煙花取消巴士兩乘客被公審「多得班大埔人」對話全曝光 宏福苑災民心痛回應

巴士兩女刻薄對話曝光：多得呢班大埔人，咩都取消晒

該名目擊市民嬲到在社交平台發文公開事件，她在Threads上發文，指坐8P巴士由銅鑼灣回小西灣期間，聽到兩名女乘客的對話令她「好嬲」。兩人一人一句地抱怨：「多得呢班大埔人，咩都取消晒」、「今年第一次煙花就冇咗」，又表示「大埔今次真係累人不淺，咪X再俾我見到大埔啲車，真係眼冤」。
女網民又透露其中一人育有女兒，更疑似是教徒，說自己要去「報佳音」。整程車程中兩人不斷重複類似言論，令其他乘客感到不適。目擊者全文如下：

「好嬲😡
真心祝你兩個長命百歲
呢兩個女人今日搭8P由銅鑼灣返柴灣
一上車見到前面架307 返大埔嘅巴士就開始講
左：多得呢班大埔人 咩都取消曬
右：xx 今年第一次煙花就冇咗
左：大埔今次真係累人不淺
佢哋繼續講我有啲唔記得咗 但佢哋keep 住鬧
左：咪L 再俾我見到大埔啲車 真係眼冤
佢哋繼續傾 左邊個女人好似有個女 佢哋亦都好似係有信教 因為我聽到右邊個女人講話自己要去報佳音
希望識佢哋嘅人可以同佢哋講返 其實大埔人同全香港人都唔想要呢場火災 希望佢哋可以收下把口話曬今日都係冬至」

宏福苑災民心痛回應

帖文曝光後，有宏福苑災民看到內容後心痛回應：「我係宏福苑災民，我都唔想我嘅『家』會被燒光。財物的損失事小，回憶的載體事大，請問該兩位小姐，不如我們角色互換，你來體驗一下我們一眾災民正經歷的悲痛，好嗎？」災民的回應充滿無奈和傷痛，強調失去的不只是財物，更是珍貴的回憶和家園。政府已宣布今年的倒數活動將改為在中環遮打道行人專用區舉行，代替維港煙花匯演。

茶餐廳亞伯同樣言論涼薄

除了巴士上的對話，有網民分享類似經歷，指在茶餐廳聽到兩個亞伯討論宏福苑災民，質疑政府提供兩星期酒店住宿是否過多，甚至說「使唔使畀佢咃住成世呀」。該網民表示當時想過去責罵對方，認為這些言論極度涼薄。另有人在不同場合遇到類似情況，顯示部分市民對災民缺乏同理心，只關注個人利益受影響。

網民齊聲譴責自私言論

帖文引起大量網民共鳴和譴責，紛紛批評兩名女子的言論。網民留言包括「人性在那？」、「呢啲先叫口孽」、「咁嘅嘢點解可以講得出口？佢哋無屋企人㗎？」、「一點同情心都沒有！」、「正常人都唔會講得出」、「呢啲人冇同理心，呢啲係全港好多人嘅傷痛回憶，經過見到都覺得心痛」、「大埔單嘢，最傷心無助係住宏福果班。呢兩個人真係……」、「賤嘴、自私嘅人類真係最恐怖」、「點解D人可以咁涼薄同埋冇同理心你覺得災民會想火燭。佢哋已經好無辜。仲要冇咗百幾條人命。唔出聲其實冇人話你啞嘅。本身煙花都已經燒銀紙啦。調返轉如果發生喺你哋自己身上，你會唔會講得出呢一種說話」，又有人表示「佢哋兩個會唔會怪錯人」、「未睇晒文章時以為普通人，黑心想佢有報應嚟緊。睇曬全文知道其中一位仲係教徒嚟，上帝唔會接受佢一邊獻唱讓人認識耶穌，一邊如此刻薄毫無耶穌憐憫人嘅心，我相信上帝那本冊子記錄在案，在天堂都會被上帝訓斥」。

此外，有網民指睇少一年煙花沒大不了，「年年都有得睇睇少一次有乜咁大不了」、「香港民間一向都禁燒煙花所以每當政府過時過節燒煙花，其實好影響空氣同環境！今年香港發生開埠以來幾嚴重嘅民居火警，係香港人見到都好心痛，取消燒煙花係必然同應該！」有網民呼籲大家「做返好自己，保持正念，唔好俾呢啲負能量影響到，祝大埔街坊平安」，希望社會能以更多同理心面對災民的困境。