荔園

前荔園馴獸師話當年

育兒

廣告

香港人的集體回憶——荔園,與大家闊別了十八載,上星期回歸了!對你來說,難忘的回憶是甚麼?掟階磚贏香口膠?坐碰碰車?入恐龍屋?對於威哥來說,被金錢豹咬傷、推出遊客餵大象食香蕉點子,甚至危急下殺死過老虎,一切都是他在荔園的難忘經歷!

Profile 蕭國威(威哥)
年齡︰75歲
經歷:18歲拜師學習當馴獸師,21至42歲期間擔任荔園唯一的馴獸師,接觸超過五十種動物,其中包括獅子、老虎、豹、熊等猛獸。他與太太劉蓮英兒孫滿堂,有六子女十二孫,現時過着退休生活。

大公子接管家族動物

1966年,荔園動物園由廿一歲蕭國威(威哥)成為掌管動物之領班,荔園已故主席邱德根當年以$1,300高薪聘請他。據悉,他是全港唯一有牌的馴獸師,邱主席更尊稱這位小伙子為「大公子」,可想而知,威哥來頭不少!趁荔園重開,來到茶果嶺一懷舊的榮華冰室,與威哥話當年,才發現荔園的動物園與他及其家族有深厚淵源。冰室牆上掛了威哥馴服金錢豹的黑白相,雖然照片主角身形瘦削,但看他瞪眼與豹對望,就知他年少有勇,面對猛獸毫不怯懦,而相片中的主角就是眼前嘆着茶的長者。現時少了道霸氣的威哥,是位十分健談、風趣的長者,滔滔不絕分享與荔園的點點滴滴。

「其實我老竇蕭雲厂(音:庵)一直有飼養珍禽異獸,佢又識當時亞洲首屈一指馴獸師沈常福,四十年代,攞住三百萬嚟香港,我覺得佢有自己想法,覺得香港無動物園,想做啲把炮事,可能想拎番個荷蘭水蓋(政治勳章)威吓。喺茶果嶺買地起屋放動物,有刺蝟、狐狸、鷲、熊等等五十種動物,部分動物放喺大埔松園仙館飼養場,提交咗《香港動物園報告書》俾政府,打算喺沙田開動物園,但一直唔批。」由於動物身價高昂,例如當年一對大象連同運費差不多七萬元,為了保護動物,蕭雲厂只信自己人,決定交由大兒子蕭國威照顧動物。

家父是邱德根老友

家有十二兄弟姐妹,威哥透露父親曾培訓他及一弟弟做馴獸師,最後得他一人勝任。「我個性好勝,好想做一件事就要去挑戰,對做馴獸師有興趣。十六歲,我讀遠東學院動物系,學好多動物理論,之後跟著名馬戲團馴獸師沈常福學藝,邊學邊做馴獸師。」申請沙田動物園一直沒消息,動物卻長期待在家中及飼養場,白白浪費,像燒錢。威哥父親於四十年代在上海已經認識未發跡的邱德根,其後先後齊齊到港,邱在新界一戲院打工做拉閘,後來發達買了荔園。二人不時聚舊,得知荔園後山有塊地,只有游泳池,浪費地方,威哥父親開始將猛獸送去荔園,更安排兒子做馴獸師。威哥成為動物園的開山元老,不計他眼中的小動物,例如馬騮、鷹、孔雀等等,多種猛獸如老虎、獅子、金錢豹、黑熊、棕熊,以及大型動物大象也一一聽命威哥。「要做馴獸師要有膽識,有智慧,即係最緊要眼快手快腦筋轉數快,講就簡單,做落唔易,無咩人好似我做得到。」

馴獸師智勇雙全

威哥在荔園擔任馴獸師有廿一年,至四十二歲就早早退休,他明言:「唔退唔得!有幾鍾意做都好,身體唔掂、唔及後生,真係要退落嚟。」做馴獸師條件多多,從學院所得的知識及從師傅身上吸取經驗一一適用。「讀動物學課程時,學識動物不同身體結構,話你知點解大象咁大隻,成日好似驚青怕人?原因係佢哋眼睛構造,睇人會好大隻,相反,獅子老虎瞳孔構造好唔同,睇人會睇到好細粒,一啲都唔驚人。對住唔同動物,馴獸師用唔同方法,基本威勢一定要強。大象好有靈性,佢皮咁厚,打佢唔痛,初初要用象勾訓練,好快馴服。而獅虎豹好危險,有需要用到電鞭,好彩我都係用過一次咁大把。先硬後軟,即係嚴厲後,大家相處一段時間,佢哋願意服從你時,就會處處維護你,好錫你。」

