周柏豪當年不理粉絲反對娶老婆求婚戒指險被海關扣查

Oct 19 2020

周柏豪外表有型有款，而且以演唱情歌為主，從出道至今俘虜不少女粉絲，甚至有粉絲以「周太」自稱，希望成為他的老婆。不過周柏豪對女朋友朱敏君Stephanie專心一意，16年同Stephanie結婚，上年誕下女兒周芯悅，榮升人父。周柏豪是娛樂圈中數一數二的好老公、好爸爸，近日他接受電台節目訪問時罕有大爆以前捱苦日子，並指全靠Stephanie不離不棄，他才可以度過低谷。

撰文：Clara | 資料來源：電台節目《舊日的足跡》| 圖片來源：周柏豪instagram、東方新地

周柏豪感激愛妻不離不棄

近日，一向少談家庭事的周柏豪接受車淑梅訪問，於電台節目《舊日的足跡》大方談到愛妻與囡囡。入行初期，周柏豪突然滿面暗瘡，令模特兒的工作停滯不前，收入不穩，女朋友Stephanie從無介意過，當時他早就認定對方是走一輩子的人：「我哋冇資格豪食、豪飲、豪住，初期好多時都係由佢埋單，佢從來唔介意，所以如果歌迷唔接受我結婚，我唔會在乎冇咗份工，因為我好愛呢個女人。」

周柏豪為了保護Stephanie，一直都低調感情事，連求婚和結婚都選擇在外地進行：「十年來我冇公開拖過她隻手，我們只是買外賣返屋企食，因為咁樣就會好安全…2016年帶住隻求婚戒指去富士山向佢求婚，我偷咗佢嘅戒指去度size。最驚過關嘅時候畀人查出，如果申報又怕畀佢發現，於是我話不如我哋兩個分開行。海關問我隻戒指，我話用來求婚，佢冇沒收，可能係祝福我。」

周柏豪欲彌補對愛妻的遺憾

如今已婚4年的周柏豪坦言，希望彌補對愛妻的遺憾：「如果人生可以返轉頭，我希望填補一個遺憾，就係因為我哋怕結婚消息通天，我冇喺佢試婚紗嘅時候陪住佢，為佢拉拉鏈，再聽佢問我『我靚唔靚？』，然後我再答佢『你係最靚』呢個環節……不過我哋已經結婚四年喇，出年第五年，我會做一件事，就係抱住囡囡陪太太再穿婚紗，同佢拉拉鏈，補番同佢講嗰句佢係最靚嘅！」

為妻女拒應酬被封暖男爸爸

現時周柏豪與愛妻的「愛情結晶品」周芯悅已經10個月大，他指疫情下與囡囡相處時間增加，是千載難逢的緣份，他表示自己會拒絕不必要的應酬，回家照顧妻女，被主持車淑梅大讚兼封做暖男爸爸。另外，周柏豪指囡囡在新作品《劫後餘生》MV中亮相，笑言自己「重金禮聘」囡囡：「佢嘅報酬係兩粒餅仔，呢個係我同囡囡嘅一個記錄。MV係喺我家屋企拍攝，全屋都係人，佢好興奮冇瞓晏覺。依家我唔會應酬，完成外面嘅工作第一時間會返屋企湊女，我希望再生多兩個，湊夠一個好字。」最後，周柏豪表明會繼續努力工作，笑言如果外間認為「天王」是娛樂圈最高級別，希望自己能夠達到這個級別。