鄧一君

「香蕉爸爸」鄧一君 唔想個女做童星

育兒

廣告

9歲童星出身的 鄧一君,入行廿年星途浮沉,一直做主角背後的細佬角色,收入話多不多,話少不少,夠自己食但想養妻活兒就有壓力。2005年適逢有人介紹做保險,決定博一博轉行,不斷進修增值下,短短幾年已擢升高層級,生活穩定後迎娶拍拖多年的女友Almond,2008年誕女鄧頌情(Kristen),成為幸福小男人。
鄧一君 雖沒大紅大紫,但17歲拍到一部成名作《記得…香蕉成熟時》,講述青春期的成長疑惑,人人叫他「香蕉仔」,是新一代父母的集體回憶。如今香蕉仔升呢香蕉爸爸,他不希望囡囡重蹈爸爸覆轍,踏上童星之路,失去了正常的童年生活,「拍戲好辛苦㗎,所以都刻意想佢低調啲。」

童星生活很孤寂

新一代童星好搶手,做model、拍戲、拍廣告,甚至出寫真,好快就儲到一筆快錢讀書用,在學校亦成為風頭躉,家長都希望自己小朋友可以成為童星。「元老級童星」 鄧一君 大嘆以前做童星並不風光,返學被同學排斥,放假活動只餘下拍戲,縱使戲份不多,但並沒因為小朋友獲厚待,被視如咖喱啡要在片場由朝等到晚,為的只是幾個鏡頭,惟有在片場做功課、溫習過日辰。
「以前拍戲成日捱更抵夜,放聖誕假、農曆新年唔使返學就係拍戲黃金日子,一放假就拍戲,有時學校課外活動成班去旅行、燒嘢食、參加童軍、打波、游水,我全部都冇參加,根本就脫晒節。」一君感慨童年沒朋友,同學群起杯葛,拍戲與一班小演員亦沒聯絡,令他有個不愉快的童年,「平時冇一齊玩吖嘛,點會同你friend?第二就係人有妒忌心,你係明星咁多人識,我哋呢啲升斗市民點敢接近你吖?好叻咩?懶係勁咁!所以更加冇朋友,真係超唔開心呀,日日lunch time、小息得自己一條友,冇人同我玩,我又被動,唔會行埋去話『我又玩呀』,日日望住球場發吽哣咋!」

入錯行連累讀書

無朋友、拍戲累,連讀書都沒心機,有時lunch time、小息只顧睡覺,令他學業成績一落千丈,「我讀書好差㗎,唔識就由佢,唔會去鑽研,明知實考都唔讀,寧願唔要個分。直到依家先開竅,讀書勁咗好多,唔明會研究到明,如果真係考我又唔識咪好戇居?依家先識諗囉。」
一君大嘆自己入錯行走上不歸路,9歲之年,香港電台招募兒童節目及教育電視小演員,他貪玩參加被選中,「嗰時拍港台啲正經嘢唔使捱更抵夜,唔辛苦,好玩嘅,但一踩入電影圈就兩個世界,複雜好多,有人知我拍過教育電視叫我去casting,開頭都係做咖喱啡同配角,直到93年《香蕉》cast中咗先做主角。」

香蕉仔愈做愈奀

憑《香蕉》一片成名的「香蕉仔」,其實拍攝期間不太了解劇本,就像一個工具被指揮拍攝,從沒想過會爆出,「我淨係記得導演同我講:『嘿!呢套戲出咗街你紅梗!』我仲話唔會咁嚴重呀?」結果一言中!該片成為經典青春片,「香蕉仔」亦成為一君的代名詞,更獲提名《香港電影金像獎》最佳新演員,《香蕉》系列再添食兩輯,不愁沒戲拍,星途看似很順利。
加入TVB初期受力捧,每年最少三部劇,惟十年間一直做主角的細佬,還愈做愈奀,有野心的他不甘於此,萌生去意。「如果我志在搵兩餐,咩角色都冇所謂,我係唔使轉行,但我唔甘心成世做人阿仔、宣萱細佬、古天樂細佬、歐陽震華個徒弟,我希望能夠獨當一面,自己做殺手,拍吓《無間道》,做梁朝偉嘅角色,攞吓金像獎,但要去到呢一步好遙遠,最慘唔係勤力就得,咦你捱咗好耐喇喎,今次俾主角你做啦,唔會咁㗎!寧願俾個新人都唔俾你做,所以我係時候要轉變。」

