張嘉耀360秒人生課堂｜34歲拒煙酒患癌未期 曾拒醫多得來頭勁契爺＋太太救命

360秒人生課堂｜唔煙唔酒生活健康 34歲患淋巴癌末期曾拒醫

已移居澳門多年與太太生活的張嘉耀，於八個月前證實有惡性腫瘤，患上淋巴癌第四期有惡性腫瘤，癌細胞入了骨髓，由大隻佬，後來連頭髮都掉光了，變成光頭佬。

他指是位健身教練，一直以身作則，協助身邊人更加健康；又指自己平日生活節制檢點，唔煙唔酒，作息正常，更勤做運動兼有控制飲食，故此得悉患病一刻令他大受打擊:「細個時好多大人同我講，只要你努力一定有回報，所以我一直都好努力…呢樣嘢我完全唔能夠接受，呢個就係我努力嘅回報？咁都會生Cancer？Why Me？點解話呢個世界係公平？我覺得好唔公平。」由於事件超出他的認知及能力接受範圍，他一度選擇逃避，除了要求太太 NaNa幫他保密病情﹐更一度拒絕接受治療，苦了自己亦苦了身邊人：「期間我同老婆講『你一隻字都唔好提』，我唔相信呢件事發生喺我身上；仲話醫生講咩都好，我唔會理、唔會醫！」

360秒人生課堂｜多得契爺救一命 原來對方是陳山聰哥哥

張嘉耀直到獲得契爺苦勸及啟發，他想到很愛自己的太太、契爺契媽、及在香港一直支持他的父母家人，他終於想通。為了愛的人，他決定重新振作，不再自暴自棄:「唔發生都發生咗，我問幾多句點解都返唔到轉頭。我老婆咁靚，如果無咗我，佢孤伶伶喺呢個世上好可憐。我亦好掛住香港嘅屋企人，好想返嚟見佢哋。於是我變得好積極、好配合，我唔想死呀！我仲有好多嘢想做。心態決定一切，所以我選擇咗接納同面對，好得意㗎，你心態變咗，事情亦會因而變化。」契爺當時馬上安排張嘉耀盡快接受醫治，幸好他接受契爺的安排，否則病情惡化。

他的契爺間接救他一命，功不可抹，原來其契爺是陳山聰的哥哥陳山海，他在節目中透過視像與張嘉耀通話，令他驚喜流淚。陳山海指二人都很喜歡運動，如跑步，張嘉耀是其健身教練，好有默契，所以一知道對方病情，即取消原本由廣州行去澳門的慈善行活動，幫他安排一切：「我大佢廿幾年，生活上、話題上又冇乜隔膜，所以收佢做契仔。收到呢個消息，我簡直覺得晴天霹靂！我用積極態度勸佢求醫。」陳山海不忘鼓勵他：「Clark你得嘅，一定得！你依家好番，一定要將正能量傳畀大家！有病，只要肯醫就冇問題！」

陳山海在澳門生活，是運輸公司世運行老闆。而他老婆是有「澳門Ball后」之稱兼澳門時尚雜誌《Soda》創辦人的Sophie李碧君，父親是建築承建商，而她精通中、英、日、法四國語言，跟「洗米華」周焯華的太太Heidi是好姊妹，與四太梁安琪亦是好友，同時與不少無綫圈中人稔熟，已跟陳山海結婚16年。

360秒人生課堂｜化療副作用多 因瞓得好流淚

心態決定一切，張嘉耀選擇接納及面對的張嘉耀由黑暗走進光明，不但獲得身邊人大量祝福，亦看見了逆境中的曙光—感恩:「唔知大家有無試過因為瞓得好而流眼淚？我好記得我第三次化療後嘅第二日，我瞓醒時好驚訝我瞓得咁好，一覺瞓到天光。我之前兩次化療，頭痛、嘔心、反胃、瞓得唔好…我喊住覆契爺，我瞓得好好，我活咗34年，未試過因為瞓得好而流眼淚嗰日我呢世都會記得。」

360秒人生課堂｜老婆壓力爆煲致甩頭髮

「放棄容易，堅持困難」，因張嘉耀堅持配合醫生指示，最終奇蹟地半戰勝癌魔，正在康復路：「我依家要打標靶，但唔使化療，對身體少啲傷害。」他除了要多謝自己咬緊牙熬過難關，太太Nana亦是功不可沒。Nana 最壞時期除了要消化老公患癌噩耗，更要應付陷於情緒低谷的老公，最終Nana壓力爆煲致甩頭髮，身在澳門的Nana透過隔空通話重提當時情況:「我嗰刻先意識到自己有幾大壓力。」之後兩公婆更大晒恩愛兼互道「我愛你」，場面感人！

360秒人生課堂｜患罕病吳香倫全靠老公

對於張嘉耀的故事吳香倫亦大為感動，本身患上罕見病皮肌炎的她，坦言自己得悉患病一刻同樣難以接受:「我心諗點解咁難中嘅病都會喺我身上發生？初初我真係好氣餒。張嘉耀嘅故事我感同身受，當初我知道有呢個病後我覺得好無助。」幸好遇上好醫生兼有好老公共同渡過，令吳香倫堅持不放棄:「我初初患病仲係新婚，我唔可以要我老公咁辛苦照顧我，我覺得心態好緊要。張嘉耀心態非常好，佢無選擇逃避而係積極面對，已經係成功嘅開始。」