消暑湯水

消暑湯水推介 夏天11款下火水果湯食譜 清甜醒胃 清熱解毒

湯水

廣告

消暑湯水最適合天時暑熱,熱到冇胃口的時候飲。作為一家之「煮」想為家人帶來透心涼的夏日,不妨為家人煲消暑湯水。今次為大家推介的11款開胃清熱的消暑湯水食譜,全部加入水果熬成,味道清甜,消暑解渴,當中更有些可以雪凍飲!帶果甜,小朋友易入口,是夏天三餸一湯的好煮意。一齊跟住三位bloggers,買齊材料煲好飲的消暑湯水啦!

撰文:小小豬KinseySammy SaysLowlee煲湯|編輯:Ruby

11款水果消暑湯水推介

今次的消暑湯水,以水果作食材,水果入饌其實好處多。水果味道好,帶清甜,煲出來的消暑湯水味道易入口,對小朋友而言更易接受。加上水果熱量較低,沒有脂肪,還含有豐富維他命、礦物質及纖維,所以用上水果煲煮的消暑湯水,真是不錯的選擇

1.楊桃荸薺瘦肉湯

端午節後很快又到中秋,此時要潤肺養肺,收斂肺氣。因此養生的重點是養陰防燥、潤肺益胃。日常的養生,在飲食之中辛辣食物容易瀉肺,而酸味之物則能收斂肺氣,可以多吃帶酸味的蔬果,像是蘋果、柚子、烏梅、醋等,還有梨子、蜂蜜、粟子、芝麻、山藥、百合、蓮子、白木耳、南瓜等。而這款湯水則使用了楊桃的楊桃荸薺瘦肉湯。此湯酸酸甜甜好味又清熱解毒;除清潤肺腑,還能保護肝臟,降低血脂血糖,消除疲勞感及促進消化。楊桃主風熱、生津、止渴,中藥傳統使用具下氣和中、清熱止渴、生津消煩、利尿、解毒、醒酒、助消化等作用。對口腔潰瘍、咽喉炎症、風火牙痛等均有治療作用。多飲湯水補充津液,滋陰飽滿、身體津液充足,皮膚就會水嫩有光澤、容光煥發,滋潤養陰若做好護養,等到秋冬,再著重護陽,就能減輕不適症狀的發生,如此才合乎養生之道!最近感冒咳嗽、過敏症狀出現,藥食同源,趕快煲湯食療養好腸胃、止咳化痰,以免傷了肺氣!

材料:

楊桃 1-2顆

荸薺 6-7顆

南北杏 30克

紅棗 6-8顆

枸杞 10克

陳皮 1-2片

豬瘦肉 半斤

消暑湯水

做法:

1. 楊桃切件備用

2.荸薺去皮件備用

3. 豬展切件出水備用

4. 陳皮浸軟刮去皮囊備用

5. 南北杏及蜜棗清洗略浸備用

6. 將所有材料放入煲內以文火煲煮2-3小時,於喝前再大滾一下便成

2. 猴頭菇蘋果椰片南棗湯

猴頭菇益處多,有提高人體免疫力、抗氧化、提高胃部及消化系統功能等等;蘋果助消化、生津潤腸;南棗健脾補腎;花生含多種維生素、補腎益精;眉豆健脾化濕;蜜棗止咳潤肺。

材料:

猴頭菇 1個(約30g)

蘋果 2個

椰片 50g

南棗 5粒

花生 40g

眉豆 40g

蜜棗 2粒

豬展 $30

水 3L

做法:

1. 蘋果去皮去芯切件備用

2. 豬展切件出水備用

3. 猴頭菇 以清水浸片刻並擠乾水

4. 去核南棗、椰片、花生、眉豆及蜜棗清洗略浸備用

5. 將所有材料放入高壓煲煲20分鐘,於喝前再大滾一下便成 (若用一般煲具,則以大火煲滾,再用文火煲2-3小時便成)

3. 鮮甜滋潤三果魚尾湯

蘋果有潤肺除煩、健脾益胃、養心益氣等多種功效;萬壽果清熱潤肺、滋陰養顏、含豐富抗氧化成份,同時也有助改善便秘;無花果開胃健脾、潤腸助消化。魚尾脂肪含量低,含豐富蛋白質及鈣;南北杏亦有滋潤肺止咳及潤腸通便的功效。

