一家四口火鍋放題狂叫24個布甸追加肉類海鮮 目擊者睇唔過眼揭譁然結局 網民籲報警

將軍澳一家四口火鍋放題不停追加點餐量驚人

一名網民在網上發文表示自己於6月8日到將軍澳PopCorn一間酒樓晚上吃火鍋，該酒樓的宵夜火鍋優惠時段於在晚上8時30分正式才開始，但這一家四口8時20分已提早入場，隨即不停投訴「又話未開code又話冇熱水」，對店員態度極差。目擊事件的樓主在社交平台發文表示，酒樓提早讓客人入座是出於好意，「唔等於可以開始畀你食」。宵夜時段正式開始後，這一家四口叫完海鮮隨即嚷着要點甜品，竟一次過落單24個芒果布甸，店員建議「食完先再畀」，卻遭當中男子發惡責罵。其後他們再追加24碟蜆、大量肥牛、多種肉類、點心及蒸包，點餐量之驚人令在場食客嘩然。

店員、樓主先後好言相勸反被責罵

面對一家四口的瘋狂落單，店員曾好言建議分開點餐，「食完先再畀」，惟對方不但拒絕，樓主透露該男食客更發惡罵人，更強調「我哋一定食得晒！」坐在鄰座的樓主亦看不過眼，好心出言提醒「食得晒先好嗌」，不過該家庭的母親即時反駁回答表示「我哋一定食得晒！」
樓主當時決定靜觀其變「得！我就放長雙眼睇」，看這一家四口能否真的吃完所有食物。

樓主曝光1家4口火鍋放題結局：真係得啖笑

直到用餐時間晚上10時30分，看到對方的桌上仍有兩大盤肉原封不動，樓主表示自己本來還期待該一家四口會「嚟個絕地反擊，最後15分鐘食晒」，但樓主表示「真係得啖笑」。
他們選擇將剩餘食物「掉晒落個煲到就算」，然後四人突然一齊起身極速離開，「酒樓啲姐姐都追唔切」。從現場相片可見，枱面遺留多碟疊滿的肥牛、牛肉、雞肉、蔬菜及點心，火鍋內亦塞滿大堆肥牛，浪費程度令人咋舌。

網民怒轟無家教：酒樓報警報東張啦

事件曝光後隨即引發網民熱議，紛紛批評一家四口行為離譜， 有人直斥「24個芒果布甸、24碟蜆，係咩玩法」、「啲人真係好無品」、「浪費食物真係好折墮！」，有人更建議店方要把他們列入黑名單，甚至報警，「真係要睇返cctv!blacklist晒呢幾個人」、「酒樓報警報東張啦」；
部分網民十分同情店方，「係咪$98/$128任食嗰個？！人哋做到咁平 就唔好玩X人啦！！！ 人哋已經生意難做先做呢個價吸客仲搞X人」；不少網民都力斥這是無家教行為「加上啲肉都係生命嚟 唔尊重啲豬牛羊⋯⋯至憎人浪費食物好冇家教」、「如果係我老竇老母我會好shame」、「食唔晒真係唔應該叫咁多，呢個世界有啲人想食都冇得食吖」，「其實好多香港人都是咁樣的…利申做左7年放題…」

不少網民建議酒樓應設立浪費食物罰款機制，「支持浪費食物罰款，大佬啊任食㗎，食晒再嗌都唔遲啦」，「支持浪費食物罰款，你話剩少少就話啫，大佬呀任食㗎唔使搏命嗌啦食晒再嗌都唔遲啦」。

樓主建議按重量罰款網民倡參考內地按金制

樓主事後補充，「其實佢食得哂24碟真係無問題，問題係食唔哂又要咁寸嘴就好抵X。仲要自以為高人一等，呼喝啲店員先最X街」，並建議酒樓日後按重量罰款，「每100g收返$50，等佢哋唔使黐咗線咁嗌」。亦有網民提出參考內地火鍋放題做法，「大陸食放題有個位做得唔錯，就係入場前畀定按金，到食完叫staff過嚟check完先退按金，啲人就唔夠膽大量亂叫嘢食，其實香港放題都可以學下」。事件再次引起社會對放題浪費食物問題的關注，究竟酒樓應否設立更嚴格的機制防止類似情況重演，仍有待業界回應。