錢小豪

錢小豪客串《愛回家》同湯盈盈合作 與郭秀雲離婚遺憾無陪龐景峰成長 分離多年靠1事修復關係

熱話

廣告

錢小豪客串《愛回家之開心速遞》最新一集,與弟弟錢嘉樂老婆湯盈盈於劇中做有關動作特技的對手戲,令觀眾相當驚喜。今年58歲的錢小豪是武術指導,經歷過兩段婚姻,前妻是國際華裔小姐郭秀雲,而其大仔都跟隨爸爸、媽媽步伐,加入娛樂圈發展。

撰文:Ling|攝影:Killy Sung(部分相片由受訪者提供)|場地:Blue Place Café (Tel: 2817 1977)

錢小豪客串《愛回家》與弟婦湯盈盈合作

《愛回家之開心速遞》最新一集瑞素(古佩玲飾)為栢菲(湯盈盈飾演)占卜,着她接受新挑戰,將會有新突破。另一方面,接龍集團投資潮偉(袁文傑飾演)開拍全新動作網劇,大小姐(林淑敏飾演)叫栢菲往片場進行直播,以宣傳尋寶圖的產品。拍攝期間,負責電單車飛車場面的女特技人拗柴失場,一時間未找到其他人取替。柏菲有電單車牌,於是自薦頂上,沒想到表現非常出色,順利完成拍攝,被武指團隊負責人(錢小豪飾演)邀請加入特技人的行列。

湯盈盈在Facebook分享多張花絮照片,以及跟錢小豪的合照說:「突破自己接受新挑戰!今晚「特技菲」 @愛回家之開心速遞 看看我們的特別嘉賓! You see who?!? Double the David Double the Fun!」

錢小豪與郭秀雲離婚 錯失多年父子情

錢小豪憑《殭屍先生》爆紅,走紅後接拍了一系列的殭屍片。90年代,他與1988年的國際華裔小姐季軍郭秀雲在澳洲結婚,婚後誕下大仔錢浩然(亦即龐景峰),可惜在大仔三歲時,二人分居並離婚收場,父子見面機會大減,他說:「景峰兩歲開始就好少同我見面,好難見證佢嘅成長,就算見面都有限制,一個禮拜只可以見兩個鐘,所以好多嘢都無同佢講。」

郭秀雲後來再婚,現任老公為「鋼鐵大王」龐鼎元第五子龐傑,錢浩然改跟繼父姓,改名為龐景峰,自小隨母生活。錢小豪也跟丘倩鳴再婚,於01年完婚,婚後育細仔錢穎德。為求不再拍殭屍片,他離開香港,到台灣、大陸拍劇,一度轉戰幕後發展:「覺得自己好沒用,好厭倦,導演好似唔記得畀我演其他角色。」

身為《龍珠》迷的景峰自言細個白白淨冬菇頭,似足《龍珠》的孫悟飯。
身為《龍珠》迷的景峰自言細個白白淨冬菇頭,似足《龍珠》的孫悟飯(圖片來源:Sunday Kiss照片庫)
景峰擅長跳舞和花式滑冰,小時候曾奪過不少獎項。
景峰擅長跳舞和花式滑冰,小時候曾奪過不少獎項(圖片來源:Sunday Kiss照片庫)

龐景峰於14歲開始去外國讀書、獨自生活,他坦言不單止爸爸,連媽咪和屋企人都好少見,一年最多返港三、四個月,而他每次相約見面的第一人,不是媽咪,更非爸爸。「我一定會搵爺爺嫲嫲先,因為佢哋年紀大喇,同埋阿嫲好錫我,錫嘅程度好恐怖㗎!」父子相隔兩地多年,最長試過幾年不見,錢小豪坦言一直記掛兒子,試過日有所思夜有所夢:「佢始終都係我個仔,太耐冇見連發夢都夢見佢。」他自言是人生中的遺憾:「佢嘅成長,對於我嚟講係一片空白。」

近日兩父子四出為新片宣傳,寓工作於玩樂,享受難得的父子時光。
兩父子(圖片來源:Sunday Kiss照片庫)
景峰與媽媽
景峰與媽媽(圖片來源:Sunday Kiss照片庫)

