【小創夢家】男女拔衛冕學界D1田徑賽 德望九華爆seed屢破紀錄

港九學界D1田徑賽,喺2月26日,終於圓滿落幕!! 男女拔表現超班,再度衛冕團體總冠軍!雖然賽果未有驚喜,但煞科日賽事非常精彩!女子組有德望多名女將接連以破紀錄成績將分數拉近;男子組有喇沙、九華奮力應戰,盡顯體育精神!3日賽事,合共產生28項新學界紀錄(D1賽事),一眾小創夢家,運動員所付出的血汗,絕對值得記下來!

德望六破學界紀錄 雖敗猶榮

德望在完成第二日賽事後,團體總分與女拔只有20分差距,絕對有條喺決賽日奪回失落9年的榮譽!喺煞科日,德望上下,由運動員至啦啦隊,皆氣勢如虹,一眾短跑女將爆發小宇宙,先橫掃3個分組200米冠軍,及2個分組的100米冠軍,其中A、B Grade 100米及200米,均打破學界紀錄!

德望校監阮嫣玲修女亦與啦啦隊一齊打氣!

一眾女將為衝擊總冠軍,表現勢如破竹,跑到好似”飛起”咁!!

熟悉學界賽事嘅都知道,田徑賽壓軸嘅接力賽,積分會以雙倍計算,所以有謂:得接力者得天下!德望短跑超強,3場4X100接力皆贏得輕鬆,A Grade 4個可人兒,更以破紀錄獲勝!可惜 3場 4X400都屈居人下,最後總分以30分之差飲恨,連續第10年做「阿二」!不過在3日賽事中,德望共刷新了6項學界紀錄,比起女拔2項新紀錄,及一項平紀錄為多。

A Grade 4X100又破紀錄,4個妹妹開心合照受訪。

贏咗3場4×100,成班德望妹都好興奮,企喺場邊打氣都超肉緊!

潘幸慧留力鬥接力,可惜頭三棒落後太多,即使佢發力狂追,到終點時,女拔妹已在終點慶祝!

下頁睇埋其他女校

 

女拔力保10連霸

受到德望步步進迫,女拔要贏呢個總冠軍都並唔係十拿九穩! 好在有團隊精神搭夠,有隊員更寧願犧牲個人獎牌,升Grade出戰,都要幫學校攞到總冠軍,最終成就10連霸!

賽後一眾隊員與校長劉靳麗娟,一齊曬V合照。

女拔致勝關鍵,係最後3場4X400接力,每一捧都唔敢鬆懈,最後更取下3金!

前女拔田徑隊隊長陳綺琪(右三),率一眾舊生到場撐師妹!

協恩妹放眼紫荊盃

不過今年女子組團體總分有逐漸收窄之勢,當中排第三的協恩總分由去年的272分,至今年達320分,亦有譚琬婷在女子A Grade跳高項目破學界紀錄,整體成績進步不少!賽後將於七月榮休的校長李鎮洪更勉勵學生,雖然佢哋喺田徑賽攞第三,但係佢哋可以第32年攞到學界最高 榮譽紫荊盃!

瑪記妹B Grade跑出

瑪記妹個個樣子斯文,不過博起上嚟都唔係人咁品,尤其係B Grade嘅隊員,唔單止搶到一場4×400嘅銀牌,力衝下更取得一個分組第4,成為搶分功臣。

佢哋唔止搶分叻,搶鏡一樣好叻,成班妹妹對鏡頭超敏感,攝影師多次移動位置,佢哋都一樣望到實一實!

聖嘉勒不死火鳳凰

今年以粉橙色戰衣上陣嘅聖嘉勒,以A Grade成績最好,為列分組第四,團體成績排第五!

聖保祿穩守團體第四

同舊年一樣,聖保祿學校都係得到女子團體第4名,總分稍稍提升。雖然間間學校都有統一嘅制服,不過如果要論最場隊形最整齊嘅,就一定係佢哋喇! 一睇就知個個都係乖豬啦!

