主持何基佑:外語唔急學

育兒

廣告

港爸港媽常言道︰小朋友六歲前像個海綿,吸收力特強,想仔女語文好就趁早學,外語都要先多聽吸收!精通四文三語的無綫藝人、明珠台《Dolce Vita》(港生活.港享受)主持何基佑(Kay)就不同意此講法,母語都未學好,怎能學精外語?

除了中英普之外,基佑還精通西班牙語,在司儀界非常吃香,但基佑的外語天分並非「贏在起跑線」,直到高中他才接觸西班牙語,靠興趣和後天努力迅速學精。基佑認為學外語並非愈早愈好,首要打好母語底子,再慢慢發掘對外語的興趣,學習才會事半功倍,所以他不急於對八個月大囝囝何清義(Nathaniel)灌輸外語,現時只用廣東話與囝囝溝通,打好中文基礎。

母語 先打好基礎

基佑讀過本地學校、國際學校,之後移民加拿大,英文一定好流利,其實他的廣東話講得更好,零懶音,咬字清晰,沒有崇洋「鬼仔式」英文而忽略中文,家中保持廣東話溝通,自己則繼續學習中文詞彙,因他相信母語好,外語才會學得好,包括英文。「你母語基礎好,學其他語言都會得心應手,即係話喺一啲詞彙上面,如果你母語比較豐富,再學外語你嘅詞彙會同樣豐富。例如小朋友踢完波好污糟,廣東話可以講你個頭好『立』、你個身好污糟、你對手好多泥……英文會變成your head is dirty、your shirt is dirty、your hands are dirty。」單是「污穢」廣東話已有六、七個說法,英文卻只得一個,所以先學廣東話詞彙,再學英文就簡單得多了。

基佑和太太鍾凱瑩(車仔)明白,多學一種外語對將來發展必有優勢,但看過相關研究後,決定對囝囝集中講廣東話,不會分工,連講故事都少講英文,只間中播英文兒歌,基佑說:「如果父母嘅英文唔係好到翻譯水平,小朋友唔會有好大得着,詞彙又貧乏,到時廣東話講得唔正,英文又講得唔好,樣樣半桶水。」
在街上偶爾聽到家長用港式英語與孩子溝通,明明是香港人,卻夾硬講英文奇奇怪怪,基佑覺得如果小朋友在香港土生土長,就不應夾硬把英文當母語。「你唔好諗住仔女用英文做母語,就會講得比其他小朋友好,呢個係無可能。」

母乳 盡量埋身餵

去年基佑和車仔展開人生新一頁,誕下了可愛囝囝清義哥,從此三人行,清義哥現已八個月大,基佑道出新手爸爸的感受,「BB出世父母真係好,我依家先經歷第一個B,好多嘢都會好緊張,覺得佢係全世界最脆弱嘅BB,會隨時死,永遠都覺得佢危殆。」

清義哥當然非常健康,直到訪問當日七個月大,才有少許感冒,基佑歸功於太太堅持餵人奶,令BB健康成長。「每到半夜三更,一定係媽媽起身餵奶,因為我起身 都無用。」先用奶泵儲奶,爸爸就可以幫手吧?「我哋堅持全埋身,因為愈唔埋身就愈少奶,人體構造好得意,當BB一埋身啜,媽媽身體就有訊息,知道BB有幾 大,要分泌合適奶量同營養出來。每日嘅母乳配方都會唔同,例如媽媽病,身體就會分泌有抗體嘅奶,BB食完就冇呢個病,所以媽媽感冒,BB都會冇事,而泵只 係揸走一啲奶,唔會令媽媽身體有訊息。」
換言之,泵出來的儲奶未能為BB提供最合心的營養,奶可以雪藏多個月,儲多幾個月後,就會發覺不同月份泵出來的奶是不同色,因為所含的營養不同。其實餵奶 並非餵飽個B就算,父母細心一點,給予BB每日所需營養,才是最重要。「所以初生泵出嚟嘅奶,唔係好啱三個月後飲,因為BB三個月大又需要其他嘢。」基佑 講得頭頭是道,好有研究,「睇過好多資料、聽講座,又經歷過,有次太太病都有狂餵奶俾BB,都冇事。」

