麥包

後生仔難置業 麥包 有諗過幫阿仔買樓

熱話

廣告

《Sunday Kiss》記者今日下午同 麥包 &囝囝做FB live(按此重溫),兩仔爺非常搞笑,一問一答,囝囝仲好好笑咁學爸爸講嘢!記者問到鍾意睇爸爸做咩角色,囝囝即刻答話最鍾意睇爸爸做壞人啊!似返佢!(哈哈!)

麥包 大女16歲,細仔13歲,對於教育子女, 麥包 都有自己一套,做live時,讀者的問題亦非常尖銳,有問到會唔會問囝囝買樓o添,一齊嚟睇下佢點答問題啦!

 

撰文:Fiona Fong
相片:新傳媒資料室、麥包微博

問:錫囝囝多啲定囡囡多啲?

答:仔同女始終都唔同,有唔同錫法亦有唔同教法,我比較傳統,覺得男仔始終要孭起頭家,女仔就始終想佢斯文啲,聽話啲,細心啲。同埋女仔都係要錫多啲嘅,因為第時佢要嫁人啦,希望錫佢嗰個係佢老公嘛,所以我想喺仲能夠錫佢期間就多啲錫佢啦!唔係偏心,因為仔唔同啊,仔係要教佢學識,自立,堅強,跌低要起返身。

問:對教育的睇法係點嘅呢?

答:我唔想迫得佢哋太犀利,或者俾太大壓力佢哋,但當出嚟做嘢時,評定一個人的準則就是成績表。你話成績表重要又得,唔重要又得,因為你所讀的科目未必同你將來的工作有關,但成績表可以介定你做咩職級,入邊個門檻的通行證。除咗成績之外,如果你IQ同EQ都比人哋叻嘅,咁你就可以快啲到達目的地啦!所以成績、IQ同EQ都同樣重要!

問:對第時個新抱有咩要求?會唔會買定樓俾囝囝?

無!娶妻求淑婦,靚唔代表可以做老婆,做老婆又唔代表靚嘅,咁大家明啦!至於會唔會買樓俾囝囝,其實我有想過,因為後生仔好難置業,作為父母想佢輕鬆啲,無咁大壓力,都會有呢個諗法,但如果阿仔生性,同我講唔使住啦!就另計啦!咁就算唔係俾阿仔,我用嚟收租、養老,都得啫!不過第時我百年歸老,啲嘢都係佢哋o架啦!

問:黃子華話…為咗下一代,唔好有下一代,你同唔同意呢?嗰陣有無諗過唔生小朋友啊?

答:我唔認同呢句說話。因為我覺得呢個世界要靚,係要有老老幼幼,齊齊整整。就好似我哋揸車一樣,如果自己一個人喺度揸車,你會揸得好free好放,甚至未必會顧及其他道路使用者的感受,但當你揸緊嗰架車入面有一個80歲的老人家或者一個2歲的BB,咁你揸車嗰陣就會好定,同埋亦都會在意人哋的駕駛方式會唔會影響到自己。同政制一樣,一個有老有嫩的政府官員,佢所制定的政策同方案會考慮到可以保障小朋友及老人福利,會顧及得比較周全,而且你唔會亂嚟,因為你會怕禍及下一代。

問:咁如果你下一代話唔想有下一代,咁你又點睇呢?

答:我唔會左右佢哋,因為佢哋有佢哋自己的想法,甚至佢哋人生、價值觀都唔會有意見。只要唔好後悔就得啦!我想有自己的小朋友,因為我希望自己的人生比較齊整同完美,雖然呢個世界好危險,我唔係話自己自私生佢哋出嚟,不過我聽到好多朋友都話,後生嗰陣為咗拼博,想唔生小朋友,但後來佢哋就後悔當日唔要小朋友的決定。佢哋事業上可能好成功,但當佢哋60歲時,就得返自己一個,人生無得重來,當日的決定就會變成遺憾。

延伸閱讀

黃子華金句勸勿生仔 家長力撐

湊大3個仔入史丹福大學 陳美齡育兒心得