梁小冰曾演《導火新聞線》「新聞女王」息影教仔不求人 唔請工人、唔補習
梁小冰客串《逆天奇案2》惹集體回憶 2015年《導火新聞線》險被遺忘
梁小冰在無綫年代多數做溫柔善良嘅角色，1997年與陳小春及馬浚偉等拍攝劇《鹿鼎記》之後選擇離開TVB，曾經北上拍劇又試過轉投亞視拍攝《萬家燈火》 ，2012年她加盟王維基的HKTV做合約藝人，代表作為《導火新聞線》，劇中做做成日鬧人嘅「惡女」報章總編輯當時令人耳目一新，為咗演好《導火新聞線》的角色汪海藍，拍攝嗰陣仲專登孤立自己，等其他演員都驚自己，難怪出嚟嗰股氣場咁勁！
返回現實，小冰形容自己與「皇阿媽」完全相反，絕非一名惡女，能演活角色全靠多年的舞台劇訓練及年紀歷練，更重要是兒子陳洋溢（Louis）給予演戲動力，「我要做俾我個仔睇，媽咪係一個好勤力嘅人，無論做咩都會全情投入，我要為個仔繼續我嘅人生。」 劇中小冰不擇手段向上爬，急功近利，與家長訓練仔女贏在起跑線如出一轍，其實小冰教仔之道好簡單，沒補習、沒工人、沒多餘興趣班，今個暑假阿仔想玩就玩，小冰希望洋溢的成長「洋溢快樂」，做個人生長跑高手。
梁小冰 婚後七年 2007誕子患抑鬱
小冰1990年奪得港姐季軍，同屆冠軍為袁詠儀，皆屬好戲之人，小冰當年表演失手識執生，被評判之一的周潤發評為最有演戲天分的港姐，小冰沒令發哥失望，之後八年在TVB備受力捧，演過多齣古裝劇包括《鹿鼎記》的阿珂，贏得「古典美人」稱號。但多年來鮮有代表作，角色又重重複複，身心俱疲下離開TVB轉戰內地及台灣，並於2000年下嫁陳嘉輝，希望組織家庭展開人生新一頁。
停工三年專心湊仔
這個小生命一等七年，孩子呱呱墮地後她太興奮，亦太緊張，令自己情緒有點失控，「我個腦着咗熄唔到機，瞓唔到，我見到個小朋友就覺得好似捧住金蛋咁，每一樣嘢都好緊張。」醫生後來證實小冰患上輕度產後抑鬱，吃了大半年藥，停工三年專心湊仔。
「但我仲係好緊張，成日驚佢跌親、啃親，會唔會窒息，不過原來我都唔算誇張，有個生咗三個嘅朋友，湊第一胎時，連自己沖涼都要抱個BB入洗手間，擺佢喺地下，望住佢沖涼先安心。」
老公嘉輝常被影到做湊仔公，被外界覺得男主內女主外，其實都是多年前嘉輝的決定，「佢話我唔應該將自己世界俾晒小朋友，不如大家share一人一半啦，你出番嚟做嘢可以分散注意力。」
離開TVB 轉戰舞台劇獲優秀獎
小冰停產多時，覺得自己在香港拍劇已沒發展空間，但又不想返內地拍劇與囝囝分隔異地，轉戰舞台劇發展，首部作品旋即奪得《第三屆香港小劇場獎》「優秀女演員獎」，其後加入港視拍劇再創高峰，證明小冰不應放棄幕前演出。
唔請工人親身育兒 嘉輝樂做湊仔公
洋溢在2015年八歲大時，兩夫婦一直從未請過工人，囝囝成長上會比較成熟，與父母關係較好，連老師都讚他有禮守規矩。「我好enjoy做家務，亦都做得好，我唔想個工人霸佔咗個仔，唔想個仔叫咗工人做媽媽。人係有惰性，有工人就唔想自己辛苦，個仔都會懶咗俾晒工人搞，冇工人總有辛苦一面，但當你親眼見到個仔健康成長，幾辛苦都值得。」
小冰感激老公分擔湊仔工作
小冰好感激嘉輝願意分擔湊仔工作，令她可以重拾自己興趣，湊仔又毋須假手於人，「唔係個個男人都願意，我覺得佢好有耐性同心機，特別有愛心，佢成日都感動到我，好似佢會叫我瞓耐啲，佢會睇住個仔，佢唔係hea湊，真係好投入同個仔玩，一齊搓泥膠砌lego，拍拖嗰陣唔覺佢特別鍾意小朋友，啱啱生完都唔覺，佢係慢慢同個仔建立感情，有時黐個仔多過黐我。」
