三代同堂嘆日本菜 陳慧琳夫婦 扶老攜幼夠細心
撰文：Sunday Kiss
圖片來源：新傳媒圖片庫
陳慧琳 全家出動嘆日本菜
陳慧琳日前下午全家出動去食日本菜，老公Alex駕車載住老婆同兩個仔，先到玫瑰新邨接父母，由於劉父年事已高，Alex小心翼翼扶爸爸落樓梯。同老爺奶奶去銅鑼灣嘆日本菜，到埗後陳慧琳一個人拖實兩個仔行去東角中心，老公則殿後陪實父母及家人。
細心Alex 逐一照顧老嫩
到達目的地，Alex逐一照顧好眾人落車﹐扶完爸爸落車後，再細心照顧兩個仔同老婆。而出名家教好又孝順的陳慧琳，同奶奶感情極佳，見Kelly奶奶落車後，亦專登等埋新抱，可見兩婆媳毫無隔膜！
廿四孝媽咪
吃完午飯，陳慧琳拖實兩個仔行去就近的巴士站車輛上落位等老公架車，等車期間，Kelly同老公用電話保持溝通，不過驚細仔小龍包衝出馬路，她全程一直用手捉實。車來了！安頓兩個仔上車後，Kelly先同奶奶及親友Say Bye才上車，絕對有家教，係個好新抱！
拒做虎媽
陳慧琳事業家庭兩邊都兼顧得好好，一有時間就會親自湊仔，唔想兩名兒子有太大功課壓力，拒揀傳統學校畀兩子升學，兩名兒子劉昇及劉琛就讀宣道會劉平齋紀念國際學校。而Kelly教育兒子都採取開放式政策，Kelly唔會死谷兒子讀書，反而著重培育兒子藝術修養，早前就見菲傭姐姐陪住蝦餃仔到佐敦上陶瓷班。
密密賺人仔
國內知名度高的陳慧琳，每星期都會返內地做騷及商演，前周日( 11月25日)就到了浙江溫州演出，出場時更落大雨， Kelly撐傘獻唱，相當專業。陳慧琳密密返內地狂賺人仔，山大斬埋有柴，有指Kelly就密密買舖收租，揸磚頭唔揸現金，投資重任更交畀父親陳崇偉代勞。
派老竇掃貨
當年出道不久，陳慧琳已經被揭有個開珠寶店的富爸爸陳崇偉﹐不過事業一帆風順的Kelly極速晉身天后行列，自己賺錢能力亦高企。但工作量驚人的Kelly未有太多時間親自睇舖入市，惟 有由父親代勞，早前本刊捕獲Kelly父親陳崇偉到尖沙咀加連威老道睇舖位，只見Kelly父親同兩名經紀在一間地舖外，手指指不斷研究，又視察四周人流，之後三人就入舖頭睇設備，連電路及去水位都研究仔細，期間Kelly父親似乎睇到有啲口乾，行去附近買飲品，然後再返入舖頭，同經紀繼續商量，睇了足足一小時才坐車離開，為幫阿女投資入市小心謹慎。
