陳凱琳成千萬KOL憑一招收服鄭嘉穎 中文差上台講錯4字＋被鬧演技受打擊

陳凱琳被爸爸影響愛影靚相 無心插柳成為KOL

主持Do姐於節目的開段，首先問嘉賓陳凱琳：「成日呢都有人話Grace呢係人生勝利組，樣樣都好好，屋企好好，又嚟選Miss Hong Kong，其實我做過你一堂導師，當時一眼就知係呢個（你當選），仲選乜鬼，之後就平步青雲，然後又識左一個咁Handsome嘅老公鄭嘉穎，再生埋小朋友，依家睇新聞又話你做KOL好成功，你點解睇自己係咪人生勝利組？」

陳凱琳指未生之前還以演員為人生目標：「相信依家有好多女性我地係Slash（斜槓），好多唔同嘅角色，依家我都係處住一個好莫名奇妙發生嘅事，因為當初佗住第一個小朋友嘅時候，我好記得當時仲同陳慧琳做一個活動，佢同我講：『你生完之後，你唔會再係呢一行咁樣去拼搏㗎喇』我仲話一定會繼續好努力咁去做一個Career woman（事業型女性）。」

她解釋自己其實是無心插柳成為KOL：「但點知生完兩個之後，原來我真係想無咁多幕前，想做多少少媽咪呢個Responsibility（責任），我就諗如果係屋企畀到時間自己，可以做啲咩呢？不如影吓靚相啦，就係咁樣開始諗住自己有啲回憶，漸漸發現原來出面嘅人都鍾意，而開始接到呢一類型嘅工作。」

她指自己小時候很多興趣，學過芭蕾舞、游泳、溜冰：「我無嘢專，無嘢叻，但樣樣嘢都識！」她又指爸爸很喜歡影相，大家姐不太理會她，弟弟更加不會理會，只有她會穿靚裙，很享受：「Daddy我準備好喇！」爸爸就會很開心，令她漸漸愛上影相。

被叫「千萬KOL」唔開心 澄清老公愛佢夠慳家

Do姐問到關於陳凱琳轉型成為賺過「千萬KOL」的報導，陳凱琳直認看到報導報有點愕然和不開心，她澄清自己很慳家：「當然賺嘅錢唔係咁大，（沒有千萬？）絕對無啦，但呢樣好難同人澄清，我覺得要感恩我們現在所擁有，我亦唔會每次買名牌騷畀大家睇，我唔係呢類人。我老公講點解佢咁鍾意我，就是因為我好慳家，我都唔知呢個係咪讚。生咗小朋友令到心態上都有一定嘅改變，因為乜嘢都要用錢。我唔想大家注意喺錢銀上，疫情期間令各行各業工作上有啲困難。呢個時候講呢啲嘢就覺得好唔舒服，一來無咁嘅事，二來唔係想炫耀。」

「奮不顧身」講成「粉身碎骨」被人笑：我好多陰影

Do姐問到陳凱琳於當選港姐後入行，接觸不少範疇的工作，有否對那一類型的工作充滿熱情和興趣，陳凱琳就笑言拍劇、做主持都OK：「我初初以為自己會好鍾意做主持，因為真心覺得Do姐喺台上直播做主持完全好順暢，又充滿壓台感，成日覺得係好有力量，但我每一次上台個心都好似緊張到想飛出嚟咁。」Do姐：「你個樣好定啊！」陳凱琳答：「呢個就係我做戲嘅天份。我驚係因為中文方面唔係我強項，我驚成日講錯嘢…」

Do姐重提陳凱琳早年在台慶主持時，誤將「TVB每一個藝員都真係奮不顧身」講成「TVB每一個藝員都真係粉身碎骨」，Do姐坦言知道大方的陳凱琳不會介意這個玩笑，並大爆她當日綵排時已講錯很多次，但沒有人發覺：「肯定我綵排時都無講過奮不顧身（無講過一次啱），當正式講完落台都未意識到。」

但陳凱琳指爸爸會笑她，因為爸爸中文係好叻，也希望她的中文能像自己一樣好：「我全部嘅劇本都係佢用錄音筆幫我錄，幫我睇晒啲中文，細細個佢畀我睇《成語動畫廊》，可能對我期望就係四字詞語好叻，但點知我係識講，唔明囉。」Do姐說：「搞到你變咗陰影，唔好意思啊！」陳凱琳自爆其實不只那次：「我好多陰影！」

拍劇受到批評成入行最大打撃 有放棄做演員想法

入行後，另一個工作範疇拍劇，對藝人來說也是一個大挑戰，但拍攝期間NG亦是每個藝員必經的階段。而陳凱琳坦言自己非常熟讀劇本，因為自己自知自己的中文水平不太好，雖然得能流利讀出廣東話，亦可以在香港正常生活，但她嘲笑自己認字的能力可能是小一程度的五、六成，所以臨時未必得夠牢記對白，她會在事前熟讀。

拍劇雖然是一個很大的考驗，但陳凱琳表示自己非常喜歡，但她剖白當時受到觀眾的批評也感到不知所措：「我覺得拍劇係我嘅Passion（熱情），我好鍾意演戲，最大嘅打撃就係別人會覺得唔好：『你做戲都唔好睇！』咁你又會開始有種混淆，我應唔應該做呢一行呢？當時無一種好實在嘅感覺，呢一樣嘢係我有把握去做。」

感激媽媽當年為家庭犧牲事業 成為榜樣

最後Do姐問到陳凱琳現時是否將重心放到家庭上，陳凱琳就解釋自己一直都以家庭為重，從小都非常重視家庭觀念。她感激身為職場女強人的媽媽當年為了他們犧牲事業，讓她在成長路上一直有父母的陪伴，令她明白到擁有的幸福都不是必然，必須由父母的付出才得到：「呢個犧牲好大。」現時，她都希望自己能夠分到更多的時間陪伴小朋友，她指現在三歲囝囝喜歡唱歌、跳舞、表演，會安排一些音樂班給他。