重唱《 我和殭屍有個約會 》蔣嘉瑩：無諗過咁大迴響
廣告
近日無綫節目《流行經典50年》請嚟蔣嘉瑩（Vivian）再唱《 我和殭屍有個約會 》主題曲，節目出街後，網民反應非常熱烈，更直呼「好正，勁好聽！」仲話回憶出哂來！Vivian接受Sunday Kiss獨家訪問，透露自己已經升呢做媽咪，囝囝Marvis已經2歲啦！
撰文：Fiona Fong
相片：受訪者提供
感嘆紅歌不紅人
Vivian直言無諗過有咁大迴響，仲有啲朋友節目出街先知原來首歌係佢唱嘅！「唱呢首歌嗰陣自己仲讀緊書，大個咗之後都無乜講自己啲嘢，個節目播咗之後，啲朋友先同我講返：『原來呢首歌你唱嘅，嗰陣我好鍾意睇㗎！ 』」不過對於呢隻歌紅歌不紅人，Vivian都好感嘆。
囝囝都有睇媽咪演出
依家Vivian喺一間德國公司做時裝，2015年仲生咗囝囝Marvis，一家三口好幸福！原來當日囝囝都有睇媽咪演出，Vivian話佢仲好好奇咁指住電視嗌媽咪，好得意！至於提到有粉絲讚佢Keep得好，Vivian就話自己無特別護膚心得。「都係開心，健康最緊要！不過我覺得自己生完小朋友之後，個樣都成熟咗！」
