端午節｜媽媽愛包糭 一日兩餐＋食足一個月 網民提醒要珍惜｜附消滯貼士
端午節｜每年食足一個月糭
有網民以「每年都要食足一個月糭」為題，在香港討論區上發文，大呻年年食糭食足一個月。事源媽媽同婆婆每年端午節都有包糭習慣，今年媽媽整親手，本以為可以脫離苦海，點知：
「有少少開心諗住終於唔使喺屋企見到糭山，點知原來係我太年輕……」
兩老轉而去買一大堆現成糭，依家屋企已經有座山係度，每個牌子都入貨了幾個口味，樓主搞笑表示：「堆堆吓又有座山。」
雖然今年有不同口味可以選擇，但仍然每天一日兩餐都食糭，年年都要食足一個月，情況相當誇張。樓主表示有糭包同食糭都唔係壞事，但咁搞法做幾多Gym都冇用。
網民的反應和樓主不同，大家都表示有自家糭好正，要樓主好好珍惜。不過都有網民提醒食咁多糉好傷胃，建議食唔哂可以分享俾朋友同事，唔係個個人都有自家糉可以嘆。
更有網民分享回憶：
「以前都會抱怨老媽過時過節整的應節食品太多……今年開始想再食她老人家親手整的糉已經冇可能，我情願可以食足一個月。」
「我想食嫲嫲整既年糕、蘿蔔糕、糉都冇機會再食了，我明白食足一個月又真係好多，可以同家人好好溝通下。請好好珍惜現在擁有嘅時光。」
端午節｜3款消滯茶推介
節日大吃大喝後總會胃脹飽滯，體重上升，以下為何慧潔中醫師為大家介紹的3款消滯茶，可以為大家解消滯：
消滯減肥茶1. 山楂茶
煮法：山楂15克泡熱水500毫升，15分鐘即成。
功效：適用於食肉過多的肥胖、消化不良。 中醫認為山楂有消積化滯、化瘀消脂作用， 對平時肉多菜少的人士有減肥幫助。但山楂味酸，胃酸過多者不宜。
消滯減肥茶2. 決明子大麥茶
煮法：決明子10克、麥芽10克， 泡熱水500毫升15分鐘即成。
功效：決明子有清熱明目，通便減肥作用。麥芽則能消食健胃。兩者配合， 對容易熱氣、眼乾、食滯胃脹、 大便不通的人士就可以用這款茶減肚腩，消積滯。
消滯減肥茶3. 菊花普洱茶
煮法：菊花6克、普洱茶包1-2個，泡熱水500毫升， 5分鐘即成。
功效：普洱茶能消滯助消化，菊花清熱明目， 所以不少人去茶樓都愛點菊普茶，中和下茶樓點心的油膩。
更多詳情：8款消滯減肥茶及湯水推介