九華殺入男團三甲 五破學界紀錄

男子組賽事於煞科日已呈一面倒局面,男拔以59分領前排第二的喇沙,男團總冠軍已經實食冇黐牙! 不過一眾男子組未有氣餒,以博盡無悔的精神,多番為賽事製造驚喜! 其中九華表現更加係大躍進! 由去年團體排第6,今年以總分223分,殺入三甲,比去年多搶70分,交出5項新學界紀錄,坐正做三哥!其中新百一米欄王張宏峰,及精於長跑的梁皓進,各奪3面金牌, 成為九華的搶分功臣!

總成績殺入男團三甲,在場華仁仔都表現興奮! 一齊舉起3隻手指慶祝!

九華欄王張宏峰,先後打破男子A Grade 百一米欄及四百米欄嘅學界紀錄,鋒芒盡露!

梁皓進亦在男子A Grade 800米賽事,刷新學界紀錄。

二人期後更與隊友合力,贏得全日最後一場男子A Grade 4×400接力,同時亦破學界紀錄。

C Grade師弟都唔輸蝕,力壓喇沙贏得一場4×400接力。

連啦啦隊氣勢都喚然一新! 雖然在看台上同喇沙仔位處同一區,聲勢都冇比下去!

男拔贏到甩哂尾

男拔以氣吞天下之勢,贏得男團總冠軍,總分比亞軍嘅喇沙高出近140分,直情贏到尾燈都見唔到,不過喇沙靠C Grade發力,取得一個分組冠軍,粉碎男拔嘅大滿貫美夢!

贏開巷喎! 嗌口號梗係激昂啲啦!

除咗成功衛冕,男拔喺三個賽日,一共刷新咗6個學界紀錄,其中兩個男子A Grade 1500米 及5000米嘅紀錄,就係由長跑王黃子圖締造架喇! 值得一提嘅係,喺男子A Grade 1500米 項目中,尾隨黃子圖身後,來自余振強紀念中學嘅劉澤權,喺第3圈曾一度追過黃子圖,可惜在終點前80米,黃子圖即發力將佢追過,飲恨屈居亞軍,不過佢一樣打破咗舊紀錄。

劉澤權今年係最後一年出戰學界,雖然佢自言狀態不佳,但係佢同日喺男子A Grade 800米 ,就以破紀錄成績攞到一面金牌。失落1500米金牌,對佢呢場告別賽嚟講,確係有少少遺憾。

不過賽後余振強嘅啦啦隊,即喺看台大嗌:多謝劉澤權! 令佢即刻精神番哂!

同屬余振強嘅黃卓熙,亦都喺煞科日,力壓男拔隊長梁敦博,成為新嘅百米飛人!

喇沙堅持到底 接力搶兩金

雖然總分相距甚大,不過喇沙仔上下一心,連啦啦隊都冇放棄過,聲勢十足,可謂輸人唔輸陣!

壓軸6場接力賽,喇沙仔愈跑愈有勁,取得2金2銀嘅佳績!

下頁有更多場內場外花絮

早前喺學界游泳贏得3金,嚟自西島中學嘅Miles Jing Williams,亦有代表學校出戰1500米賽事,可惜陸上功夫唔及水上好,只能以第8名完成賽事。

西島參加女子B Grdae 4×400嘅4位女將就好爭氣喇,攞到一面銅牌,搶分成功!

玩開三項鐵人嘅Michael Lam(林朗星),亦都有出戰1500米賽事,可惜只得梗頸4,未能奪取獎牌。而英皇佐治五世男子組,明年亦將降班D2作賽。

邊間學校啲女仔,最鍾意影相?

女孩子對鏡頭真係好敏感架! 攝影師一舉機,佢哋就好自動架喇!

唔得閒望,就因為自拍緊囉!

或者忙緊傾計啦~

或者忙住打氣啦!

撰文:Joanne

攝影:Clay Lam,Joanne,Fiona Fong

協力:Fiona Fong

 

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。

你認同嗎?

更多精選內容