Jacky仔

【小創夢家】童星 Jacky仔 轉眼已18歲 積極進修做演員

熱話

廣告

正所謂「仔大十八變」,童星出身嘅 Jacky仔 王樹熹,唔經唔覺今年已經18歲。早前喺文憑試中考獲21分成績嘅佢,依家喺城市大學讀緊媒體與傳播系。除咗讀書之外,小創夢家亦計劃復出拍戲,最近仲見佢好勤力不斷更新自己嘅社交平台,等大家多啲知道佢嘅近況!

 

 

 

撰文:Sunday Kiss
圖片來源:新傳媒圖片庫、微博

日前Jacky仔就喺微博post咗佢同哥哥王秉熹(Jeffrey)慶祝生日嘅合照,一家人仲送咗哥哥指定想要嘅生日禮物俾佢,最後仲去咗食韓燒慶祝。其實哥哥Jeffrey同樣係童星出身,當年佢哋兩兄弟仲拍過唔少劇集,宜家見到佢哋都大個仔,真係可以話望住佢哋大,有種老懷安慰嘅感覺。

據知Jacky仔DSE文憑試放榜當日,要求高嘅佢知道自己成績只係得最低入學要求嘅21分之後,立即報定副學士,不過好彩最後都順利入到大學嘅心儀學系。佢宜家就係香港城市大學到修讀媒體與傳播系,空餘時間佢都不忙增值自己,例如學日文、配音、唱歌等等,最近仲同哥哥一齊考普通話水平測試嚟。

Jacky仔今年就讀大學一年級,而哥哥Jeffrey原本會喺今年5月畢業,不過早前佢就去咗英國一年交流,所以要補修多一個學期先可以畢業。畢業後,哥哥Jeffrey希望可以快啲出嚟做嘢,繼續喺演藝圈學習。而Jacky仔趁住唔使上堂嘅時候,會參與拍攝工作同其他公開活動,保持曝光率,希望畢業之後可以繼續做演員,唔知第時兩兄弟會唔會有機會一齊合作呢?