胡杏兒

Baby Lee腳頭好 胡杏兒 坐滿月狂賺奶粉錢

熱話

廣告

坐滿月出關了,唔係去玩唔係去蒲,第一件事係復工先!勤力嘅媽媽去邊度搵?38歲胡杏兒今年母親節宣布懷孕後,幕前幕後旅遊節目加自家品牌工作忙到臨生最後一刻,以為佢專注餵人奶生完會抖多陣,殊不知囝囝Brendan滿月未夠一星期,已經見到身型回復七成的胡杏兒,靚靚出席活動正式復工!話說Baby Lee在媽咪肚入面已經腳頭好,帶挈胡杏兒半年狂接孕婦嬰幼兒產品代言,出世後更有機會拍住媽咪自己奶粉錢自己賺。有錢搵,老公Philip梗係舉腳贊成啦!

撰文:Sunday Kiss

圖片來源:新傳媒圖片庫、胡杏兒Instagram

胡杏兒 坐滿月狂擸奶粉錢

上月10日胡杏兒與老公Philip的第一個愛情結晶Brendan平安出世,杏兒話囝囝食得瞓得,滿月已經重12磅。胡杏兒月初(6日)仲係未修身在家舉行緊睡衣派對慶祝自己38歲牛一,四日後(10)輪到囝囝Brendan肥肥白白賀滿月,榮升媽咪後的杏兒,日日在個人社交網絡分享人奶心得和換片日常,母愛滿瀉!

 

坐滿月即復工

以為樂得做全職媽媽的起心肝攤抖幾個月先,原來坐足月未夠一星期已出關。周四(16日)出席羽絨品牌酒會,自爆日日留在家中餵奶嫌悶喎:「老公Philip唔反對我復出,因為知我一定會悶,我唔會做全職媽咪,不過計劃係餵人奶六個月,所以未來都暫時唔會接啲需要長時間嘅工作先!」

廣告價急升

實情Baby Lee腳頭好,未出世已經帶挈胡杏兒狂接孕婦及賺幼兒產品廣告,拍廣告工時短、報酬高,又使乜再捱幾個月拍劇拍戲咁辛苦?杏兒自出道以來一直形象好、觀眾緣佳,本來已經廣告多多的她,在母親節宣佈陀B後再吸納埋媽媽市場,加上陀B前接拍的內地劇《那年花開月正圓》夾啱時機在懷孕中期播出,累積過73億點擊令杏兒在內地人氣急升,廣告價亦因此比陀B前叫高五成。

半年狂賺五百萬

自今年母親節宣布懷孕,杏兒馬不停蹄繼續拍旅遊節目、舉辦自家品牌時裝騷、宣傳劇集《那年花開月正圓》,還勤接廣告賺奶粉錢。其實點只半年五百萬,據悉仲有接洽中的滴雞精、嬰幼兒奶粉及教育品牌代言陸續有嚟!

 

 

 

隨時帶埋囝囝出鏡

據知情人仕透露,阿仔未出世,已經有廣告商及內地電視台重金遊說胡杏兒帶埋囝囝出鏡做代言,甚至拍攝真人騷。最難得係自己開獵頭公司、投資夜店的老公Philip一啲都唔介意杏兒極速復工甚至帶埋囝囝上鏡!」囝囝依家先1個月大,奶粉錢長搵長有呀﹗

餵人奶半年

生完積極谷奶為Brendan提供天然抗體,不過杏兒先旨聲明,最多餵人奶半年,絕對唔會做全職媽媽。