑而且有陽光外表，加上有做運動嘅習慣，細細個就已經出晒名係游泳健將，喺多個學界比賽中取得優異成績，包括曾經代表所讀嘅國際學校於澳州悉尼奪得8面個人金牌及全場總冠軍。

另外，馬在驤又代表南華會泳隊喺第60屆體育節長池游泳計時賽中勇奪50米自由泳銀牌，並創下個人最佳時間。

擔任模特兒到法國行騷

馬在驤擁有模特兒身形，其實佢喺19歲個時就已經有幫國際著名時裝品牌中行時裝騷，獲邀擔任模特兒行騷。當時仲未正式入行嘅馬在驤，喺大型舞台上毫不怯場，超有做Model媽媽張筱蘭嘅風範！

網民反應兩極

雖然演藝圈多咗個星二代入行又多咗個新面孔，不過有唔少網友睇落唔多like對呢位星二代，皆因好多人都依然覺得馬德鐘比囝囝馬在驤靚仔！

另一方面，亦有網友留言指馬在驤雖然依家先二字頭，但個樣就睇落老過老竇馬神，總知就不斷狂插馬神囝囝！

視帝爸爸馬德鐘

馬德鐘上年憑《跳躍生命線》「麥在田」一角終於首奪視帝，而且更成功同邵氏兄弟簽約，強勢加盟！去年馬德鐘得獎時說：「無諗到，好開心，第一次攞獎，令我感受到咩係吃過苦先知甜嘅美好。多謝TVB，咁多位朋友，多謝珍姐，無你無《跳躍生命線》，你同我講每一句說話我都會記住，以前我年少無知唔知。多謝樂小姐，不停鼓勵我，多謝《跳躍生命線》監製、編審同埋所以前後嘅工作人員。多謝所有幫助過我嘅人，前輩，多謝我屋企人，我相信爸爸喺天上睇到，媽媽喺電視前睇到，多謝仔仔，多謝我老婆，做藝人太太真係唔容易，你照顧得我同家庭好好！」

馬德鐘老婆 晒陳年拍拖照放閃

早前馬神同太太張筱蘭結婚25周年嘅大日子，馬太喺微博上載咗多張二人由拍拖到結婚嘅相片，並留言話：「由12歲開始認識你，到今天與你結婚步入4份1世紀，感恩一直同行。人生就是要將今天活得比昨天好。銀婚快樂！」

而馬德鐘亦有轉載太太嘅發文，仲留言回應番老婆：「必須要每天都過得比昨天好。」好恩愛啊！