小朋友都啱飲 5大易入口 排毒通便 湯水

編輯：Sunday Kiss
撰文：Blogger小小豬的成長日誌
圖片：Blogger小小豬的成長日誌

1.清熱滋潤 雪蓮果粟米無花果瘦肉湯

其實今次買雪蓮果係本身當係一種生果食，因為山藥店店主話雪蓮果當生果食係好有抗養化，對皮膚好好添。

聽佢講完我都有上網睇下資料，原來佢係好有藥用價值同埋保健功效，具有潤腸通便，促進消化，調理腸胃；調理血液，清除高血脂，降低血糖、血脂、血壓，有效抑制膽固醇和糖尿病；消涼退火，清熱解毒，祛斑除痘；增強機體免疫、防癌；有消炎利尿等功效~

不過老公就唔太想試下當生果嘅味道，咁大粒我一個人又食唔晒，所以最好都係用嚟煲湯，咁三口子就齊齊有得著。見屋企仲有一粒粟米，所以就簡簡單單煲過既清熱又滋潤嘅雪蓮果粟米無花果瘦肉湯啦！

材料：
雪蓮果一個、粟米一條、紅蘿蔔一條、無花果五粒、瘦肉約$30及南北杏一湯匙~

雪蓮果去皮切塊~

瘦肉洗淨汆水；粟米及紅蘿蔔去皮切塊；無花果及南北杏浸洗一陣~

將3L水煲滾，然後放入所有材料~

待水再滾後用大火加蓋煲約15分鐘~

之後轉慢火加蓋煲多1小時~

最後加鹽調味就飲得，啖湯真係超級清甜，唔止小小豬鐘意飲，就連平日要求多多嘅老公都讚好飲，仲叫我下次可以再ENCORE添~

煲湯最開心都係見到依啲場面，快快手清晒成煲湯，咁先有動力繼續煲落去嘛！

排毒養顏 猴頭菇螺片滋補湯
經常大吃大喝，係時候要食返清啲，等腸胃回復健康。所以我就煲左既可以既滋補又清腸胃嘅 猴頭菇螺片滋補湯 俾兩位老細飲啦！猴頭菇益腸和胃；螺片滋陰養肝，再加埋黨參、北芪同圓肉一齊煲，對腸胃好之餘，對滋補養陰及潤膚養顏有顯著幫助呀。

材料：
我就係三人份量，煲出嚟約有六至七碗左右。

材料就需要：瘦肉約$40；猴頭菇、螺片、黨參、北芪、圓肉，你同藥材鋪店員講大約幾多人飲，佢就會幫你執份量啦~

做法：
猴頭菇及螺片先浸至軟身(大約兩小時左右)，然後就切成小塊~

瘦肉洗淨汆水備用，其餘嘅藥材就浸洗一陣~

將2L清水燒熱，然後放入所有材料~

待水再滾後轉慢火煲一個半小時~

最後加少少鹽就可以飲得啦~

之前我都有煲過猴頭菇湯，不過就只限飲佢啲湯，真係冇諗過係可以食。原來佢嘅味道又真係唔錯，而且仲係好有益，食左猴頭菇之後就好似食左個清道夫，幫你掃走晒啲唔健康嘅嘢排出體外呀~

雖然都係用藥材嚟煲，不過完全冇嗰啲藥材品，入口反而係甜甜地，我家兩位老細都讚好飲呀！

哈哈哈…佢地鐘意就好，咁我就可以多啲煲，清下體內嘅唔健康嘅嘢，又可以滋潤一下，飲多啲….對身體都好啲呀！

3.入口清甜 心內美南瓜牛蒡湯
早幾日行過街市茶檔，店員姐姐推介我買心內美嚟煲湯，佢仲即場教我買埋其他材料，咁就可以煲一個既可以抗氧化又可以排毒嘅靚湯。其實我當時正在考慮緊今晚煲乜好，見佢如此落力推介，咁我就聽佢話，煲依個 心內美南瓜牛蒡湯 啦~
“心內美” 其實就即係紫蘿蔔，含花青素，係一種天然抗氧化劑，而且含熱量較少纖維素較多，吃後易產生飽足感，有助減肥，常吃可降血脂，軟化血管，穩定血壓，預防冠心病，動脈硬化，膽石等疾病。

牛蒡可刺激大腸蠕動，有助排出體內的毒素，同時亦有助降血糖、降尿酸、降血壓、降膽固醇、保肝、消炎、抗菌與抗腫瘤。

南瓜就營養成份很高，係維他命A嘅優質來源，有防止糖尿病、高血壓以及肝臟和腎臟的病變。(網上資料)