29歲轉職保險

2000年是一君最消極的日子,想轉行又不知可以做甚麼,不敢踏出另一步,「如果再唔轉,我可能會有抑鬱症。」香港苦無機會,好多藝人北上發展成功,劉愷威就是其中一個好例子,鄧一君當年都有機會,獲黃百鳴介紹北上拍劇,但他寧願沒工開也拒絕北上。「返大陸拍戲好辛苦,又冇人睇,我自己都唔睇,仲要成日困喺酒店好悶㗎,我又唔去夜場又唔飲酒又唔埋堆,我好乖㗎嘛!」
適逢朋友介紹,又得到當時仍是女友的Almond支持,他寧願選擇轉行做保險,「我當時29歲,再唔轉39歲更加唔敢轉,所以鼓起勇氣跳出框框,原來都唔係咁驚,冇戲拍唔會死㗎喎。」雖然後悔當初入錯行,但他正面地回想,廿年的演藝經驗對保險業都有幫助,有助演好「專業保險顧問」的人生角色,「拍戲學識咗兩個字『投入』,係一個演戲技巧,終身受用。工作要盡快做得好,一定要投入,要做好一個『專業保險顧問』,我就去觀察做得好嘅人點講嘢、點做嘢、外形、眼神,我照樣模仿,衰又衰在我扮得幾似,我做咗三個月啲人以為我做咗十年!梗係啦,我一早當背劇本咁背晒專業名詞去present proposal,其他新人仲喺度懶懶閒。」

孭起頭家好享受

成功在保險業站穩腳,下一步就決定結婚生B,終於實踐對Almond的承諾,2008年誕下一女頌情,一家三口樂也融融。自女兒出生後,徹底改變一君的性格,從吊兒郎當的仔變成負責任的男人,「以前做嘢覺得做又得唔做又得,我冇咩家庭責任,有個女之後覺得責任好大,原來當一個人有家庭責任,做嘢態度係好唔同,認真積極好多,唔怕困難逆境,因為你知道為咗屋企要咬實牙關捱落去,不過呢種唔係壓力,我覺得係動力,我幾enjoy有責任孭喺身去工作。」
一君享受做個負責任的爸爸,亦身兼女兒的朋友,「我哋會有商有量、有傾有講、互相幫助,我係唔會擺起個款,好家長式威嚴嘅。」頌情外表似爸爸肥肥哋,擁有一致的笑容,性格與爸爸都頗相近,「我工作時間自由,俾到足夠時間陪我個女,所以大大吓佢都幾似我,好鍾意諗嘢,為人慢熱啲,好勝心都幾強,鍾意贏嘅感覺。」

跑馬地聖保祿培育淑女

兩父女一顆好勝心,引領他們不斷進步,一君近年進修讀碩士,對頌情是很好的身教,更謂將來要學爸爸讀碩士!現就讀跑馬地聖保祿天主教小學二年級的頌情,幸運地在統一派位甲部跨區派往該校,因為以前住跑馬地,幼稚園亦在附近就讀,即使搬屋後亦一試跨區報讀,果真幸運派中!頌情現時成績中上,一君對囡囡的表現已感滿意,「佢做最top係得㗎,再谷吓佢就得,可能第時條路會好行啲,但我覺得要平衡,唔需要為咗更好成績令佢咁辛苦,中上已經好好啦,使乜做最叻嗰啲!」
一君指學校重視閱讀,常有額外閱讀堂,令頌情愛上閱讀,並加強了閱讀理解能力。學校亦重視品德培育,改善了囡囡「牛王妹」的性格,「我覺得個女淑女咗,哈哈!」他最希望囡囡有個快樂的校園生活,不要重蹈爸爸覆轍,「唔想個女咁辛苦,所以刻意低調啲,同埋拍戲會好多人識,你諗吓出街會有好多人望你,高又話你高,肥又話你肥,總之有嘢話到你,又有記者影吓你,點都有影響,所以唔想佢高調喇。」

香蕉仔的秘密
香蕉仔已升呢香蕉爸爸,囡囡頌情亦已七歲大,現今細路好早熟,一君笑言自己好傳統,不敢亂教性教育,「學校都未教,我驚我太早講會教錯呀!」片段中他又自爆當年拍戲鮮為人知的秘密,想知係咩?即刻聽聽一君爆料!去片!

 

●撰文:Ling
●攝影:黃大立(部分相片由受訪者提供)
●設計:C.Ming
●場地:PaperClip Hangout( tel:9334 4377)