做咗人父母

做咗人父母先知嘅10件事

育兒

廣告

仔女出生之後,自己嘅角色就榮升為人父母。做咗人爸爸媽媽先至發覺原來做人父母唔容易,身為囝囝/囡囡嘅榜樣,事無大小都要幫細路打點。做咗人父母先會發現好多以前發現唔到嘅事,以前覺得時間過得快,但原來可以快成咁!

撰文:Sunday Kiss

1. 身體健康嘅重要性

為人父母之後突然覺得身體健康最重要,照顧好身體才能好好陪伴仔女走過佢哋嘅人生重要時刻。好多父母為咗仔女戒煙戒酒都在所不惜,目的就係為咗可以見證住仔女由牙牙學語到識講嘢,由小學到中學,再由結婚到生佢哋嘅下一代…一切一切都令到準爸爸媽媽注意健康。

2. 時間過得好快

做人父母之後先至發現時間原來可以過得咁快,睇住囝囝/囡囡出世,轉眼間就識得講嘢識得行,再轉眼間就開始返學,識到男/女朋友…時間眨下眼就過。

3. 代溝問題

做得人父母同自己個小朋友最起碼都有二十年嘅年齡差異,望住囝囝睇嘅卡通片,完全感受到代溝嘅問題呀…

4. 明白自己父母嘅辛酸

做仔女個陣成日對自己父母要求多多,大個咗又成日唔返屋企食飯。做咗人父母,角色掉換之後先至明白自己父母養育自己係幾咁辛酸,覺得自己細個對父母唔夠好!

 

5. 私人時間嘅重要性

未生小朋友個陣會幻想生咗小朋友之後都要有自己嘅私人時間,生咗小朋友都要去同朋友去街…但係現實永遠係殘酷嘅,淨係湊仔已經夠忙,邊有時間諗去唔去街!

6. 金錢永遠唔夠用

二人世界個陣,就算覺得錢嘅重要,都唔會話要手停口停。生咗小朋友之後,小朋友嘅衣食住行樣樣都係錢,就算大嘅唔食,細嘅都要食,係依個時候先至會發現錢嘅重要性!

7. 湊仔唔係咁容易

以前成日聽人講,BB仔淨係食飽訓,,訓飽食,照顧BB仔好似好簡單。事實上放工返屋企就要開始餵奶, 洗奶樽,換片,清潔…夜晚又要氹BB訓覺,又要留意BB有無嘔奶…真係唔容易!

8. 小朋友漸漸長大既滿足感

望住囝囝/囡囡越嚟越大個,由牙牙學語到識講嘢再去到開始返學考試…超級有滿足感!

9. 為人父母要繼續學習

榮升做父母一樣要繼續學習,要學點樣照顧囝囝,小朋友唔舒服應該點做,再大啲又要教佢哋做功課…邊個話做咗人父母就唔使繼續學習。

10. 為人父母要十項全能

做咗人父母先發覺自己要十項全能,又要教囝囝家教禮儀,又要煮嘢食俾囝囝,又要幫囝囝報學校…以前都唔覺自己會咁全能。為人父母要十項全能,其實目的都係想自己嘅小朋友可以好好咁長大。

梁繼璋:爸爸媽媽的產後憂鬱 8大擔憂