「皇阿媽」教煮
兩人協議好邊個返工就邊個湊仔，不存在男主內女主外，嘉輝重返TVB，要拍劇時小冰會負責湊，2015年她拍HKTV《導火新聞線》8個月，嘉輝就請足假湊仔。「佢本身唔係好識煮嘢食，呢八個月佢要負責晒家頭細務，仲要學煮嘢食，佢都叻㗎，進步咗好多，番茄炒蛋煮得好食過我，絲瓜炒魷魚呢，塊魷魚片嘅花仲靚過我！不過其他餸菜好似茄汁蝦、薑葱蟹、煲湯都係我叻啲！」
小冰自誇煮食有一手！自小與囝囝展開廚房教育，一齊搓湯丸、幫手煮飯，「我個仔叫我『皇阿媽教煮』，佢鍾意入嚟廚房幫我洗菜、洗碗、切嘢，我好樂意俾佢做。我五歲就入廚房燒柴，八歲去街市買餸，煮埋俾屋企人食，依家啲小朋友比較矜貴，唔係咁捱得苦。」小冰覺得廚房教育應及早開始，尤其發現小朋友對煮食好奇，應把握機會教導，錯過了時機就好難再教，「佢好奇一餐飯點煮出嚟，你千祈唔好趕佢出去，到佢十幾歲就冇咁嘅心㗎喇，唔會想跟住媽咪，佢細個學識咗，大個就會掛住媽咪煮嘅嘢，多啲返嚟食飯。」
嚴父教官督促背書
烹飪阿媽叻，學業就靠阿爸，嘉輝很用心教仔讀書，考試前必定督促囝囝背熟課本，小冰指老公名副其實是一名教官，「佢叫個仔考試默書唔可以到嗰日先背，你知道兩星期後要默書，呢兩星期你就逐日讀少少，慢慢讀熟佢，到默書日瞇埋眼都識寫，一啲壓力都冇，默得好輕鬆，所以佢次次返嚟都100分。」
做「新聞女王」早過佘詩曼
同一套方法嘉輝都有教老婆背劇本，「皇阿媽」要經常鬧人，嘉輝點醒她鬧人毋須思考，事前必須記熟每位同事的名字和功能，小冰說：「佢話鬧人要鬧得出色，一定要將所有對白背到滾瓜爛熟，辦公室十個同事叫咩名，負責做咩你唔可以諗，一定要背熟，鬧起人上嚟先可以一輪嘴，鬧人係唔使諗。」
兒子才華洋溢愛演戲
用了爸爸這套學習法後，洋溢的學業一直名列前茅，中英數常、體育及音樂都取得高分，小冰讚囝囝有語言天分及專注力高，「佢吸收力同記憶力都好好，上堂學習已經學到八、九成，加埋爹哋同佢不停溫習，所以唔需要補習都OK。」洋溢就讀一間重語文的直資小學，正努力學習多國語言，「廣東話、普通話、英文、日文、法文、德文、西班牙文……日文同法文佢都好鍾意，但只可以重點揀一樣，喺香港接觸日本文化比較多，佢話依家先揀日文，第時去英國讀書再學法文都得，佢都有自己思想。」
洋溢充滿天分，但父母沒乘勢催谷上興趣班攞cert入名校，多年來小冰只安排他學琴，因為鋼琴需要從小學習，八歲的他將考五級鋼琴。今個暑假洋溢沒上暑期班，早早做完功課專心去玩，「放暑假就係玩，唔使讀書溫習，原本有個話劇想搵佢做男主角，但佢唔想暑假日日排戲，Why not？咁就唔好做，放心去玩啦！」
梁小冰VS皇阿媽
《導火新聞線》「皇阿媽」一角是小冰的代表作，一講起小冰即時聯想她霸氣潑辣形象，小冰澄清自己無論形象及道德觀，都與皇阿媽完全相反，她感慨現今社會比較急功近利，與皇阿媽的想法有點相似，她利用了這個機會去教導兒子正確價值觀，即刻去片聽她解畫！
●撰文：Ling
●攝影：Paul Choi
●化妝：Mimi Lau@KINGS MAKEUP
●髮型：Wilson Wong@KINGS MAKEUP
●服裝：彼芭Biba Exclusiv（Noel）、ad-lib（Louis）
