10大拜年最怕問題 親戚問：幾時生多個 阿仔考第幾？

撰文：Sunday Kiss｜圖片：SHUTTERSTOCK

10大拜年最怕的親戚問題

又到農曆新年要去親戚度拜年，但係拜年嘅時候親戚經常會問埋啲刁難嘅問題，面對親戚嘅問題應該要點面對？

拜年最怕問題1. 幾時生多個？

「幾時生多個？」榮登最怕親戚問嘅問題第一位，親戚永遠見你唔係大緊肚就要問你幾時生多個小朋友，但可能你結婚先啱啱唔夠一星期，又或者上一胎先啱啱出世無耐仲坐月中，邊有可能咁快生多個？

拜年最怕問題2.你/老公人工幾多？

親戚好鍾意問人工幾多，如果係做緊家庭主婦嘅就問你老公人工幾多。問完人工幾多就問夠唔夠用，夠唔夠供樓生活等等。

拜年最怕問題3. 加咗幾多人工？

年年去拜年同親戚食飯總有一班人鍾意講錢嘅話題，問完人工幾多跟住就順勢問埋今年加咗幾多人工，加得少就會嫌三嫌四，講到好似係加俾佢哋咁，加得多又會話點解咁多無理由。

拜年最怕問題4.幾時買樓？

依個問題又係親戚一定會問嘅問題，成日問幾時買樓，講到買樓好容易咁。香港人買樓談何容易？要死慳死捱，餐餐捱麵包、唔去旅行、無娛樂先有機會比到首期，更何況仲要供樓做按揭呢呢？

拜年最怕問題5. 你/老公做緊咩職位？

難得見面，仲要同班親戚解釋自己份工做咩嘅，工作性質係點全部要交代，仲慘過見工。

拜年最怕問題6.囡囡/囝囝考第幾名？

小朋友讀緊書嘅爸爸媽媽拜年實會聽到依條問題！其實間間學校準則唔同，答你考第幾都冇用架啦。仲有一部份親戚鍾意叫你搵佢自己年紀比較大嘅小朋友幫你囝囝/囡囡補習，拒絕又唔好意思！

拜年最怕問題7.囡囡/囝囝讀緊邊間學校？

只要屋企嘅小朋友係讀緊書，就會有親戚向你打探你個女/仔讀邊間，跟住就對你個仔/女間學校評頭品足，又話校風唔夠好，又話學費貴⋯⋯

拜年最怕問題8.囡囡/囝囝有冇上咩興趣班？

喺香港長大嘅小朋友彷彿無一技傍身，就會無辦法生存落去，親戚好鍾意叫小朋友表演下，識彈琴就表現彈琴，唱歌就唱歌，搞到小朋友好似表演賣藝咁。小朋友鍾意就話，如果小朋友無上興趣班嘅，又會比親戚有閒話！

拜年最怕問題9. 你囝囝/囡囡點解咁奀皮？

小朋友比較活潑，難得出嚟拜年可能會周圍走周圍玩。稍微活潑啲就比親戚問囝囝/囡囡點解咁奀皮咁百厭，唔通你想我小朋友唔識郁咩！

拜年最怕問題10.你/你老公/囝囝/囡囡係咪肥咗/瘦咗？

親戚成日會對人評頭品足，其實差唔多一年先見一次，身形有變好正常啫！