父子檔拍戲感情大躍進 龐景峰視爸爸為英雄

龐景峰現年31歲,長大後跟隨爸爸步伐,加入娛樂圈。他曾被韓國公司睇中成為練習生,出道做歌手,出過唱片。回港後他較專注拍電影,曾被邀請於大陸殭屍片《生化藥屍》飾演錢小豪年輕版,在大半年的攝製期令兩父子感情大躍進,二人終可重拾父子情。對家人十分孝順的龐景峰,從沒有因為父母離婚而冷待爸爸,心底裡依然敬重,小時候看到爸爸的演出更十分仰慕,視他為英雄榜樣「細個睇到爸爸喺電視同電影上面,我對眼係發晒光,覺得爸爸好型,係英雄呀!可以同爸爸一齊拍戲係一種樂趣,唔係人人都有機會,我真係好開心!」

新片《生化藥屍》由錢小豪首次任電影出品人,鄭敬基監製,鄭主動提出找景峰(左)做小豪的年輕版,促成今次的父子檔合作。
《生化藥屍》由錢小豪任電影出品人,鄭敬基監製,鄭主動提出找景峰(左)做小豪的年輕版,促成今次的父子檔合作。錢小豪與龐景峰在過去廿多年好少見面,只是大時大節食飯,今年因為一 套電影大大拉近了他們的距離(圖片來源:Sunday Kiss照片庫)

錢小豪憶述:「佢依家嗌我爹哋真係開心到打冷震,呢半年佢叫我爹哋多過之前20年加埋。」現時錢小豪跟龐景峰合作過幾部電影,曾飾演兩師徒,有不少對手戲,錢小豪大叫溫馨:「感觸良多,兩父子可以合作,要珍惜呢段緣分,難能可貴。現時他希望趁自己還有時間,多與兒子旅行,追趕失落了的父子時光。

錢小豪 龐景峰 重拾父子情
景峰望著爸爸,仍像小朋友仰慕爸爸的眼神(圖片來源:Sunday Kiss照片庫)

龐景峰跟錢小豪學做人 立志做武打演員

從爸爸身上學做一個演員,首先不是學演技,而是演戲的態度。錢小豪強調工作上最重要守時,能早到更佳,最好早兩小時到片場適應及熟讀劇本,並觀察幕後人員的工作,因為拍攝一套電影講求團隊精神,多與工作人員交流絕對有助演員發揮,龐景峰說:「爸爸天未光就敲門叫我起身,要我早兩個鐘學習幕後的重要性,同幕後人員建立關係。」

培養了早兩小時到場的態度,龐景峰亦應用於之後的電影拍攝,令他獲益良多:「可以跟燈光組學砌燈,跟攝影師學砌路軌、調校攝錄機,做演員唔係只顧自己嘅演技。」錢小豪更點出一個容易被忽略的好處,「早起身飲杯茶清腸胃,一早去清晒就唔會拍拍吓戲肚痛。」

對於兒子在戲中的表現,錢小豪覺得中規中矩,值60分,尚有好大的進步空間:「佢始終係新人,我希望佢盡快適應拍戲狀態,呢個要經驗累積番嚟。拍戲要有好多才華,套戲要你做畫家,你就要似畫家;套戲要你識潛水,你就要識潛水,唔係對住屋企塊鏡就學到,做演員好多嘢要學。」

景峰遺傳了爸爸的武打潛質,立志做一個出色的武打演員,兩父子因此有更多交流,像朋友般相處。
景峰遺傳了爸爸的武打潛質,立志做一個出色的武打演員,兩父子因此有更多交流,像朋友般相處(圖片來源:Sunday Kiss照片庫)
小豪希望追趕與兒子失去的時光,多去旅行歷險見識。
景峰遺傳了爸爸的武打潛質,立志做一個出色的武打演員,兩父子因此有更多交流,像朋友般相處(圖片來源:Sunday Kiss照片庫)

龐景峰想同爸爸拍戲 錢小豪想跟兒子四出旅遊

龐景峰對演戲充滿濃厚興趣,覺得做演員好好玩,可以擴闊自己眼光,學習更多,他更希望繼承爸爸的武打戲路,立志做一個出色的武打演員,現正積極裝備自己,勤力跑步、做gym、打拳、潛水:「可能將來有套戲要我潛水呢?我要預備定。之前見到劉德華拍廣告墮馬受傷,所以我都去咗學騎馬,做演員最好玩係可以學好多嘢,仲學到以前父母唔畀學嘅嘢,好似玩槍、飛車!」

