元宵節互爆私事＋獻吻！黄貫中讚朱茵夠「大」被罰頂痰罐：老婆永遠是對的

圖片來源：朱茵微博｜編輯：Clara

黃貫中讚朱茵夠「大」

黄氏夫婦特地合體接受「愛情五秒定律」測試，黃貫中被問到老婆激嬲自己的三個原因，隨即「機關槍式」搞笑謂：「天氣凍著唔夠衫、肚餓又唔食嘢、亂放雜物、唔願起身、遲到⋯⋯咦，原來可以講到咁多。」令朱茵笑言要罰對方頂痰罐。他又笑指老婆身上三個最大的地方，就是「眼大、嘴大和志氣大」，朱茵全程合不攏嘴。

朱茵借機投訴黃貫中

輪到朱茵，她被問到對老公做過最浪漫的事，她笑言：「煮飯、揸車送佢返工、幫佢開門。」黃貫中取笑：「係咪覺得我好可憐呢？咁就叫浪漫。」談到老公婚前婚後的不同之處，朱茵便趁機投訴：「以前出街一定會拖實我，依家就會拖阿囡黄鶯；仲有以前唔會窒我，結婚後就係咁窒。」

不過講到黃貫中具備的三個好老公條件，她就甜絲絲地表示：「大力、任我差遣，而且會煮飯畀我食。」一旁的黃貫中聞言即時反擊：「講緊好老公條件，唔係揀工人喎。」

元宵節即場獻吻放閃

最終朱茵於賽事中落敗，並向黃貫中獻上香吻作為元宵禮物，羨煞全場。

愛足廿年 全因懂得欣賞對方＋有情趣

相愛超過廿載，黃貫中和朱茵至今仍然恩愛非常，黃貫中不諱言經常有人向他取經：「好多人問我哋，一齊咁多年會唔會悶，講真話唔悶就呃你，但係要學習點樣避免呢種悶，最重要唔好有一個奉旨嘅心態，例如太太為你煮飯，你要識得欣賞，要覺得每一餐飯都係第一次，將呢個心態套用喺所有事情上，就唔會覺得悶，反而好新鮮。」

朱茵也建議一眾有情人，為生活加添情趣，有助增進感情：「尤其依家喺屋企嘅時間多咗，可以嘗試多啲唔同嘅嘢，最近我哋會等囡囡瞓覺後，一齊砌3D模型，都幾好玩㗎，同埋我哋晚晚都會睇戲。」

黃貫中：老婆永遠是對的吵架贏咗有排捱！

雖然因為育兒理念不同，偶有爭執，但夫婦二人都會主動認錯，「愛妻號」黃貫中更自有一套「爭吵哲學」：「吵架輸咗，固然係輸；贏咗你都有排捱！既然輸贏都係處於輸家嘅狀態，奉勸各位男士最好就唔好同另一半嘈，係咪都認錯先。」