見威哥老當益壯、身上沒傷痕「沒穿沒爛」,以為他的馴獸師生涯無驚無險,才不是。「我試過遇到危險,有一次,在飼養場將初來埗到的黑熊過籠差啲走熊。一定唔可以企喺熊前面,因為佢一手抓你襲擊你就大穫,我本嚟企黑熊身邊,諗住扯住佢雙耳,拉番入籠,果吓佢將我扔到前面,一掌順勢撥開我,我彈開十米遠。好彩佢唔係出爪,出爪嘅話,我依家唔會喺度,心口爛晒。雖然我當時吐血,但點都要捉住佢,佢走咗整傷途人點算?最後去睇鐵打,醫師話我臟腑震到。依家諗番,都覺得當年勇!」

又愛又恨金錢豹

芸芸動物中,威哥最偏心金錢豹Lemo及Gigo。可是,金錢豹卻絕不好惹。「Lemo同Gigo會呷醋,有次Gigo就嬲我同Lemo玩,及咗我一下,如果佢真係咬,我就無咗隻手。我知佢因咩原因,唔係有心,無鬧佢。又好似另一次,我爸爸想同隻豹影相,我已經話隻豹唔識你會咬你,點知阿爸堅持入籠,佢知道有我喺度就安心,真係隻豹撲過去,我手快一手扯豹尾,隻豹一痛就回身咬咗我大脾一啖,傷口成二十厘米長,金錢豹知衰縮埋一邊,我忍住痛走過去,摸摸金錢豹頭,話:『乖,你趴喺度就啱啦。』其實,動物,甚至係猛獸都懂事、好忠心,人仲恐怖,動物唔似人會出蠱惑。」

馴獸師會有腰劍、靴劍跟身,還有虎叉、斧頭等工具,都是自衛、必要時才用。威哥強調嚴厲跟殘暴不同,跟動物相處不能只動武,相處久之,彼此都會動之以情。可有千鈞一髮需動武力?威哥回答:「有兩次!兩次都係突然發獸性。我殺死過老虎同棕熊,隻老虎突然走咗出籠,當時我住喺荔園宿舍24小時候命,有警報就過去,老虎真係發狂,擔心傷及同事,走咗出去仲危險,好心痛、好無奈,我當機立斷用斧頭殺佢。而棕熊喺颱風襲港時,突然獸性大發,一樣立刻要做了斷。」

大象天奴 荔園之寶

猛獸之外,最討威哥歡心當然要數大象Tino(天奴),牠是荔園之寶!「天奴每日食草、蔗、香蕉,我向老闆邱生提議,不如將一籮香蕉限量分成多份,俾遊客餵大象,增加互動又賺錢,老闆大舉拇指贊成。天奴真係荔園寶,仲好有靈性,有時遊客好衰整鬼佢,攞蕉引佢又唔俾佢食,唔俾多幾次,我就同遊客講:『唔好呀,天奴會嬲!』嗰個人唔聽,最後天奴去飲水吸水,一吓噴落佢度。」
在荔園當了廿一年馴獸師是威哥風光之時,開心又滿足。可是,年紀大就得退下來。知他育有六子女,有想過子女繼承父業嗎?威哥及在旁的威嫂(英姐)立即耍手擰頭,表示不會,太危險。「荔園曾經搞過動物園管理員招募,有訓練過一男一女,面試時講到充滿熱誠,但兩個人都唔得,女仔做咗三個月,話壓力大,男做咗半年,最後都話自己無辦法做到我咁。」

覓得膽小美人歸

年少英俊又能駕馭眾猛獸,人如其名威風凜凜的威哥迷倒很多女生。他笑說很多攤位小姐喜歡他,又大受遊客歡迎。在大埔松園仙館初遇威嫂,拖着訓練好的熊,讓市民認識一下,當時未來威嫂正好前來旅遊,膽小的她躲在威哥身後,與熊合照,可能是一凹一凸個性,二人擦出愛火花,其後不時到荔園拍拖。組織家庭後,威哥沒有「錫身」而放棄馴獸師一職,直至年紀大才退下來,而荔園受到其他主題公園的威脅,加上收地問題,業務開始走下坡。他沒有眷戀,開始過退休生活,並轉行,曾短期做中港司機,照顧太太及六個孩子。「人始終要生存生活,人如果只係回憶以前光輝,會好頹喪。」荔園重開了,雖然真的動物園不復出,但威哥計劃與太太遊新荔園,感受當年點滴。

後記︰不想當年,向前看

威哥表示不時有人問他會否重出江湖?年時已高的他,想重出江湖或會有心無力,加上,現時沒有馴獸師的職位了。筆者認為不用想太多,荔園重現固然好,但不一定跟足舊式一套,不用硬搬上真動物來。如同威哥享受現時寫意生活,閒時打牌、玩貓狗也不錯,昔日風光何需眷戀?

●撰文:Esther Ngan
●攝影:黃大立(部分相片由受訪者提供)

你有獨家湊BB心得嗎?

更多精選內容