陳柏宇指早年識老婆因1理由早就分手 自爆每次教用絕招化解爭執 成功維繫感情

20歲識符曉薇九成九會分手

陳柏宇一向鍾意吹水，程度去到網民封他為「陳伯」，所以他索性拍片分享愛情觀。他直言如果20歲認識符曉薇九成九會分手，因為他指對方鬧交時很無賴：「我會頂唔順佢某啲嘢，一定唔會頂得順，佢鬧交嘅方法我係搞唔掂。」但現在的他會受得了，因為會明白這是她的性格。

他又爆料指老婆常常吃過期麵包：「我話麵包過咗期，佢話麵包過期唔怕。老婆叫我食，我就話我唔食喇，但我唔介意你食。第一，你唔好逼我食；第二，你唔好逼我個女食。你想食過期麵包無問題，隨便啦！」

分享美滿婚姻維繫方法

講起雙方鬧交情況，他自爆並非每次一有不滿意就會跟老婆坦白，受得住都會頂：「有時嘢我食得嘅就食晒！」除非那件事令他很生氣，他才會說出來。他憶述有次邀請朋友在家吃飯，老婆想煮很多餸菜，他認為太多，最終只準備他認為合理的份量。開飯時，他老婆故意吃零食，然後埋怨餐飯份量不足：「我老婆賤賤格格，特登食其他嘢。」最終有剩菜，但他為了緩和大家矛盾，沒有刻意寸老婆。

他以過來人身分認為沒有可能令老婆發少點脾氣：「死咗條心佢！」只能在老婆發脾氣時聰明點，不要挑戰她，或者不要挑戰到她發脾氣才停止，就是維繫感情的關鍵：「我完全明白，但作為偉大嘅我哋，係要忍讓。因為佢發脾氣嘅時候係無理智，唔係講原因，唔係同你討論…佢唔想中立，唔想你認錯，佢只係想發脾氣，你由佢。」到事件緩和時，他就會問一句：「嬲完未啊BB？不如我哋一齊食飯？」就會解決到。

陳柏宇認為信字很重要 容許老婆同前度見面

他指兩個人之間，信任很重要。他大爆老婆偶爾會跟前度見面，但他不會阻止他們聚會，因為他覺得這是小家的行為：「我無特別大方，咁大佬佢哋依家又唔係出去偷食，出去食飯之嘛。咁人哋都有過幾年感情，係朋友。」他坦承自己都有跟前度見面，但他不會對對方有非份之想，也從不會打算復合：「我係唔係每次都諗…我哋曾經都咩吖…梗係唔係啦！你唔係咁諗，點解下下都覺得人哋係咁諗？」

他又指老婆知道他所有社交平台的密碼，幾時都可以直接拿他電話看看其行程：「邊個傳訊息畀我，無傳畀佢，佢自己開嚟傳畀自己。」但他直言自己沒有甚麼需要隱瞞，覺得無所謂。

符曉薇曾公開踩陳柏宇 終攜手打破婚變傳聞

其實四年婚姻中，他們曾經傳過婚變，事緣今年六月，符曉薇突然在Instagram發表限時動態，鬧爆陳柏宇與她一起接受訪問，雖然她對對方讚不絕口，不過對方回應卻令她覺得好像寸她沒有用，對家庭沒有實質貢獻，事後更直言覺得相當委屈，曾一度想離家出走：「真係好想去打牌，之後見到個schedule你今日要唱歌，之後我又cancel咗佢哋。費事你無精神。但係真係好想離家出走。」

她更重提二人結婚時的事，直言當時「我乜都唔要就嫁比你」，雖然陳柏宇當時「無求婚，無禮金，無過大禮」，不過但她仍「將自己嘅金器俾晒你賣，因為我一路覺得你值得。值得我乜都唔要，淨係要你。」但因為那次訪問後，令她覺得陳柏宇不珍惜自己，勸對方不要再踩到她一文不值。

事後陳柏宇寫千字文向她道歉，還澄清一家三口仍十分恩愛。而她亦解釋之前的埋怨全因誤會而起，又指對方是個值得付托終身的人：「一個會用心去哄你仲會用千字文認錯嘅男人其實好難得…有個唔怕煩，會用心去告訴對你嘅愛嘅人，呢個人值得你穿白色婚紗，付托終身畀佢，我已經搵到。」

陳柏宇一家搬去何文田住1500呎大屋

陳柏宇最近已搬到何文田新屋，有指其新居近1,500呎。大廳有落地大玻璃，背後有個小露台，旁邊有大飯枱。囡囡有自己房，大過陳柏宇間房，又展示雜物房、晾衫房。而全屋最大的一間套房近300呎，陳柏宇用來做衣帽間，放了三個大衣櫃，又有個大廁所、化妝枱等等。全屋連工人房總共有四個大廁所，一家三口加外傭姐姐任何時候都毋須爭廁所用。