約滿離巢 黃德斌 同女友恩愛湊B仔
上月底約滿無綫的黃德斌，揚言同舊公司展開新形式合作，仍未有新工作的他，不時同圈外女友黃美恩(Joyce)一齊湊仔為樂。日前，一家三口又出動，只見黃德斌同女友湊仔緊張到爆，見B仔扭計扁嘴，黃德斌即慈父上身哄頭埋去肉緊狂啜B仔額頭，又出動手機、玩具出力氹，父愛氾濫！
撰文：Sunday Kiss
圖片來源：新傳媒圖片庫
黃德斌約滿離巢外闖
入行30年的黃德斌先後效力無綫25年，一度在劇集《刀下留人》做男一，但近年已冇乜機會擔正，上月底約滿決定離巢外闖。據知情者透露：「近年德斌唔係客串就係做男二，佢覺得係時候出去闖吓，所以上月約滿都唔續約，想睇吓有冇機會拍內地劇，依家都係搭緊路，未有新動靜！」
拍拖17年
黃德斌有個拍拖17年的女友黃美恩Joyce，雖然至今仍未有結婚計劃，但對女友卻錫到燶，幾年前就打本畀女友在尖沙咀開時裝店，不用開工二人亦秤不離砣。二人在假日不用工作的時間，經常拍拖踩單車，非常恩愛！
稱幫朋友湊
15年初，黃德斌被發現與女友之間多咗個「神秘B」，經常孖住湊仔。據知情者透露：「兩年幾前，已經見佢哋成日湊住個BB，德斌話BB係佢朋友個仔，叫做稀稀，但就冇見過BB父母出現過，我哋都覺得奇怪，但都唔敢問咁多，見佢同女友都好錫個BB，女友仲成日湊埋個B返時裝店開工㖭！」不用工作的日子，黃德斌將全副心機時間去湊仔，本月中，二人湊住B仔到尖沙咀一間平民餐廳開餐，入到去黃德斌先揀個隱蔽位置抱住B仔坐好，B仔忽然扭計扁晒嘴，德斌就緊張到即刻哄埋去狂啜B仔，氹到BB即時笑番。
女友錫手仔
吃了大約一小時埋單走人，黃德斌抱住B仔同女友行去附近攞車，路過報紙檔見到有玩具車賣，佢又即刻買畀B仔玩，期間黃德斌女友不時用手摸B仔面珠及撥他頭髮，更忽然冧爆捉住B仔手仔錫，雖然多次否認係BB老竇，更曾揚言同BB毫無關係，但當日所見，卻似足一家三口幸福家庭樂！
B仔不離手
雖自稱幫朋友湊B，但黃德斌就算同圈中好友戚其義、郭少芸的飯局，例牌一家三口列席，而女友黃美恩為父母慶生都抱埋B仔，關係非常親密！
