渣馬2024｜洪永城太太梁諾妍懷孕7個月參賽被鬧 解釋堅持比賽原因

洪永城感擔心 奇招護妻

Inez比賽後傳媒訪問時透露，除上斜路段較為吃力外，其餘時間也十分輕鬆，又指目前已懷孕超過7個月，令老公洪永城擔心不已。洪永城指她四肢依然纖瘦，看上去毫不像孕婦，加上賽道會很多人，因此他特意在Inez身後貼上「Child in car」的提示牌，藉此提醒後方的跑手。她笑言，當時很多人見到告示後，更上前為她加油打氣，她感到非常開心。

梁諾妍分享賽後感

賽事完畢後，她在社交網站分享懷孕跑馬拉松的賽後感：「今年嘅渣馬好特別好amazing ，有個小BB陪住我一齊完走，完走時間大概1小時04分，今年當然冇特別做時間，我嘅心態志在參與，輕輕鬆鬆咁跑，享受其中，仲要有埋洪爸爸勾喺我背脊嘅『child in car』 加持！大家如果有特登讓路請見諒，亦好感激大家讓路！」她表示自己已經刻意排在人群的最後方慢慢跑：「選擇咗喺自己10公里組別入面排到尾尾先開跑，慢慢起步，頭3公里都比較塞人，唔緊要啊～我就慢慢塞慢慢跑！」

大肚梁諾妍透露堅持參賽原因

Inez表示自己懷孕參加比賽，是為了鼓勵一班媽媽們：「今次嘅參與唔係想證明俾人睇孕期期間都可以去跑個10公里， 只係想鼓勵媽媽們，喺自己身體許可下，了解自己身體狀況下，繼續去做自己喜愛的事！」除此之外，她也提及做適量的運動對孕婦的健康甚有幫助，「自己能力範圍內做適量嘅運動、散步、yoga、pilates等等絕對可以令孕媽放鬆心情，相信寶寶都會健康啲，每個媽媽體質都唔一樣，自己一定係最清楚自己身體狀況嘅人，我哋繼續同行，繼續互相扶持！」

網民批評梁諾妍大肚跑馬拉松行為自私

雖然梁諾妍大肚跑馬拉松獲不少網民大讚勇敢非常叻女，老公洪永城亦大讚「老婆，你係勁嘅」，不過部份網民卻留言批評，直斥她不顧腹中胎兒極及其他人的感受：「跑馬拉松好多人，咁樣係好自私」、「你跑唔係問題，但要人睇路，又要人小心」、「將個風險同責任分散咗落其他跑手同工作人員身上，其實有少少自私」、「跑到要人哋就住你咁跑嚟做咩」、「人哋撞到你有事，咁邊個負責」、「跑步年年都有，點解要咁冒險」、「被人撞到就大件事」、「其實為咗BB嘅安全，跑少次都唔緊要啦！」、「生仔要考牌系列！跑少次唔得咩﹗」

有人力撐：懷孕跑步好平常

不過，有部分網民則力撐Inez，認為孕婦都可以做運動：「其實大肚都可以做運動，只係古時啲人乜都怕，同埋對醫科學科都無咁認識先話大肚婆乜都唔做得， 根本大肚婆都一樣可以行可以跑，只要未大肚之前已經有操開運動就得」、「其實佢有做開運動，第一胎都係咁跑，而家第二胎跑都係佢決定， BB係佢，關其他人乜事呢？要負責佢自己會諗㗎啦，使乜理其他人。更何況而家結果都出埋嚟係平安丫，而且外國懷孕跑步都係好平常。咩多人跑步會踩到會受傷？咁其實出街都危險㗎啦。有陣時生命都唔係自己可以決定，自己同自己負責返咪得囉。大肚婆都要返工迫地鐵搭巴士企全程，係咪又叫人哋唔好返工？香港實在太多多管閑事嘅人，道德綁架人哋，顧掂自己先啦。」此外，也有人留言讚賞Inez，「真心欣賞你的量力而為！好過嗰啲平時又唔操，一去就要去到盡嘅人！不自量力！」Inez看到留言後也回覆網民：「謝謝你懂我。」