材料
心內美、南瓜1/4個、紅蘿蔔2條、粟米1條、牛蒡1條、蜜棗3粒及瘦肉約$30~

“心內美”就好似一個肥啫啫白蘿蔔

切開就有好靚嘅紫色，唔怪之得叫心內美啦~

做法：
將心內美去皮切塊~

牛蒡去皮切片，其實店員姐姐話可以唔去皮煲，不過我就唔太接受那一種外層充滿泥感覺，覺得好似洗極都唔乾淨，所以我都係去皮嚟煲啦~

南瓜去皮切塊

粟米及紅蘿蔔去皮切塊~

瘦肉汆水備用；蜜棗洗乾淨~

煲內放約3L水，待煲滾後加入所有材料~

先用大火加蓋煲約10分鐘~

然後轉慢火加蓋煲多2小時~

最後加鹽調味就可以飲得~

始終都係第一次煲心內美，所以初時都真係有點擔心，不過好在味道都唔錯，入口清清甜甜，就好似飲緊蘿蔔湯，所以我家兩位老細都鐘意飲呀！

4.熱利賓納的味道 增強免疫力 紅菜頭 杞子紫蘿蔔湯
話說我早前冇意中係九龍地城買到好新鮮嘅有機紅菜頭同埋紫蘿蔔，店員姐姐仲教我加埋粟米同杞子一齊煲，就可以有補肝明目、 增強免疫力 、仲話可以排毒防癌添。其實我之前都煲過好幾次 紅菜頭 湯，不過紫蘿蔔就係第一次接觸，見姐姐話得咁厲害，而且兩樣都好新鮮又唔貴，所以就買齊材料試下煲啦~

材料：
紅菜頭2個(如果大嘅1個都可以)、紫蘿蔔2條、粟米1條、杞子約1湯匙及薑2片~

紅菜頭嘅根同埋葉都含有好豐富嘅葉酸、鐵、纖維及其他營養，療效包括抗癌、補血、消化不良、虛弱怕冷、補腦及全面提高抗病能力，協助肝臟細胞再生，促進腸胃蠕動，令骨骼強健，並可預防心血管病，有助降低膽固醇(網上資料)~

紫蘿蔔嘅紫色就係來自天然嘅「花青素」，而花青素就可以對增強免疫系統能力、促進視網膜細胞再生，有助視力、增強記憶力、抗氧化，可預防有關自由基引起的疾病，包括癌症及增加血管彈性，保護血管內壁，有助血液循環，對身體各器宫和系統皆有益處(網上資料)~

做法：
先將紅菜頭洗淨，然後去皮及切片。佢嘅莖葉都好有用，所以洗淨切段後加埋入去一齊煲呀~

紫蘿蔔去皮切塊；粟米去皮切塊~

杞子洗淨；薑片去皮之後拍鬆，等煲嘅時候可以出味啲~

煲內放約3L水，然後隨水加入薑片~

用大火將水煲滾後，將其餘材料加入煲內(杞子除外)~

待水再滾後用大火加蓋煲約15分鐘，之後轉慢火加蓋煲多30分鐘~

依個時候就可以加入杞子~

繼續用慢火加蓋煲多15-20分鐘~

最後落少少鹽就飲得啦~

小小豬之前都有飲過好幾次紅菜頭，所以佢都一定唔會抗拒，仲幫紅菜頭改左個名叫做熱利賓納添…哈哈哈！

今次加埋紫蘿蔔一齊煲，其實個味又同之前嗰啲分別唔大，一樣都係好清甜，老公都讚好飲，仲叫我定期煲依個俾佢飲，等佢可以排毒，等身體可以健康啲呀！(哈哈哈…佢咁賞面我就當然一定好樂意配合啦！)

5.排毒保健 栗子牛蒡 豬骨湯

牛蒡我就鐘意用嚟焗茶，係煮食群經見有媽媽介紹用新鮮牛蒡用嚟煲湯，見好似幾好味之餘又唔係好難煲，所以又嚟試下煲栗子牛篣 豬骨湯 啦！

其實牛蒡功效都好似幾廣，可以防癌、排毒、降低膽固醇，仲可以清理血液入面嘅垃圾，促使體內細胞的新陳代謝，防止老化，美肌及消除色斑及黑褐斑等等。而栗子就有養胃健脾及補腎壯腰，所以兩者加埋一齊煲就係可以排毒保健啦！

由於我地有八個人飲，所以材料都係多啲啲，中型牛篣2條、栗子1磅、紅蘿蔔2條、粟米2支、蜜棗4-5粒、豬骨約$60~

做法：

牛篣去皮切件~

紅蘿蔔及粟米去皮洗淨，切塊~

栗子洗乾淨；蜜棗浸洗一陣~

豬骨洗淨汆水備用~

煲內放約5L水，待水滾後再放入其他材料~

待再次滾起時，先繼續用大火加蓋煲約30分鐘~

之後再轉慢火加蓋煲2小時~

加入少少鹽調味，就可以飲啦~

第一次煲牛篣又真係覺得唔錯，本身牛篣就唔算濃味嘅材料啖，不過加埋栗子一齊煲就顯得成啖湯都好濃郁，而且飲落仲帶有少少甜味，所以就連小小豬都好鐘意飲。

牛篣咁有益又好飲，所以有時間都可以煲多啲，等兩位老細保健下都好呀！