小三危機終於爆發！唐文龍跪地向老婆箍煲
廣告
台慶劇《溏心風暴3》近日進入高潮階段，唔止有小三陳敏之爆發逼迫唐文龍，又有李司棋大鬧敏之嘅痛心場面。去到噚晚，唐文龍終於向老婆胡琳承認婚外情，搞到老婆執晒包袱帶埋囡囡離家出走，唐文龍最終要跪地痛哭向老婆箍煲。
撰文：Sunday Kiss
相片：節目截圖
夏雨用奶茶潑唐文龍
今集一開頭就有高潮位！夏雨同唐文龍正面對質，唔止大罵唐文龍係「混蛋」，用奶茶兜頭撥唐文龍，仲話：「我驚我忍唔住會親手殺咗你！」！夏雨咁嬲皆因佢多年嚟都十分信住唐文龍，甚至將成間公司交俾佢打理，但就萬萬估唔到最終會因為同女兒有姦情而解僱佢，而唐文龍都冇作多餘辯駁，只好默默道歉，並自願離職。
陳敏之想同唐文龍私奔
另一邊廂，陳敏之就不願放棄同唐文龍之間嘅感情，主動話要俾錢唐文龍一對妻女，想二人一齊離開香港，展開新生活。可惜唐文龍話二人需要時間冷靜吓，諗清楚自己真正需要啲乜。
唐文龍跪地向老婆箍煲
緊接落嚟，老婆胡琳即刻收到雜誌社朋友爆料，知道咗唐文龍辭咗職，同時懷疑丈夫有外遇，大感打擊，仲打俾唐文龍問清楚真相。知道唐文龍同陳敏之有一腿後，胡琳即刻返屋企執晒包袱，帶埋囡囡同傭人離家出走。
唐文龍從保安知道老婆要出發去機場，佢即刻趕上準備箍煲，但點知老婆對佢不瞅不睬，似乎箍煲不成。
一直緊隨胡琳架的士，唐文龍因為收掣不及而撞車，呢個時候胡琳終於軟下心腸，落車睇老公嘅傷勢，好彩唐文龍冇咩大礙，仲即刻落車向老婆跪地道歉，請求對方俾機會重新嚟過。
佢仲放埋囡囡Candice上枱，叫老婆為咗囡囡俾多一次機會佢。
