宏福苑大火｜學生自發寫感謝卡贈消防局 消防員現身回應獲近10萬讚好：苦中一點甜

學生自發寫感謝卡贈消防局：校長都寫埋

事主表示到學校鄰近的消防局，見到有消防車正駛回消防局，準備閂閘時剛好有走緊嘅消防員，便立即將他截停並送卡，事主指當時好緊張：「淨係不斷講多謝同辛苦晒」，最後更希望：「希望佢哋睇到張卡會有一絲溫暖吧，你哋係香港嘅英雄 一定要平平安安」，該名學生全文如下：

「自發寫咗張感謝卡俾學校隔嚟嘅消防局 大家放學留低寫咗好耐 副校知道呢件事之後搵埋其他老師一齊寫 校長都寫埋 突然有啲鍾意呢間學校 即係咁講 送嗰陣我哋幾個喺消防局門口猶疑緊 驚阻到佢哋 有車返局準備閂閘嗰陣 有放咗工走緊嘅消防員見到即刻閘住 送出去一時之間好緊張 淨係不斷講多謝同辛苦晒 希望佢哋睇到張卡會有一絲溫暖吧 你哋係香港嘅英雄 一定要平平安安」

消防員現身回應獲近10萬讚好：苦中一點甜

消防員也有在網絡上「現身」回覆這位同學仔的心意，在帖文留言：「多謝同學仔你既心意 完全係苦中一點甜 我地會好好保存」，至今獲得近10萬個讚好。 此外，也有消防員太太留言感謝，並發現是自己的母校：「我代我老公多謝你哋 老實講佢今日收到，佢send咗俾我，佢話間學校好sweet 好多謝 我再認真啲睇嘅時，我先發現其實係我自己嘅母校 好窩心多謝校長，各位老師同埋同學」。

不少網民都大讚同學仔好有心：「你哋好叻好乖啊，你哋做左件好好嘅事」、「多謝各位學生、老師及校長」、「你哋真係好乖好善良同好有愛，欣賞你哋嘅勇敢去做呢件事，而老師們一齊去做呢件事真係好Sweet」、「你地好好、好叻！ 佢地會收到你地嘅心意的」。