蘆茅葛根冬瓜茶

【清熱降火】蘆茅葛根冬瓜茶

熱話

廣告

係天氣酷熱嘅時候,都總係令人容易心煩氣燥,所以就煲依個蘆茅葛根冬瓜茶,可以清熱降火啦⋯

 

 

撰文、圖片:小小豬KINSEY

其實蘆根、茅根、葛根加埋一齊煲,除左可以除清熱降火之外,仲對濕疹都有啲舒緩作用。而且加埋荷葉同冬瓜,咁就可以消暑解喝,所以都好啱炎炎夏天飲呀!

 

材料:蘆根5錢、茅根5錢、葛根5錢、麥冬1両、甘草3片、荷葉半片、冬瓜1斤同片糖。好似好多材料,不過除冬瓜外,全部係藥材店都可以買到。我依個就係三人分量,煲好左大約有六杯左右啦。

把所有材料洗淨;冬瓜乾淨切件,冬瓜皮、瓜瓤和瓜仁都唔清走,因為加埋一齊煲就可以加強消暑功效呀。

煲內放約2L水,水滾後放入所有材料。

待水滾後,用大火加蓋煲約30分鐘。

然後加入片糖再以小火加蓋煲30分鐘,片糖加幾多就睇自己口味!

最後熄火焗多10分鐘,咁就飲得啦!

甜甜地嘅涼茶就最合小小豬心水,唔洗勞氣就快快口飲晒一大杯啦。

溫馨提示:由於材料都涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,呢個湯料啱唔啱自己呀!