材料:

蘋果 2個

木瓜 1個

無花果 3粒

魚尾 1條

蜜棗 2粒

南北杏 少許

薑 2-3片

水 2L

做法:

1. 魚尾洗淨抹乾備用

2. 蘋果及木瓜去皮去籽切件備用

3. 無花果洗淨切半備用

4. 蜜棗及南北杏洗淨略浸備用

5. 下油爆香薑片,放入魚尾煎每邊約3分鐘,轉大火及倒入沸水

6. 滾起後轉用高壓煲,再加入餘下材料煲20分鐘,於喝前再大滾一下便成 (若用一般煲具,則以大火煲滾,再用文火煲1小時左右便成)

 

4. 開胃解毒蘋果湯

材料:

蘋果 2個

雪梨 2個

粟米 1條

雪耳適量

南北杏適量

蜜棗 3粒

豬展 $30

水 3L

做法:

1. 蘋果及雪梨去皮去芯切件備用

2. 粟米切件備用

3. 豬展切件出水備用

4. 雪耳浸軟去蒂切件備用

5. 南北杏及蜜棗清洗略浸備用

6. 將所有材料放入高壓煲煲20分鐘,於喝前再大滾一下便成 (若用一般煲具,則以大火煲滾,再用文火煲2-3小時便成)

5. 蜜瓜響螺花膠雞湯

蜜瓜具有 開胃、潤肺清熱等功效;螺頭有滋陰補腎、清熱去濕功效;沙參養陰清肺;玉竹養陰潤燥;瑤柱及花膠補肝腎;無花果開胃健脾、潤腸助消化;杞子明目滋補肝腎。要注意感冒者不宜飲用此湯。

 

材料:

蜜瓜 1/2個

螺頭 1個

沙參 40g

玉竹 40g

花膠筒 4-6條

瑤柱 3-4粒

無花果 2粒

瘦肉 $25

杞子 少許

雞 1隻

水 3L

做法:

1. 蜜瓜去籽切件備用

2. 雞洗淨切半出水備用 (亦可去皮以減少油份)

3. 螺頭洗淨去除黑潺的斑垢,切令其更易出味

4. 無花果切半備用

5. 瘦肉切件出水備用

6. 花膠筒浸軟洗淨備用

7. 沙參、玉竹、瑤柱、杞子洗淨略浸備用

8. 將所有材料放入高壓煲煲20分鐘,於喝前再大滾一下便成(若用一般煲具,則以大火煲滾,再用文火煲2-3小時便成)

6. 蘋果百合煲豬展

這個 蘋果百合煲豬展 只有4款材料:蘋果、百合、蜜棗及豬展,適合家中各人飲用。蘋果有生津止渴、潤肺除煩、健脾益胃、潤腸等多種功效;百合潤肺止咳及清心安神;蜜棗補中益氣、化痰平喘。

 

材料:

蘋果 3個

百合 40g

蜜棗 3粒

豬展 $40

水 3L

做法:

1. 蘋果去皮去芯切件備用

2. 豬展切件出水備用

3. 百合及蜜棗清洗略浸備用

4. 將所有材料放入高壓煲煲20分鐘,於喝前再大滾一下便成 (若用一般煲具,則以大火煲滾,再用文火煲2-3小時便成)

7. 生津抗燥 蘋果生魚湯

生魚有補益身體、排毒生肌的功效;紅棗補氣健脾、補血及養心安神的作用;蘋果生津潤肺抗乾燥、也能促進腸胃蠕動排泄,有助孩子解決便秘問題;蜜棗補中益氣、止咳化痰功效。

材料:

生魚 1條

蘋果 2個

紅棗 10粒

薑 3片

豬展$30

水 2L

做法:

1. 生魚洗淨抹乾備用

2. 豬展出水備用

3. 蘋果去皮去籽切件備用

4. 紅棗去核與蜜棗洗淨略浸備用

5. 下油爆香薑片,放入生魚煎約3分鐘,轉大火及倒入沸水

6. 滾起後轉用高壓煲,再加入餘下材料煲20分鐘,於喝前再大滾一下便成 (若用一般煲具,則以大火煲滾,再用文火煲2-3小時便成)