餵母乳總有好多困難時刻,基佑覺得身為丈夫一定要支持太太,雖然有時都很無助,「試過BB咬到媽媽痛,我睇住一個咬人,一個被人咬,都唔知可以點做。」他提醒所有丈夫千祈別斥責太太「冇奶水」,加重太太壓力。

最佳育嬰室:圓方 海港城

太太車仔帶BB出街都會行到邊餵到邊,訪問當日也穿上「餵奶裝」,隨時拉開包巾餵B,
「我一拉開包巾,佢喺入面食,都冇人知我哋做乜,仲方便過飲奶粉,又要帶奶樽奶粉,好多嘢。」近年香港大力宣傳母乳餵哺,港人開始放下歧視目光,而大型商場更添置「哺乳室」,設備完善。兩人一致推介圓方Element的育嬰室,其次是海港城、MegaBox及又一城,「首先有獨立空間餵奶,有完善換片地 方,可以消毒、洗手,而且燈光、音樂柔和,仲有張好舒服嘅梳化或者有咕?靠背嘅櫈坐,有啲地方好到有專人看守BB車,有緊急掣call專人上嚟幫手。」 基佑讚揚迪士尼樂園都好,男人可以坐在出面打機,「太太一嗌就可以即刻入去幫手。」不過,車仔覺得迪士尼只有一個育嬰室太少,「有時行到好入玩,要行好遠 先可以餵奶。」

「三多」助上奶

車仔希望最少持續餵哺母乳至一歲,雖然過程中好多辛酸,但見到囝囝每日健康成長,食飽梳乎的樣子,幾辛苦都值得。她建議少奶水的媽媽一定要記住「三多」:多喝水、多休息、多吃飯,「蛋白質同飯好緊要,因為你要有熱量幫助上奶。」她又指花膠不能亂食,有機會導致乳腺管閉塞,奶變得黏稠。
其實講到尾要母乳餵得好,情緒才是最重要,BB都會有感覺的,車仔說:「最緊要對自己有信心!尤其喺BB猛長期(growth spurts,即初生三周、六周、三個月、六個月、九個月,青春期是人生最後一個猛長期),媽媽係最軟弱,因為BB猛咁食奶、唔瞓覺,瞓一陣又食過,我懷疑過係咪自己唔夠奶呢?了解後就明白呢個係正常現象,只要媽媽保持埋身餵,就冇問題㗎喇。」

餵奶好場推介:
圓方(尖沙嘴)
設施: 獨立哺乳室、換片枱、熱水供應、嬰兒背帶、電子磅、紅外線探熱器、嬰兒座椅、冷熱水機、暖奶器、濕紙巾、潤膚乳、嬰兒手推車(可於禮賓處租借)
海港城(尖沙嘴)
設施: 獨立哺乳室、換片枱、暖奶器、洗手設施,地下及二樓共設三間育嬰室。
MegaBox(九龍灣)
設施: 獨立哺乳室、換片枱、熱水供應、洗手設施、抹手紙,9樓另設電子磅、濕紙巾、暖奶器、飲水機。

清義哥表情多多,最鍾意皺眉chok樣。

學好西班文語:
何基佑身為四語主持,兩文三語之外,更講得一口流利的西班文語,但他反而不急於教囝囝多國語言,連英文都少教,因為他相信要學好外語,必先學好母語,他自己就是一個好例子,現在四文三語嘞嘞聲,片段中大晒幾句西班牙語,還分享了一些西班牙文化,睇片學習一下吧!Hola!

 

●撰文:Ling
●攝影: Simpson Chiu (部分相片由受訪者提供)

●場地:Hearties Studio

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。

常見問題

國際學校會有Logic Test?

部分學校會有Logic Test,有不同的圖畫及問題,考驗學生的邏輯思維以及認知能力。

你有獨家湊BB心得嗎?

更多精選內容