【咁都得？】18同事夾$1314做人情 新娘委屈嬲嬲豬
廣告
結婚係人生大事，囍事當然想同人分享，但唔係個個收到「紅色炸彈」都會高興！一講到「做人情」，好多時都係友情大考驗！湖北有位新娘子，一心諗住請晒廿個同事嚟飲，點知有18個甩底，仲要夾份做$1314元人民幣人情贈慶，搞到新娘冇晒面，又嬲又委屈，諗住PO上網公審，點知被一眾網民笑番轉頭！
撰文：Joanne 圖片：電影截圖
一人夾$73蚊做人情
26歲嘅新娘子小徐，喺重慶一間大公司返工，成個部門有20人。同事之間間中都會有拗撬，不過表面關係都叫過得去。今年10月中，小徐宣布結婚，喺鄉下擺完酒，又喺城入面請班親戚朋友同同事飲，派帖嗰陣，個個同事都話人到禮到。
點知，擺酒當日成個部門只係得主管同一個同事代表出席，一張廿人大枱只係坐得兩個人，其餘18人都甩晒底，小徐梗係嬲嬲豬啦！到散咗席，仲要收到同事嘅微信轉賬，18人夾「1,314元」，即係一人夾$73蚊，兼祝小徐同老公「一生一世都相愛」，新娘子又激氣又委屈。
事關有同事結婚，小徐都實會盡可能去飲，就算唔係好熟，人情都會做到足，仲過「少過三舊」都畀唔出手。但係到自己結婚，同事唔止夾錢做人情，仲覺得祝福「一生一世」，根本就係特登玩佢。
喺火遮眼之下，小徐就喺社交平台抒發鬱悶，點知反而被網民揶揄：「你高估了跟這些人的感情」、「說明同事關係極差」、「估計擔心新娘很快就離職了」。
人情應該做幾多？
香港婚宴嘅款式愈來愈多，有中式有西，大排筵席都分「酒樓價」同「酒店價」，咁人情又有冇「公價」呢？據婚禮統籌公司做嘅調查，而家最普遍嘅婚宴模式有4種，人情價位分別係：酒樓$800、酒店$1000-$1200、午宴$600、雞尾酒會$500。第時去飲，就可以參考吓喇！