8. 蘋果竹蔗茶

竹蔗有清熱之效,能解肺熱和腸胃熱 ;蘋果具有生津止渴、潤肺除煩、健脾益胃、養心益氣、潤腸、止瀉、解暑、醒酒等功效;青檸有潤喉殺毒功效,而且仲有助消暑解渴。

材料:

竹蔗2札

蘋果3個

青檸2個

冰糖適量

做法:
1. 竹蔗洗淨破開兩邊,蘋果刮去果蠟後去芯切塊,將青檸揸汁。

2. 煲內放大約2L水,然後放入竹蔗和蘋果。

3. 待滾起後,用大火加蓋煲10分鐘。

4. 然後就可以因應個人口味加入冰糖。

5. 轉用慢火加蓋煲1小時。

6. 待放涼後就可以加入青檸汁。可以飲得啦!

佢嘅味道又幾得意,有蘋果竹蔗香之餘,又有點點酸酸甜甜味(可能因為加左青檸汁),有少少泰國風味…哈哈哈。唔係自己讚自己,都真係幾好飲。不過我覺得雪凍左之後個味道仲出,加上凍凍地又可以消暑,絕對推介大家炎熱天時可以煲呢個正涼茶呀!

9. 蘋果粟米鬚馬蹄水

蘋果生津潤肺、除煩開胃;粟米芯鬚有健脾開胃及利尿功效;馬蹄就能消食除痰、清熱解毒。(網上資料)

材料:

蘋果三個

粟米鬚一斤

馬蹄八粒

冰糖適量

做法:

1. 粟米鬚洗乾淨

2. 蘋果刮去果蠟後去芯切開

3. 馬蹄洗淨去皮

4. 煲內放約2L水,然後隨水加入所有材料(冰糖除外)

5. 待滾起後,用大火加蓋煲約15分鐘

6. 之後加入適量冰糖

7. 然後轉慢火加蓋煲多45分鐘

8. 煲好之後待涼入樽放在雪櫃,因為雪凍就仲好飲呀

10. 蘋果無花果蓮子素湯

無花果健脾、滋潤;蘋果就潤肺除煩、健脾益胃、養心益氣;麥冬百合就有助清熱潤肺寧神,養陰護胃;蓮子就清心養神益腎的作用。(網上資料)

材料:

無花果4個

蘋果3個

蓮子½兩

百合1兩

麥冬½兩

腰果1兩半

1. 小心檢查蓮子,因為有部分仍然有中間的黑芯,需要除去那條黑芯先可以煮食,如果唔係整煲湯就會變苦啦。
2. 無花果洗淨切半
3. 將所有材料浸洗一陣
4. 原來蘋果(尤其係蛇果)通常會打一層果蠟,打蠟可以保持水果新鮮,且能防範病蟲害。不過依啲果蠟都唔係天然嘢,所以都唔好食落肚,最好就係刮走佢。
5. 蘋果洗淨後去芯切塊。
6. 煲內放約2.5L水,然後隨水加入所有材料
7. 待滾起時,用大火加蓋煲約15分鐘
8. 之後轉慢火加蓋煲1.5小時

9. 最後加入少少鹽調味,就可以飲啦。
啖湯清清地又帶點甜,而且又有好香蘋果味,所以都唔錯,三口子一人兩大碗,話咁快就飲晒整煲湯啦!

溫馨提示:
由於個別人仕體質不同,所以大家記得煲之前了解下自己,如有疑問,請先向註冊中醫查詢!

11. 蘆根薏米雪梨水

IMG_8329

材料:

雪梨四個

蘆根

薏米

銀花

甘草

基本上所有材料係藥材店都可以買到,只需要同店員講有幾多人飲,佢就會執所需份量,我三人份量都只係$15

做法:

1. 雪梨洗淨去核切塊

2. 所有材料要浸洗半小時

3. 將全部材料及1L水放入煲內

4. 待水滾後轉用慢火煲約1小時,咁就煲好啦

待涼後入樽,就可以飲得啦!

湯水食譜
加埋雪梨一齊煲,甜甜地又幾好飲。