童星劉小華享受快樂童年

基層童星劉小華 享受快樂童年 無壓力學習

育兒

廣告

憑一曲〈補充練習無間做〉唱出港童心聲的9歲 童星劉小華 ,原名劉皓嵐,年紀輕輕就能歌善舞,所跳的是有型有款街舞Locking,最近他更有份參演電影《空手道》及拍旅遊廣告,皓嵐明言自己並非發明星夢,只是喜歡表演,為興趣而做,特別享受當中的團隊精神。

撰文:Ling
攝影:Simpson Chiu (部分相片由受訪者提供)
場地:青衣城

童星劉小華享受快樂童年

皓嵐與一般小朋友無異,來自基層家庭,住公屋,讀津貼小學,一家三口經常整蠱做怪,相處輕鬆,相信皓嵐的童年過得十分愉快,媽咪Kan透露,與兒子的相處方法是做好朋友,多聆聽他的感受,並讓他自由做喜歡的事,enjoy自己人生,皓嵐聞言即說:「我好enjoy呀!」明年踏入10歲的他,聖誕及新年願望都十分簡單:「想快啲放假去玩!」絕對道出所有小朋友心聲呢!

來自基層家庭

皓嵐從沒有因為自己薄有名氣而看不起同學,因為父母教導過,返到學校他是劉皓嵐,不是劉小華,與其他小學生無異。對他來說,拍戲、拍廣告只是玩樂的一種,享受團隊合作。「我鍾意同人交流,合作做一件事,好似拍戲我可以做好自己責任,幫手完成一個故事。」

返到學校,班中有部分同學認得「劉小華」,並非因為他唱紅〈補充練習無間做〉,而是一部配音卡通電影。「佢哋有睇《魯賓遜漂流記3D》,張poster有我個樣,就知道我有做呢啲嘢。」皓嵐返學不會講自己的工作,因為他喜歡聆聽別人多過自己講,小息寧願多與同學一齊玩。他指同學的反應比較低調,好少求簽名合照,全班都是好朋友,但有時同學會「high大咗」,「佢哋會突然大聲嗌劉小華!我咪Hi同Bye。」

同為攝影師的爸爸Justin和媽媽Kan揚言,絕不會當兒子是搖錢樹,接所有工作皆以兒子的興趣為先,更試過父子檔拍住上,兒子演出,爸爸拍攝,寓工作於親子玩樂,Justin說:「我哋好多時都係做番自己專業嘅嘢,阿仔本身擅長表演呢方面,亦係佢嘅興趣,有人搵佢做嘢都好正常,我哋接任何工作一定以佢意願行先,佢唔鍾意就唔會接,唔會游說佢。」

今個聖誕Justin和皓嵐亦有新搞作,為青衣城的TOMICA Factory製作〈TOMICA SONG〉MV,皓嵐與小小舞蹈員在葵青和荃灣多個街頭跳舞,Justin負責拍攝,為父子倆留下美好回憶。皓嵐與爸爸一齊商討拍攝方向,決定以好玩做主題,「要覺得TOMICA好玩,可以揸車周圍去,依家先去葵荃區,遲啲玩勻全世界!」

轉校天虹小學好開心

經常聽到皓嵐一家人說,做人要開心好玩,Justin和Kan不看重學業,讓兒子發掘興趣發展至為重要,因為有興趣自然會積極學習。去年一次廣告拍攝,更令皓嵐愛上了一間津貼學校 ——浸信會天虹小學,當中的活動教學方法令他眼界大開。「我見到個禮堂有好多嘢玩,有烹飪班,覺得間學校好開心,返去我就同媽咪講,我哋就一齊搵資料了解間學校,真係幾啱我。」Kan指兒子鍾意打機,對IT與科技特別感興趣,這間學校絕對能滿足他。

