三文魚南瓜洋蔥湯 營養豐富
廣告
三文魚南瓜 洋蔥湯｜在油麻地果欄買了一個又大又抵的日本南瓜，當然要即刻用來煲靚湯。上網睇見一個好適合小朋友飲的三文魚南瓜洋蔥湯 ，所以就試試煲給小小豬飲。可能個南瓜本身都好甜，加上有洋蔥同埋粟米，所以不用下太多鹽，小小豬都不停密密飲。但由於個別人仕體質不同，所以大家記得煲之前了解下自己，如有疑問，請先向註冊中醫查詢。
資料、圖片來源：小小豬KINSEY｜編輯：Clara
三文魚南瓜洋蔥湯 營養豐富
三文魚骨一般在日式大型超市就可以買到，一般都約$20-30左右，所以都好易買到。三文魚的營養成份都好豐富，有奧米加三脂肪酸同埋膽鹼，對腦細胞發展都好有益處。而且又可以補虛勞、健脾胃暖同埋紓緩水腫。日本南瓜含豐富維生素之外，仲有助益肝血、促進骨骼發展、預防骨質疏鬆及增強免疫力。
三文魚南瓜洋蔥湯材料
| 材料 | 份量 |
| 三文魚骨 | 1份 |
| 日本南瓜 | 半個 |
| 洋葱 | 1個 |
| 豆腐 | 1件 |
| 粟米 | 2條 |
| 紅蘿蔔 | 1條 |
| 薑 | 一小舊 |
三文魚南瓜洋蔥湯做法
- 紅蘿蔔去皮切塊；洋蔥洗淨去皮切片。
- 南瓜去皮去瓤後切件；豆腐瀝水切粒。
- 粟米切件；薑去皮拍鬆。
- 三文魚骨洗淨後，然後抹乾水份。
- 燒熱油鑊，將三文魚骨煎香。
- 然後放進煲魚袋內。
- 煲內放約3L水，然後隨水加入薑塊。
- 待水滾後加入所有材料(豆腐除外)。
- 待滾後，繼續用大火加蓋煲約15分鐘。
- 之後轉慢火加蓋煲多1.5小時。
- 然後加入豆腐。
- 再繼續慢火煲15分鐘。
- 加鹽調味後就飲得。
資料、圖片來源：小小豬KINSEY
關鍵詞
三文魚南瓜洋蔥湯
