幼師為 怪獸家長 Irene平反
詳細內容：
我唔讚成贏在起跑線！我相信人生係一場耐力賽，所以並唔係一開始跑出，就會係人生嘅勝利組！！如果要計，我女已輸左一半！
入正題，尋晚睇咗一個電視節目，相信大家都有睇，就算無睇都會聽過節目入面嘅名句，入面嘅節目內容，引起左好多討論！
呢個節目令我反思到好多野。
作為一個老師，確實係見過唔少較細月份嘅小朋友得唔到面試機會，因為好多學校都會係11月面試，但往往佢哋只會見啲夠歲數嘅小朋友，所以較細月份嘅小朋友就少咗啲機會啦！又有啲學校係媽媽有左就已經要報名，又或一出世就要交報名表……係架，呢個現象係幾癡線架！
作為一個媽媽我真係接受唔到囉！
下頁：學校實際情況
但作為一個老師，我只可以講呢啲情況真係好常見！
最嚴重嘅情況係喺幼兒學校嗰度出現！
幼兒學校即係全日制嘅學校，位少需求大，所以競爭又大左啦，幼兒學校亦通常收大仔，你話學校有無搞錯？
但呢啲，全因為制度上嘅問題！
當然半日嘅幼稚園亦都會出現呢啲情況啦，特別係一啲出名嘅幼稚園，因為個個都想入，所以就變咗多人交表，咁自然就會多人去面試啦，一個年頭嘅小朋友，同一個年尾嘅小朋友，做家長嘅都應該明白，係一定會有差距嘅！
當然唔係細仔就一定唔好啦，去到K2K3 其實都冇乜分別架啦，不過最慘就係，好多時入學面試，都係喺佢哋兩歲嘅時候，咁就真係考起啲小朋友啦！
對於節目入面位媽媽，
我見到好多留言都係鬧佢，
有啲都鬧得好狠⋯⋯
其實，每一個媽媽都係想為咗自己嘅仔女好，我相信呢位媽媽都係！
只係可能表達嘅言詞較有個人風格。
其實，何必用啲粗言穢語去鬧呢位媽媽呢？我相信當中為求達到節目嘅效果，也許未必反映事實嘅全部嘅！我自己感受過被熱烈討論嘅感覺，真的不好過。何況被批評不懂做媽媽？真的是很傷害嘅說話。
雖然我不讚成要贏在什麼什麼，但我還是很欣賞這媽媽一直為小朋友嘅事咁上心。希望大家看下去時，可以看到的，是現在香港教育嘅問題，問題係出係邊，反思點解個個要贏在xxx。
來源：VVinnie
