楊思琦

楊思琦 默認有人追 想生多個

熱話

廣告

港姐冠軍 楊思琦 三年多前跑到美國未婚誕女,獨力撫養女兒Krystal,女兒隨母姓楊,叫卓穎,轉眼間已三歲半。在艱難時刻, 楊思琦 決定放棄大樹遮蔭,去年約滿無綫後離開外闖,希望給予女兒更好生活,並努力重建形象。外界對 楊思琦 冷嘲熱諷,但她人緣好,身邊的工作人員甫見筆者,旋即為她大抱不平,指她一直低調努力工作,對身邊人又好,希望外界別再打擊她。

 

楊思琦 以女兒為重

Krystal年紀尚輕,未有過問身世, 楊思琦 表明終有一日會向她坦白,亦有想過為她建立一個完整的家,生多個細佬妹陪伴。她默認有人追,但不敢想太多,「異性朋友都多關心嘅,但要睇點界定啦,我唔諗咁多嘢就唔覺得係追緊。」

母兼父職 北上外闖

母兼父職絕不容易,全靠楊爸爸和楊媽媽幫手湊孫, 楊思琦 才放心北上搵錢養家。離開大台一年,思琦得到更多演出機會,拍電影、港台劇、內地劇都有兩部,還參與一些綜藝節目,現正為有線主持寵物節目《寵物ER 3》,逢星期日播出,去年底亦在內地參加了一個歌唱比賽,與黃凱芹、曾航生及林志美等唱家班較量,包尾出局意料中事,但思琦唱得好開心,「能夠同台演出已經好榮幸!」
思琦愈來愈喜歡唱歌,都是囡囡培養出來,「成日同佢喺屋企唱歌,佢咩歌都鍾意,有時會叫我播歌:『媽媽我又要聽歌,播我聽嗰啲!』童謠呀、英文兒歌佢自細就成日聽,佢識唱好多,我又跟埋一齊唱,我因為佢認識咗好多小朋友歌,以前邊有咁多呢啲。」

在職媽咪 體力持久戰

面對突如其來的轉變, 楊思琦 為人母親後,覺得責任心更重,工作的出發點亦事事以女兒為先,雖然辛苦,但一想起女兒就會捱得過。「離開舊公司要重新適應環境,都花咗一段時間探索新事物,但作出轉變係為咗長遠嘅發展同生活,想趁有氣有力睇多啲嘢,睇吓仲有咩想做,以往喺公司咩都安排好,跟通告去做,唔知接一份工作嘅過程係點,依家我清楚晒。」
楊思琦 要孭起頭家,一定要做在職媽咪,最大困難是時間分配,「成日唔夠時間用,陪佢嘅時間比較少,始終要兩邊兼顧,體力上係持久戰,日頭做完嘢夜晚返去照顧佢,真係好疲累,第二朝就算唔使返工,都要一早起身送佢返學、整其他嘢,瞓得幾個鐘,佢送咗個眼袋俾我囉。」

生父斷絕來往

Krystal在單親家庭長大,家庭背景與其他同學不一樣,但她從沒過問身世,思琦正等待適當時機坦白,「等佢大個懂事啲,都會好正常咁話俾佢聽,唔需要隱瞞。」三年來,母女生活一直安好,年初卻有報道指生父吳帥突然上門搵女,思琦斷言否認,「冇咁嘅事!」堅持斷絕來往。
重新給予女兒一個完整的家,思琦都有考慮過,甚至想為她添個弟妹,她笑說:「其實都想㗎,但我依家冇咁嘅能力喎,佢冇要求嘅,但有時見佢一個人好悶,如果真係有細佬妹會更開心,有啲朋友生兩個,個媽媽都唔使點理,兄弟姊妹會自己玩,容易溝通,學嘢都快啲。」

當起惡媽禁長輩縱容

有媽媽及公公婆婆錫,Krystal一樣活得開心,她性格男仔頭,非常活潑,特別鍾意跳舞放電! 楊思琦 笑言囡囡沒時停,「佢活躍到不得了,我細個好靜㗎,冇咁活躍,我媽媽話佢同我完全相反,佢好鍾意講嘢,人哋媽媽叫個女做咩就會做,佢會不停問點解呀,我唔鍾意!好有自己主見,佢呢個性格都好嘅,開心唔開心都會講你知,有問題就即刻糾正佢。」
外表弱質纖纖的思琦,返到家中變成惡媽,因為公公婆婆都是大好人,年紀小小的Krystal已經學得好精,知道邊個最恰得,「我係全屋對佢最嚴厲嗰個,公公婆婆比較縱佢,尤其係公公最寬鬆,想糾正孫女錯誤都笑笑口,明明唔啱仲笑住講,我叫公公即刻入房等我話佢!而婆婆就照顧佢嘅時間多啲,阿女有時都曳曳蝦婆婆㗎,叫佢做嘢又唔做,喺度扭計,要我講佢先聽。」

收小龍包聖誕禮物

3歲的Krystal剛完成St. Catherine’s N班課程,準備升K1,思琦不便透露是原校直升或選另一間,但她覺得女兒在St. Catherine’s讀得好開心,更有陳慧琳細仔小龍包做星級同學,「佢返到屋企會講同學個名,有提起Riley劉琛,我問有冇同佢玩呀,佢話有呀,講吓一齊上堂嘅情況,佢哋幾好朋友。」
兩個小朋友好有緣份,聖誕節抽獎都抽到對方的禮物,思琦笑說:「Kelly份禮物係泥膠,可以整好多公仔,其實好好呀,可以訓練小朋友大小肌肉,好啱呢個年紀。」Kelly的禮物搵啱主人,Krystal非常喜歡玩泥膠,周圍黐到好污糟,被婆婆投訴,「依家規定佢只可以喺張枱玩,執好嘢先准走,唔准周圍黐!」不過兩位家長Kelly和思琦各有各忙,好少機會交流,但思琦就有叮囑女兒,記得多謝Kelly和小龍包。

解決小孩食飯太慢

小朋友進食問題令家長好頭痛,要擔心食物有冇營養、夠唔夠飽、仲要擔心食幾耐! 楊思琦 囡囡Krystal每次食飯食三個鐘,令思琦好激氣,「佢食嘢好唔專心,或者含住嚿飯唔吞,真係冇晒符!」想吸引小朋友食快啲,可以把健康飯菜弄成可愛圖案吸睛,小朋友就會專心進食,又有營養!

Krystal飯(以你的小朋友名字名命)

材料:
白飯(1湯匙茄汁拌勻)
多色螺絲粉 200g
沙律菜、番茄、芝士、荷蘭豆、紫菜 少
許雞蛋 1隻

1.用飯及螺絲粉砌出頭和頭髮,沙律菜做裙子,荷蘭豆和番茄按喜好放好伴碟。

2.用紫菜砌樣子,雞蛋以造型模具小火煎熟。

3.最後用茄汁唧出小朋友的名字。

貓貓小食材料:

材料:
紙包蛋糕 1個
芝士 1片
迷你粟米筒 2個
餅乾條 2-3條
紫菜 少許
水果 適量

1.切平紙包蛋糕,倒轉放平。

2.用芝士及紫菜砌出眼和口,餅乾條做貓鬚,粟米筒做耳仔,以牙籤固定位置。

3.最後放上生果伴碟,完成!

 

●撰文:Ling

●攝影:溫俊鏘(部分相片由受訪者提供)

●場地:Cakeaway Cooking Studio (3568 3720)

●鳴謝:陳家珍導師