鄭文

升小大作戰 娛樂主播 鄭文 :超細B可攻可守

育兒

廣告

前nowTV娛樂主播,現為自由身主持人的 鄭文 (Cathy),去年9月再誕細仔李熹駱(Sansone),與大女李熹穎(Sabrine)湊成一個「好」字。兩個小朋友相差近五年,Cathy從懷孕搵床位、買奶粉、爭學位都有截然不同的感覺。2010年出世的大女,一直與雙非爭崩頭,到今年仍要爭小一學位;去年出世的細仔,就毋須再捲入「雙非戰爭」,至今順順利利。 唯一令Cathy較頭痛的是,一對仔女都是「細B」,Sansone在9月出世,Sabrine更是12月的超細B,或許就是「輸在射精前」。但Cathy覺得超細B有「進可攻、退可守」的優勢,追不上、行錯路,能選擇重讀一年,也未嘗不是一件好事。

堅持不考證書

2010年,在香港產子的內地孕婦超過四萬人,當中僅六千多人為單非,與本港孕婦的數目相若,當時懷有Sabrine的Cathy,與大班雙非爭個你死我活。「呢一年比較慘,正值雙非高峰期,陀佢嗰陣已經feel到有問題,由搵床位、搵醫生,到出世後撲奶粉、升K1搵幼稚園,我全部都爭過晒。」 雖經歷過多場鬥爭,Cathy仍堅持不爭考證書、不催谷,讓孩子開心學習。證書,終究都是一張紙,有些證書有錢就可換取,不能反映真正實力。她相信,好多學校都不會單憑證書去取錄學生。「今年考小一我哋有做portfolio,講明冇證書、冇學術嘢,以開心為主,睇吓有冇學校認同我哋理念。」

派位失敗叩門中

Sabrine原就讀宣道幼稚園,可惜升小沒有offer,位於41競爭最激烈的校網,參加大抽獎派到第10志願一間黃大仙跨區學校,現正叩門中,未有結果,Cathy說:「叩咗4間學校,其中一間係九龍塘聖家,唔係人人有得in,都係大約揀100人,我唔知關唔關portfolio事。我哋算叩得少,有啲人叩十幾間,小朋友好辛苦,我都怕in太多個女會怕咗,所以只揀4間試吓。」 Sabrine上月到聖家考了叩門筆試,考足兩小時,Cathy覺得叩門的過程可讓孩子跳出comfort zone,面對挑戰,「叩門令佢知道一個學位要爭取先得到,當佢得到就會份外珍惜,因為係自己考返嚟。多嘗試都有好處嘅,佢生活喺香港,將來都要面對競爭;太保護又驚佢太溫室,新一代阿爸阿媽都好慘。」

有happy school打底

大抽獎結果失望,全因採取了進攻型策略,填表頭三位依次為瑪利諾修院學校(小學部)及兩間嘉諾撒聖家學校,全是41校網最熱門女校,除非你鴻運當頭,否則這排位可謂半自殺。Cathy選擇進取,因為早有一間私校打底,「其實啟思小學已經收咗,我都好鍾意間學校以IB教學,課程唔催谷,中文程度又比國際學校好,因為國際學校係普通話教中文、寫簡體字,我堅持要佢廣東話學中文、寫繁體字,普通話應該另外學。佢喺呢間學校應該會好happy,但我哋交學費就唔係好happy,要努力啲喇!」 Cathy想囡囡開心學習,但又去抽傳統學校瑪利諾及聖家,是否自打嘴巴?「我都係交俾個天決定,抽到就抽到,入到都要睇佢讀唔讀到,如果佢真係入到瑪利諾,佢讀得唔開心,我都唔介意同佢轉校,由傳統學校轉讀國際學校好易,但一讀國際學校happy慣,就讀唔番傳統學校。大抽獎一世人可以抽一次,所以就算有私校收咗,我都覺得要試吓,呢個係我哋福利。」

12月出世行錯有take2

Sabrine作為超細B,今年失敗了,下年可以做大B捲土重來,Cathy有考慮入讀啟思後,如果讀得開心會繼續讀,或者再試考其他IB學校,如保良局蔡繼有學校、港大同學會小學等。所以在Cathy眼中,超細B在學業上是「進可攻、退可守」,即使行錯路都有take 2。 「其實我明白點解啲媽咪要『贏在射精前』、『贏在子宮裏』,依家個趨勢真係好恐怖,學校有得揀真係鍾意揀大B、揀有證書。」五年多來,Cathy在激烈競爭下,明白生大B的確有優勢,Sabrine在宣道幼稚園是全班年紀最小,學習上部分表現確比同學遜色,「尤其是小手肌、手眼協調真係冇大B咁叻,班上有幾個甚至大佢一年,出去interview真係好犀利,所以每年家長日我都問老師,佢使唔使重讀一年?每次學校都話佢OK,以細B嚟講算pick up得唔錯,去到中游程度。」 Cathy相信老師的教導,亦慢慢見到女兒的進步,「K2開始教寫字時,佢掌握唔到,唔可以喺個框入面寫字,好彩學校教中文筆劃教得好好,佢依家寫字靚咗好多,都寫得幾深吓,『我們畢業了』都寫到!」

返學做細B 屋企做家姐

Sabrine在班中年紀最小,不多不少有影響自信心,曾向媽媽透露上學不開心,「佢覺得自己總係唔夠人哋快,K1食茶點都慢過人,同學食完去晒玩,佢仲慢慢食緊。」 返到家中,Sabrine隨即變身大家姐,最開心去年多了弟弟,終於可以「恰人」,Cathy笑說:「佢唔鍾意人哋話佢細,鍾意話佢大,依家有細佬就覺得自己好威,係大家姐!一睇就知佢會恰細佬,不過佢都好識照顧人,好錫細佬嘅。」Sabrine性格似媽咪多言,有做司儀潛質,Sansone則是天然呆,似爸爸,「家姐電係用唔完,細佬電好快就冇,完全相反。」 2013年,政府實施零雙非政策,去年9月16日出世的Sansone,毋須再與雙非競爭,但讀書的timing可能比家姐來得麻煩。「好多學校收生由前一年9月1日至8月31日截龍,而且Sansone比較慢熱,學習上冇家姐咁快,但佢做超大B又大得滯,如果人少先有機會收,我都未諗點算,暫時傾向俾佢照做細B先。」好彩爸爸是九龍華仁畢業生,升中可以受惠,「不過到時都唔知變成點喇!」

培育創意做下個朱克伯格

如果父母心態要迎合競爭,仔女要追趕跑第一,生活必定苦不堪言,正所謂過分催谷,分分鐘死在跑道上。Cathy希望繼續堅守不考證書,多培育創意,將來孩子憑創意走出一條新血路,比當上醫生律師,或許對世界更有影響力。「睇吓facebook創辦人朱克伯格?以前邊有人諗到facebook?最近有單新聞一個荷蘭中學生,諗到喺大海set個吸塵系統,幫每個國家執垃圾,咁就賺到幾億,好多呢啲新聞。個世界已經唔同咗,家長係咪應該諗一諗,創意係比傳統教學、死讀書更重要呢?我希望我仔女係呢啲人,佢做YouTuber做到好勁都得㗎,我個女都好鍾意睇!」

 

●撰文:Ling
●攝影:Alison Kwan(部分相片由受訪者提供)
●化妝及髮型:Yuki Pan
●場地:一種幸福(tel: 3956 9044)

你有獨家湊BB心得嗎?

更多精選內容