布甸狗主題餐廳

最新 布甸狗主題餐廳 食品健康至上

熱話

廣告

今晚一家三口去食布甸狗主題餐廳, SY說:「爸爸! 銅鑼灣唔係幾年前已經有布布餐廳咩?」

布甸狗最新主題餐廳 食品健康至上

我答:「今次係同鴻福堂聯乘喎, 唔知有冇布甸狗24味呢?」(SY: 吓? 千祈唔好有呀…咁苦)

我知差不多每個地鐵站都有鴻福堂分店, 但原來九龍灣的布甸狗主題餐廳有堂食服務, 店內有3張枱, 一共12個座位.

未走入店, 布甸狗迷SY已經興奮大叫:「嘩! 好多布布呀! 好得意呀…」

SY:「爸爸…我想食布甸狗奶皇包 $8/個 $15/2個」, 店員說:「唔好意思, 奶皇包要等到12月中先有供應」

主題涼茶店有5款布布食品, 沒有奶皇包, 那就同時試其餘4款吧!

布甸狗魚片併燒賣套餐 $15, 我:「原來燒賣無布甸狗頭喎…」, SY :「燒賣咁細粒, 梗係印唔到布布頭上去啦」

SY一口吃了魚片說:「哎呀! 我以為係玉子喎, D魚蛋煙煙韌韌又幾好食喎」

蟹皇南瓜素翅羹 $53, 店員會預先加熱給你, 所以冬天也可以放心的暖暖飲熱湯…
SY:「真係好南瓜, 同好多一條條D咩嚟架?」

我:「係素翅嚟, 仲有紅蘿蔔粒, 夠晒味, 好彩唔會太竭, 因為我唔鍾意飲羹, 好彩E包唔係」

粟米北海道奶露 $28, SY:「真係好奶, 同埋好濃粟米味」

我:「係喎, 粟米好濃, 有飲糖水感覺, 幾好飲喎, 但點解無粟米粒粒呢? 係咪沉咗底?」

SY:「底無架, 佢係粟米精華啦, 打溶咗入D奶度」(你點會知呀? 不過好飲又健康就係真)

最後, 我們來一個雪糕布甸甜品, SY:「嘩…有早餐片嗰D脆米星星呀…一定好好食」

一口吃了雪糕的SY:「有好多果肉…(我:係瓜子嚟? )係楊枝甘露入面D生果呀…」

原來這個真是楊枝甘露的雪糕, 而且更加了少量瓜子…很好食的雪糕

我:「原來芒果布甸上面隻布甸狗係塊餅乾嚟, SY不如你試吓一口食晒佢吖…橫掂你咁鍾意布布」

SY真的一口吃掉了布布餅乾: 「原來布甸係用朱古力粉畫上去喎」

不停食布甸, 又不停食忌廉, 再繼而密密食雪糕, 小朋友非常繁忙, SY:「好食呀! 布甸碗入面嗰D係芒果汁嚟添…超好食」

涼茶舖細細, 但布置得非常有氣氛, 全黃色的布甸狗設計, 絶對非常童話感覺, 這店應該算是我光顧過最經濟 , 又健康的主題餐廳啦!!

鴻福堂 x 布甸狗 Pop up 店
日期:即日至 2 月 28 日
地點:九龍灣牛頭角道77號淘大商場一期地下G141號舖
時間:星期一至五 9:15am-10:15pm;
星期六、日及公眾假期 9:45am-10:15pm

大仁生活facebook