曾因收生不足瀕臨殺校邊緣的天虹小學,經校長朱子穎引入Happy School的教學理念,並加強資訊科技配套起死回生。朱校長在校內加建了3D打印室、科創室及玩樂室等,今個學年又加入新課程「Dream Starter」(啟蒙者課程),學生每天只在上午上課,下午則全校師生一起探索、計劃及完成自訂的「夢想」,規格不限。朱校長決意減去傳統的上課時間換取學生「追夢」的空間,因為他相信從「追夢」的過程中學習,成效絕不比傳統上課低。

今個學年,皓嵐成功轉校實踐快樂學習,笑言最開心是多一個小息,而且每節課堂只有35分鐘,一日就能多上其他課,令每天的節奏較快,不會沉悶。Kan十分欣喜兒子找到他的Perfect match,令他愛上返學做功課,「呢間學校有佢想學嘅嘢,唔係死板板讀書,喺呢個年代嘅小朋友係知道自己想學乜,作為家長要令小朋友知道為咩而返學。」

適量打機有益身心

還以為皓嵐是打機迷,一定最鍾意學校的遊戲室,學生可以透過獎勵計劃App儲「螢石」,儲夠一定數目就能入去打機玩益智遊戲,但皓嵐笑稱太多人排隊,寧願去玩滑梯,打機可以回家慢慢打。很多家長都禁止孩子打機,Justin和Kan對此十分開放,一來自己也是打機迷,二來只要時間控制得宜,打機也可以有益身心,Justin和皓嵐異口同聲說:「我哋最鍾意打音樂game,可以瘋狂跳舞,打太鼓仲可以加強節奏感!」

Kan自小教導兒子,打機要坐好姿勢,時數有節制,曾試過作出反面教材,讓兒子無節制地打機。「佢真係打足一日,最後佢頂唔順話打到想嘔,我就畀段新聞佢睇,有人真係打機打到猝死,佢驚到以後最多只係打40分鐘,佢好驚唔舒服嘅感覺。」皓嵐聞言自己怕唔舒服又怕悶,好難坐定定,「我都係做晒功課,得閒先打機,我又唔會帶部機返學校打。」

明年10歲:可以幫狗執屎

轉眼間到年底,四圍也響起聖誕鐘聲,皓嵐被問到最鍾意甚麼節日,他竟回答:「差唔多到聖誕節就最鍾意聖誕節,差唔多到中秋我就鍾意中秋!」即是有假放就鍾意啦!皓嵐最期待是放聖誕假去玩,「因為有得開party!今個聖誕活動最想日日開party,同朋友一齊打機打邊爐,一齊出去玩!」

媽咪提醒皓嵐,2018年對他很重要,因為他終於踏入雙位數10歲了!「我終於可以幫隻狗執屎!」他笑說因為現在不想執,就與父母約法三章,自己10歲開始就會幫手執。2018年有沒有一些新目標呀?皓嵐回答:「好想快啲放暑假!」他無時無刻都想放假玩!不過認真想一想,他在學校都有「夢想」要達成,「我同隊友喺學校嘅『Dream Starter』要做一個運輸或直升機航拍,希望新一年做得到!」

將來想成為「跳舞導演」

長遠來說,皓嵐已經好清楚自己的喜好,希望將來能發展跳舞及攝影方面,見到父母經常背起攝影器材四圍去,拍攝無數靚相和製作短片,也燃起了皓嵐對攝影的興趣。「本身一定有基因嘅,我都好鍾意睇爸爸媽媽做嘢,都想一齊影相拍嘢。」Justin和Kan聽到兒子講到「基因」大嚇一驚,笑言兒子經常搶機拍攝,「我哋係攝影窮三代。」

既然皓嵐鍾意跳舞,又鍾意拍攝,所以他希望將來能成為一個「跳舞導演」,當能成為導演,自己的跳舞功力必有一定水平。「我可以自己拍自己跳舞,用一個Dancer嘅角度去拍!」在香港很少出產跳舞導演,所以媽媽Kan就提議他考慮一下這條路,「佢唔怕辛苦,拍攝經常日曬雨淋,佢都覺得好好玩,加上佢鍾意跳舞,就提議佢考慮做個街舞導演,因為香港都冇一個導演係跳街舞㗎嘛,可能佢做第一個呢!」