黃翠如街市賣魚憶父親健康低潮辛酸失控爆喊！ 黃爸爸家書全文首曝光

黃翠如街市劏魚雞手鴨腳 老公蕭正楠探班更搶鏡

向來以「地獄廚神」聞名的黃翠如，今次到魚檔體驗爸爸昔日工作，果然在劏魚一環已遇上極大挑戰，顯得雞手鴨腳，更被老闆娘直接評價：「睇你揸刀應該都好少煮飯喇」，讓翠如只能報以一個尷尬又不失禮貌的微笑。其後老公蕭正楠帶同愛心便當驚喜探班，更即場大展「叫賣能力」，功架十足，風頭完全蓋過太太，場面相當搞笑。不過，當翠如靜下來感受父親昔日的工作環境時，情緒開始湧現，氣氛亦隨之逆轉。

黃翠如憶父爆喊 蕭正楠一句話盡顯暖男本色

黃翠如在節目中談及父親昔日在魚檔的辛勞，感恩父親為家庭默默付出，一時感觸落淚，更哽咽表示：「以前我爸爸喺魚檔，每賣一條魚都要好努力，養活我哋一家到底係賣咗幾多幾多條魚？」情緒一度崩潰。全程陪伴在側的蕭正楠見狀，立即溫柔地安撫愛妻：「唔好喊喇」，盡顯暖男本色。蕭正楠更透露，節目其中一個任務是將外父的手寫信交給翠如，翠如解釋這是黃家的傳統：「每次屋企有啲經歷，爸爸都會寫封信，我哋叫做家書，我每次睇都好感動。」

黃爸爸家書全文首曝光 「天使賣魚小妹妹」名字由來勁有愛

黃爸爸的家書內容真摯，他先是關心女兒體驗賣魚辛不辛苦，更道出當年為了讓五個女兒有安穩生活，再辛苦也願意頂下去。信中更首次揭開「翠如」名字的由來：「我改呢個名嘅寓意就係碧翠如茵，就係希望你能夠生活喺大自然嘅韻律當中，自由自在，心曠神怡。」黃爸爸又憶述翠如小四時曾到魚檔幫忙，形容她是「天使賣魚小妹妹」，大讚五姊妹都十分懂事，是他最驕傲自豪的事，字裡行間充滿父愛。

一張雪糕合照藏洋蔥 翠如憶述爸爸走過健康難關

除了家書，蕭正楠還送上一張黃翠如與爸爸吃雪糕的合照，背後原來藏著感人故事。翠如透露，當年爸爸健康曾出現狀況，令家人非常擔心，幸好最後安然無恙，於是她便請爸爸吃雪糕慶祝康復，並拍下這張珍貴合照，記錄了父女倆走過難關的時刻。不過，翠如隨即搞笑爆料，指自從孫仔「蕭哈哈」出世後，爸爸的態度180度轉變，由以往的「慈愛型」變成「鞭策型」，更會對她說：「啱架，賺多啲錢畀你個仔吖嘛。」

翠如爸爸家書全文：

「囡囡，你今日要去街市體驗賣魚生活，其實爸爸就好擔心，辛唔辛苦（翠如：辛苦）、有冇受傷呀（翠如：冇）？有冇賣到爸爸以前經常帶返屋企、你最鍾意你最喜愛食嘅大眼雞魚同埋白鯧魚呀？（翠如：依家都鍾意）」

「其實一日喺魚檔嘅時間真係好長好長架，當初爸爸入行，其實經常都受到刀傷，有啲凍傷啦、勞損啦，其實街市賣魚係最辛苦嘅行業之一。咁點解明知道辛苦都要堅持去做呢？就係因為爸爸冇其他工作經驗，只要能夠畀到你哋姊妹過啲比較安穩嘅生活，再辛苦，爸爸都可以頂落去。（翠如：我知）」

「囡囡，好多謝你呀，以前爸爸一年可能都冇好多時間可以陪喺你身邊啦，但係你自細都十分懂事，你哋姊妹會互相照顧，仲會幫媽咪手做家務，勤力讀書，五個女都可以考到大學，呢個係爸爸覺得最驕傲、最自豪嘅一件事。（翠如：我都知架喇，我老豆一生嘅願望就係我哋讀大學就夠喇）所以佢話任何嘅辛苦都係值得嘅。」

「翠如，點解會改呢個名呢？我改呢個名嘅寓意就係碧翠如茵，就係希望你能夠生活喺大自然嘅韻律當中，自由自在，心曠神怡。（翠如係咁笑）」

「仲記得你中六嘅時候攞到獎學金去英國，第一次飛咁遠嘅地方，做爸爸嘅好擔心，但更多嘅係開心。因為見到自己個女長大咗，之後你仲實現咗自己嘅夢想，可以喺香港飛到去世界各地，主播、主持、演員，亦都由一個女兒變咗做一個母親嘅。（翠如又咁係笑）」

「囡囡，你仲記唔記得你讀小四嘅嗰年暑假，你想知道賣魚幾辛苦，所以跟咗爸爸去檔口學習，你請求爸爸，爸爸其實又驚又喜嘅，見到你信心滿滿就幫你著上咗個水鞋、膠手套、圍裙，天使賣魚小妹妹就出現喺你爸爸嘅檔口度。你好叻呀，除咗負責將啲魚入袋、（翠如：玩咗一陣咋，主要係為咗嗰啲散銀）仲刮魚麟，佢話你係好認真嘅，所以爸爸嗰日都劏咗兩條你最鍾意食嘅大眼雞、畀你帶返屋企作為獎勵。」

「你嘅寶貝孩兒，我嘅愛孫，好感恩佢嚟到我哋嘅家庭，帶畀我哋好多嘅喜悅，爸爸相信你一定會用心去愛護呢個兒子，用心去培養佢，令到佢健康快樂咁去成長。由爸媽到你倆，希望孫仔可以承傳到公公同埋媽媽嘅堅毅、積極，同時可以保持樂觀、開心，佢祝願你哋健健康康、快快樂樂。爸爸字」