兩母女銅鑼灣出巡 汪琳6歲女兒 似足靚媽咪
撰文：Sunday Kiss
圖片來源：新傳媒圖片庫、汪琳Facebook
汪琳 6歲女似媽咪
16年前的無綫劇《十月初五的月光》收視高企，令劇中一眾演員人氣急升，汪琳是其中之一，當時的她形象如鄰家少女。08年汪琳和拍拖5年的圈外商人張忠弦結婚，並於11年誕下女兒張梓彤(Kesha)，婚後她都有為《都市閒情》當嘉賓，分享育兒心得以及主持〈煮角招牌菜〉的環節，及至2013年她宣布約滿無綫，自此她淡出幕前專心相夫教女。
Kesha 像可愛娃娃
汪琳雖然淡出幕前，但都會不時在Facebook分享湊女生活，現年6歲的Kesha天生一副美人胚，早前汪琳分別在微博及Facebook上載多張照片，並留言：「第一次和女兒穿和服賞櫻花 」原來一家三口到日本大板遊玩數天，兩母女穿上和服頭貼頭合照，十足餅印一樣，Kesha擺出多個甫士，又靚又cute！
肚凸凸湊女
40歲汪琳日前肚凸凸拖住6歲女兒Kesha去銅鑼灣買日用品，期間Kesha一直乖乖跟住媽咪揀嘢，絕對唔會周圍走，40歲汪琳雖然手手腳腳仲係相當纖幼，但腹部圓潤，穿鬆身娃娃裙都肚凸凸。汪琳之前曾表示有意為Kesha添多個弟弟或妹妹，可惜兩年前不幸小產，當時懷孕六、七周未穩定，有日做完活動回家便出事。性格樂觀的汪琳未有因此留下陰影，下次會多加小心身子，「唔好走動太多囉，上次我冇就住，懷孕後仲有抱個女，又跑又踎，有咗唔應該咁大動作。」經過長時間調理身體後，她會再展開造人大計，仔女都無所謂。「個女想要多個妹妹，先生就想要個囝囝，我自己就冇所謂，如果龍鳳胎就好喇，一次過滿足晒佢哋兩個。」見汪琳肚凸凸，未知係幸福肥還是有喜訊呢？！
出入有車有司機
婚後嘅汪琳樂做少奶奶相夫教女，當日兩母女買完嘢由司機揸七人車接載返家，出到街，囡囡都全程拖實媽媽隻手，好乖巧！
囡囡自選課外活動
全職媽媽汪琳笑言自己是個怪獸家長，但不會強逼女兒上興趣班，只會由她選擇她喜歡的活動，如彈琴、跳舞、畫畫、小提琴，她說：「全屋最惡係我，婆婆同爸爸係慈祥，有時仲話我唔需要咁惡對佢啦，但我覺得適當發惡好啲，唔係好易縱壞，所以湊小朋友都係一門學問，唔可以太硬太軟，唔可以俾佢要乜有乜，不過又唔想日鬧夜鬧，都幾辛苦。依家啲小朋友太聰明喇，你太腍善佢仲食住上。」
進修兒童心理學
不過惡得多有損親子關係，囡囡可能怕媽咪鬧，收起更多秘密不敢宣之於口，為增進母女溝通，汪琳開始進修兒童心理學課程。「依家我對住個女最多，呢方面都想增值吓；如果我仲拍緊戲，可能我會進修演戲。」她最擔心囡囡將來踏入青春期的變化，想透過進修未雨綢繆，「囡囡現階段我唔驚，仲喺我控制範圍，我喝一聲佢就驚啦，我最擔心佢青春期，咩都收收埋埋唔出聲，有心事都唔同父母傾訴，呢方面我最需要了解多啲。」
