Riz拒入娛圈做副校長 巴基斯坦裔籍與鄧麗欣同屆奪校草冠軍 因1事成學生偶像

鄧麗欣是《Yes!》雜誌校花冠軍出身

鄧麗欣近日於Instagram激動指出二人於《飯戲攻心》的角色Monica同大佬很有緣，比meow meow（林明禎飾演）還要早：「看來這可能是「飯戲攻心如果有續集之飯戲攻鼻定攻眼」的重要伏線，大家要密切留意！」

導演陳詠燊亦有轉發：「慶祝票房破五千萬，又要貼勁嘢！話說，我哋套戲有提過《Yes！》雜誌，點知我哋美術部嘅同事上網搵搵下，竟然發現——子華神同Stephy曾經喺同一個封面出現過！當年Stephy參加校花選舉，子華神係嘉賓！我今日就拎呢本畀佢哋簽名！究竟「牛頭角木村」同「又不是八十年代嘅校花冠軍」佢哋肯唔肯簽呢？問完話你知！大家認唔認到邊位係Stephy」

不少藝人都是參加《Yes!》雜誌校花校草比賽後被發掘入行，當年鄧麗欣於校花校草選舉中奪冠，鄧麗欣隨即加入娛樂圈，組成女團Cookies出道。而這個封面裡面亦有，前TVB藝人何君誠（上排右一）、同為Cookies成員的Gloria（下排右三）。

巴基斯坦裔Riz與鄧麗欣同屆奪校草冠軍

原來當年同屆的校草勝出者是一名地利亞修女紀念學校（協和）的男學生利哲宏Riz（Dr. Rizwan Ullah）。不過，Riz就不走尋常路，沒有選擇踏入娛樂圈，反而繼續學業。Riz小時候曾想投考警察，讀完大學取得工商管理學士學位後，被中學副校長推薦做英文科教師。現時投身教育界的他，回歸母校更成為了中學副校長。

巴基斯坦裔Riz拒入行 投身教育界

Riz曾接受ViuTV節目《8%的聲音》訪問，憶述自己雖然是巴基斯坦裔，出街時曾經受到誤解，不過他表示自己是本地土生土長的香港人。為了改變別人的看法，Riz決定做到最好，讓大家改觀，他直言：「係你唔識嘢，唔識貨，廢事同你嘈。我唔係想做偉人，改變唔到世界，但會諗點改變自己。」

Riz願為學生補課助爭取好成績被封為偶像

Riz在節目中透露投身教育界的原因，他說：「因為我讀書嘅時候，唔多巴基斯坦人做老師，無㗎根本上。反正剛畢業，就試一試。」他指做老師，成就、幫助學生好有意義，滿足感非常大。

Riz在校內備受學生歡迎，更有不少學生封他為偶像，他的學生大讚：「Riz相當聰明，只要佢想，佢有能力教授任何科目。佢好勤力，花好多心思教學生，幫助我哋喺文憑試拎到好成績。」Riz為了讓不同族裔的學生學習中文，花很多心思教導，甚至在每日下午6點至8點開辦中文課。

Riz解釋指「我覺得無入錯行，無後悔過。香港係知識型社會，佢哋要繼續踢波，繼續讀書，繼續搵自己嘅路，我哋作為老師會繼續幫佢哋。同一天空下無分彼此，唔同族裔嘅學生一齊上堂、學習，互相認識、欣賞同尊重。」

Riz博士畢業未夠40歲成副校成功經歷獲網民大讚

後來，Riz攻讀完博士學位，投身教育界多年後，現在已是中學副校長、傳訊及公共事務主管，更是現屆平等機會委員會委員、青年發展委員會委員、教育局政府助學金聯合委員會委員、社會企業研究院常務副院長。Riz十分關注本港少數族裔學生的權益和讀書生涯的規畫，熱心服務社會，政府因此特別頒發「行政長官社區服務奬狀」，表彰Riz所作的貢獻。

網民都紛紛留言大讚Riz的成功經歷令人驚喜：「好勁！」、「個個做明星，偏偏佢走第二個field都可以咁成功」、「好叻仔！而家都好型！、「犀利！40歲未夠就做副校！」

最近Riz接受香港電台訪問，以及獲邀上TVB清談節目《清心直說》，可見他重新留了頭髮，男人味更加重，難怪連男網民都讚他很有型。