錢小豪聞言自己都有潛水牌,約定將來兩父子一齊旅遊潛水,龐景峰十分期待道:「我想同爹哋一齊拍啲歷險節目,即係潛水、爬山、征服雪山呢啲,難得呢個爹哋真係做到吖嘛!」錢小豪喝停他不要再談公事,不如來一次輕輕鬆鬆的父子旅行:「拍攝去玩喎⋯ 真係去玩先開心㗎嘛,為工作而去就唔好玩㗎喇。」龐景峰笑言要把握機會拍攝留念:「我好ready,你身體都OK,我哋玩到呢啲遊戲呀!」

龐景峰正值壯年,事業心重,希望與爸爸有更多工作上的合作;錢小豪的想法卻相反,已在影圈打滾多年的他,只希望與兒子四出旅遊,增廣見聞:「見識多啲呢個世界係大家嘅寶庫,唔係去東京shopping,係去喜馬拉雅山、巴布亞新畿內亞睇風土人情,可以學到好多嘢。」龐景峰點頭和應,但仍然滿腦子工作⋯⋯「我好想同爹哋拍一場精彩嘅武打對手戲,第日老咗可以睇番⋯⋯」錢小豪沒好氣道:「我打贏你又話我恰你,你打贏我就不孝,何必拍呢?」

拗手瓜,究竟鹿死誰手?
拗手瓜,究竟鹿死誰手?(圖片來源:Sunday Kiss照片庫)
景峰指自己與爸爸和叔叔錢嘉樂是三個大細路,鍾意打交睇動漫,大家好啱key!
景峰指自己與爸爸和叔叔錢嘉樂是三個大細路,鍾意打交睇動漫,大家好啱key!(圖片來源:Sunday Kiss照片庫)

與爸爸叔叔像大細路

經過大半年的相處後,錢小豪有感景峰真的長大了,不再是深印腦海中的BB樣:「我對阿仔最深嘅印象仲係3歲雛型前,之後斷斷續續有見吓面,一齊同佢爺爺嫲嫲飲茶,依家真係見到佢成長咗,又靚仔過我,工作態度好,對人又有禮貌,我了解佢多咗好多。」兩父子現在一碰面會分享工作點滴,錢小豪希望兒子會向他分享更多,「好似識女仔嗰啲嘢啦。」

小豪話聽到兒子不斷叫他「爹哋」,開心到打冷震。
(圖片來源:Sunday Kiss照片庫)
景峰最渴望做忍者,出街會一時興起爬樹影相。
(圖片來源:Sunday Kiss照片庫)

兩父子縱使多年不見,但一拍即合,大家有相同嗜好,有許多共 同話題,龐景峰笑言兩父子加上叔叔錢嘉樂都好玩得,又鍾意睇動漫,活像三個大細路:「我哋都攞咗細路仔嘅夢想做出一番事業,好似飛車、打交、動作,我哋三個喺呢方面溝通得好好,因為我哋都係大細路。」錢小豪外表較嚴肅,外界以為他是一名惡煞,景峰澄清爸爸是個百分百好人:「佢為人好好,仲會講好多爛gag!」

景峰指爸爸少教他武功,反而叔叔錢嘉樂有教他倒立和玩BB槍,又會拿爸爸的限量版超人公仔給他亂射。
景峰指爸爸少教他武功,反而叔叔錢嘉樂有教他倒立和玩BB槍,又會拿爸爸的限量版超人公仔給他亂射。(圖片來源:Sunday Kiss照片庫)

同父異母的弟弟愛賽車

至於同父異母的弟弟錢穎德已經19歲,龐景峰與他的年齡相差12年,坦言兩兄弟較少見面,但會盡量爭取機會連繫兄弟感情。現年19歲的德德喜歡潛水、打碟、跳舞、打泰拳,最愛玩賽車,夢想是參加 F1 世界一級方程式賽車,錢小豪希望德德努力向目標進發。景峰笑言自己有玩過賽車,但興趣一般: 「我啱啱拍戲先炒咗叔叔幾部車,對唔住叔叔!揸車係好玩,但我冇passion喺呢度,我寧願去做忍者,爬上樹做忍者好好玩㗎!」

小豪的細仔德德熱愛賽車,夢想是參加世界 一級方程式賽車。
小豪的細仔德德熱愛賽車,夢想是參加世界 一級方程式賽車。(圖片來源:Sunday Kiss照片庫)
(圖片來源:TVB《娛樂新聞台》截圖)
(圖片來源:TVB《娛樂新聞台》截圖)

圖片來源:TVB《愛回家之開心速遞》截圖、Sunday Kiss照片庫、TVB《娛樂新聞台》截圖、Facebook@湯盈盈 Angela Tong