3大淘寶奇怪神器 防小朋友寒背近視

撰文：Kammy｜圖片來源：淘寶網

3大淘寶奇怪神器 防小朋友寒背近視

1. 軍用十字架

喺淘寶賣嘅軍用十字架，由長木拼成嘅十字架聲稱可以幫小朋友糾正姿勢，只需要兩塊長木加一條繩就可以令個人坐直啲，仲可以保持視力，防止近視加深。

不過要畀人綁到咁真係睇見都辛苦…

唔少賣家都話呢款神器大人小朋友都啱用，仲話一星期就有明顯效果。另外，賣家更話軍人都係配帶呢種十字架先可以企到咁直，而唔少買家就留言話：「效果有，頭抬高了」、「堅持就有效果」，真係信不信由你喇！不過呢種軍用十字架喺淘寶都只係賣20-30元人民幣，大家不妨都買個嚟試下啦！

除咗木製版，淘寶更有賣不鏽鋼版！不過呢款就唔係用綁繩，而係用魔術貼帶，就算自己一個都可輕易帶上，加上呢款嘅支架較長，就連頭都可以固定，更加唔會有近視。

2.糾正寫字姿勢架

唔少小朋友做功課都好容易做到攰，做做下就會趴咗喺度，令到彎腰同近視問題嚴重。有人就研發出一款架，支撐住小朋友嘅頭部，防止小朋友做功課時趴喺度。另外，呢款架可以提起小朋友胸膛，同書本保持一定距離，減低近視問題出現。

3.床上平躺看書架

相信唔少人都有試過，就係瞓喺床上睇書同用電話，但好容易就因為咁而不知不覺間加深近視。淘寶賣嘅呢個架就係針對住呢班人，大家只要喺架上面嘅透明板放上書或電話，就可以瞓喺度慢慢享受。不過，呢個架可能用嚟睇片會較方便，因為睇書時要揭頁，反而會造成麻煩。

另外，呢款架可防止睇書或睇戲時同眼睛距離過近，書架亦可以按個人需要而調較高低。

如果睇到攰，仲可以中途直接瞓教，唔使拆架咁麻煩。